ເມືອງສາລະວັນ ແຂວງສາລະວັນ ໄດ້ປະກາດຮັບຮອງເອົາ 8 ບ້ານ ແລະ 1 ຊຸມຊົນຂອງເມືອງ ເປັນບ້ານຢຸດຕິການຖ່າຍຊະຊາຍ ມີ: ບ້ານປາກປຸຍ, ນາໃຊພູຄຳ, ໜອງຝັ່ງຢອງ, ດົງສະວັງ, ແບ່ງວັງຈັນ, ຫາງໃຫ່ຍ, ຈານເໜືອ, ບ້ານນາໂພໃຫ່ຍ ແລະ ຊຸມຊົນນາລະຈາງ.
ທ່ານ ດ່ອນ ແກ້ວມະນີ ຮອງເລຂາພັກ-ນາຍບ້ານໜອງຝັ່ງຢອງ ໄດ້ຜ່ານການຈັດຕັ້ງປະຕິບັດໃນໄລຍະຜ່ານມາໃນວຽກງານຊຸມຊົນເປັນເຈົ້າການ ດ້ານສຸຂານາໄມ ຈໍານວນ 8 ບ້ານ ແລະ 1 ຄຸ້ມ ທີ່ໄດ້ບັນລຸຕາມມາດສະຖານ ແລະ ເງື່ອນໄຂ 4 ດາວ ໂດຍມີຫຼາຍພາກສ່ວນເຂົ້າຮ່ວມ. ຜ່ານການຈັດຕັ້ງປະຕິບັດຕາມຂັ້ນຕອນ ແລະ ວິທີການຈັດຕັ້ງປະຕິບັດສ້າງບ້ານຢຸດຕິການຖ່າຍຊະຊາຍ ຕາມ 4 ຂັ້ນຕອນຄື: ຂັ້ນຕອນກະກຽມ, ການເກັບກຳ-ວິເຄາະວິໃຈຂໍ້ມູນ, ການຈັດຕັ້ງປະຕິບັດຄາດໝາຍສູ້ຊົນຂອງເມືອງ ເພື່ອບັນລຸການຢຸດຕິການຖ່າຍຊະຊາຍ ແລະ ຂັ້ນຕອນການຊຸກຍູ້, ຕິດຕາມ, ກວດກາ, ປະເມີນຜົນ ຕາມມາດຖານເງື່ອນໄຂ 4 ດາວ, ວຽກງານຊຸມຊົນເປັນເຈົ້າການດ້ານສຸຂານາໄມ (ຊຈສ) ສາມາດປະເມີນໄດ້ຄື: ດາວທີ 1 ທຸກໆຄົວເຮືອນຕ້ອງກໍ່ສ້າງວິດຖ່າຍ ແລະ ນໍາໃຊ້ວິດຖ່າຍ ປະຕິບັດໄດ້ 100%, ດາວທີ 2 ອະນາໄມຮ່າງກາຍ ແລະ ລ້າງມືໃສ່ສະບູທຸກຄັ້ງກ່ອນ ຫຼື ຫຼັງຈັບບາຍສິ່ງຂອງຕ່າງໆ ປະຕິບັດໄດ້ 80%, ດາວທີ 3 ນໍ້າດື່ມ-ນໍ້າໃຊ້ມີຄວາມປອດໄພ ປະຕິບັດໄດ້ 80% ແລະ ດາວທີ 4 ອະນາໄມສິ່ງແວດລ້ອມ ປະຕິບັດໄດ້ 80%. ຈາກນັ້ນ, ໃນພິທີ ທ່ານ ໜູຄຳ ສີສະຫັວດ ຮອງເຈົ້າເມືອງສາລະວັນ ແລະ ທ່ານ ນາງ ບຸນໂຮມ ໂງ່ນກະເສີມສຸກ ຮອງຫົວໜ້າພະແນກສາທາລະນະສຸກແຂວງ ໄດ້ມອບໃບຢັ້ງຢືນ ບ້ານຢຸດຕິການຖ່າຍຊະຊາຍ ແລະ ບ້ານແບບຢ່າງສາທາລະນະສຸກໃຫ້ 8 ບ້ານ ແລະ 1 ຊຸມຊົນ ຕາງໜ້າຮັບໂດຍເລຂາພັກ-ນາຍບ້ານ.
ພິທີດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງການສາທາລະນະສຸກເມືອງ, ໂດຍການເຂົ້າຮ່ວມຂອງທ່ານ ຮອງເຈົ້າເມືອງສາລະວັນ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
(ຂ່າວ: ລັດຕະນາ ແສງສຸວັນ)
ຄໍາເຫັນ