ເມືອງພຽງ ແຂວງໄຊຍະບູລີ ຈັດກອງປະຊຸມວຽກງານກວດກາ ແລະ ວຽກງານກໍ່ສ້າງພັກພະນັກງານ ປັບປຸງກົງຈັກການຈັດຕັ້ງປະຈຳປີ 2023 ແລະ ທິດທາງແຜນການປະຈໍາປີ 2024 ຂຶ້ນໃນວັນທີ 9 ເມສາ ຜ່ານມາ ທີ່ຫ້ອງປະຊຸມໃຫ້ຂອງເມືອງ ພາຍໃຕ້ການເປັນປະທານຂອງສະຫາຍ ນາງ ແສງອາພອນ ແກ້ວບົວໂຮມ ຮອງເລຂາພັກເມືອງ ປະທານກວດກາພັກ ຫົວໜ້າອົງການກວດກາລັດເມືອງ ໂດຍການເປັນກຽດເຂົ້າຮ່ວມຂອງສະຫາຍ ບຸດສະກອນ ອິນທະລັງສີ ກຳມະການພັກແຂວງ ເລຂາພັກເມືອງ ເຈົ້າເມືອງໆພຽງ, ມີແຂກຖືກເຊີນ ແລະ ພາກສ່ວນກ່ຽວຂ້ອງອ້ອມຂ້າງເມືອງເຂົ້າຮ່ວມ.
ກອງປະຊຸມໄດ້ຜ່ານຮ່າງບົດສະຫຼູບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ປະຈໍາປີ 2023 ແລະ ທິດທາງ ປີ 2024, ຮ່າງບົດສະຫຼູບການເຄື່ອນໄຫວວຽກງານກວດກາປະຈຳປີ 2023 ແລະ ທິດທາງແຜນການປະຈຳປີ 2024 ໂດຍໄດ້ຍົກໃຫ້ເຫັນຜົນງານດ້ານດີທີ່ຕັ້ງໜ້າ, ບົດຮຽນທີ່ຖອດຖອນໄດ້ ແລະ ດ້ານອ່ອນຂໍ້ຄົງຄ້າງທີ່ຈະຕ້ອງແກ້ໄຂໃນຕໍ່ໜ້າ ຊຶ່ງທົ່ວເມືອງມີຮາກຖານພັກທັງໝົດ 130 ກວ່າຮາກຖານ. ໃນໄລຍະຜ່ານມາຄະນະພັກແຕ່ລະຂັ້ນໄດ້ຖືເອົາວຽກງານການເມືອງ-ແນວຄິດເປັນວຽກງານແຖວໜ້າໃນການເຄື່ອນໄຫວນໍາພາ-ຊີ້ນໍາໂດຍໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ໂດຍໄດ້ນຳເອົາແນວທາງນະໂຍບາຍຂອງພັກ ລະບຽບກົດໝາຍຂອງລັດລົງເຜີຍແຜ່ຢ່າງເປັນປົກກະຕິເຮັດໃຫ້ສະມາຊິກພັກ. ສໍາລັບວຽກງານກວດກາກໍໄດ້ເອົາໃຈໃສ່ຕິດຕາມ-ກວດກາຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຄວາມຮັບຜິດຊອບການເມືອງຂອງສະມາຊິກພັກເຫັນວ່າຄະນະພັກ, ສະມາຊິກພັກ ມີຄວາມເຊື່ອໝັ້ນຕໍ່ແນວທາງການນຳພາຂອງພັກ, ເປັນເຈົ້າການໃນການຕ້ານ ແລະ ສະກັດກັ້ນການສໍ້ລາດບັງຫຼວງໂດຍໄດ້ນໍາເອົາບັນດາກົດໝາຍ ແລະ ນິຕິກໍາອື່ນໆ ທີ່ພົວພັນເຖິງວຽກງານສະກັດກັ້ນ, ຕ້ານການສໍ້ລາດບັງຫຼວງ ລົງເຜີຍແຜ່, ເຊື່ອມຊຶ່ມ ໃຫ້ຖັນແຖວສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ເພື່ອແນ່ໃສ່ໂຄສະນາ ປຸກລະດົມທົ່ວສັງຄົມ ໃຫ້ມີສ່ວນຮ່ວມຕໍ່ວຽກງານກວດກາພັກ, ກວດກາລັດ, ສະກັດກັ້ນ ຕ້ານການສໍ້ລາດບັງຫຼວງ ແລະ ຄໍາຮ້ອງ-ຄໍາສະເໜີໃຫ້ກວ້າງຂວ້າງຂຶ້ນກວ່າເກົ່າ. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນຂື້ນປະກອບຄໍາຄິດຄຳເຫັນເພຶ່ອຊອກຫາວິທີ່ແກ້ໄຂບັນດາດ້ານທີ່ຍັງຄົງຄ້າງໃຫ້ດີຈຶ້ນເທື່ອລະກ້າວ.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ