ເມືອງສິງ ເຊື່ອມຊຶມເອກກະສານ ແລະ ປັບປຸງການຈັດຕັ້ງ

ທ່ານ ໄຊພອນ ເສົາຈັນຖາ ກໍາມະການປະຈຳພັກເມືອງ ຫົວໜ້າຄະນະຈັດຕັ້ງເມືອງໄດ້ຜ່ານ ຄຳແນະນໍາຂອງຄະນະເລຂາທິການສູນກາງພັກ ເລກທີ 483/ຄລສພ, ລົງວັນທີ 4 ເມສາ 2025 ກ່ຽວກັບການປັບປຸງກົງຈັກການຈັດຕັ້ງ. ຈາກນັ້ນ, ທ່ານ ນາງ ແສງຕານ ພູມຍາວົງ ກຳມະການພັກເມືອງ ຮອງປະທານຄະນະກວດກາພັກ ແລະ ອົງການກວດກາລັດເມືອງ ໄດ້ຜ່ານມະຕິກອງປະຊຸມສະພາແຫ່ງຊາດເລກທີ 05/ສພຊ,ລົງວັນທີ 20 ມີນາ 2025 ວ່າດ້ວຍການຮັບຮອງການປັບປຸງກົງຈັກການຈັດຕັ້ງຂອງລັດຖະບານ, ມະຕິຂອງຄະນະປະຈຳສະພາແຫ່ງຊາດ ກ່ຽວກັບການຮັບຮອງເອົາການປັບປຸງເນື້ອໃນມາດຕາ 34 ແລະ ມາດຕາ 38 ຂອງກົດໝາຍວ່າດ້ວຍປະກັນສັງຄົມ ເລກທີ 162/ຄປຈ,ລົງວັນທີ 30 ພືດສະພາ 2025 ແລະ ຮ່າງເກັບກໍາອຸປະກອນ, ພາຫະນະ ແລະ ງົບປະມານແຫ່ງລັດ, ເພື່ອຮັບປະກັນໃຫ້ການປັບປຸງກົງຈັກການຈັດຕັ້ງຢູ່ພາຍໃນເມືອງ ໃຫ້ຖືກຕ້ອງຕາມທິດຊີ້ນໍາ, ມີຄວາມເປັນເອກະພາບ, ມີປະສິດທິພາບ, ທັນກັບເວລາທີໄດ້ກຳນົດ, ບົນພື້ນຖານການປະສານສົມທົບກັບທຸກພາກສ່ວນທີ່ກ່ຽວຂ້ອງ ຢ່າງເລິກເຊິ່ງ ເເລະ ໃຫ້ສຳເລັດພາຍໃນ ຕົ້ນເດືອນ ກໍລະກົດ 2025ນີ້. ໃນການປັບປຸງກົງຈັກການຈັດຕັ້ງດັ່ງກ່າວ ແມ່ນໃຫ້ສຸມໃສ່ຄົ້ນຄວ້າເລືອກເຟັ້ນ, ສັບຊ້ອນ, ຈັດວາງພະນັກງານ-ລັດຖະກອນຄືນໃໝ່ຢ່າງຮັດກຸມ ແລະ ເປັນລະບົບ, ຈັດສັນງົບປະມານ, ພາຫະນະ ເພື່ອຮັບໃຊ້ວຽກງານດັ່ງກ່າວຕາມລະບຽບການ ແລະ ເອົາໃຈໃສ່ນຳພາການສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນ ມີຄວາມຮັບຮູ້, ເຂົ້າໃຈ ແລະ ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນສຳເລັດຕາມລະດັບຄາດໝາຍ ແລະ ໃນຕອນທ້າຍ ທ່ານ ພາຄິນ ທຳມະວົງ ຮອງຫົວໜ້າຄະນະຈັດຕັ້ງເມືອງ ໄດ້ຜ່ານ ມະຕິແຕ່ງຕັ້ງຄະນະຮັບຜິດຊອບປັບປຸງກົງຈັກຂັ້ນເມືອງຕື່ມອີກ.

    ທ່ານ ບຸນທັນ ປອນວັນນາ ໄດ້ເນັ້ນໜັກ ບາງບັນຫາທີ່ສຳຄັນເປັນຕົ້ນແມ່ນ ໃຫ້ຫົວໜ້າ-ຄະນະ,ພະນັກງານ-ລັດຖະກອນທັງ 11 ຫ້ອງການທີ່ຖືກໂຮມເຂົ້າກັນເປັນ 5 ຫ້ອງການ ທີ່ຖືກສັບຊ້ອນ, ຈັດວາງພະນັກງານ-ລັດຖະກອນຄືນໃໝ່ຢ່າງຮັດກຸມ ແລະ ເປັນລະບົບ, ຈັດສັນງົບປະມານ, ພາຫະນະ ໃຫ້ມີຄວາມເຂົ້າໃຈ ເປັນເອກະພາບ, ມີປະສິດທິພາບ, ຕາມຄະນະຮັບຜິດຊອບປັບປຸງກົງຈັກການຈັດຕັ້ງຢູ່ພາຍໃນເມືອງໄດ້ກໍານົດໄວ້. 

(ຂ່າວ: ສອນ ສໍປວນເຮືອງ)