ເມືອງວຽງພູຄາ ສະຫຼຸບວຽກງານກໍ່ສ້າງຮາກຖານການເມືອງ

ເມືອງວຽງພູຄາ ແຂວງຫຼວງນໍ້າທາ ໄດ້ຈັດກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ-ພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ ປະຈໍາປີ 2023 ແລະ ທິດທາງແຜນການ 2024 ຂຶ້ນເມື່ອບໍ່ດົນມານີ້, ທີສະໂມສອນຂອງເມືອງ, ໂດຍການເຂົ້າຮ່ວມຂອງທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີທ່ານ ບຸນຊົງ ວາໄຊຢີ ເລຂາພັກເມືອງ ເຈົ້າເມືອງໆວຽງພູຄາ, ມີພາກສ່ວນກຽວຂ້ອງເຂົ້າຮ່ວມ.
ໃນກອງປະຊຸມ. ທ່ານ ສົມພົນ ຈັນທະວົງ ກໍາມະການພັກເມືອງ ຫົວໜ້າຫ້ອງວ່າການເມືອງ ໄດ້ຜານຮ່າງບົດສະຫຼຸບ ການຈັດຕັ້ງປະຕິບັດ ວຽກງານກໍ່ສ້າງ ຮາກຖານການເມືອງ, ພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານ 3 ສ້າງ ປະຈໍາປີ 2023 ແລະ ແຜນ ປີ 2024 ວ່າ: ເມືອງວຽງພູຄາ ມີ 7 ກຸ່ມບ້ານ, 46 ບ້ານ, 5.009 ຄົວເຮືອນ, ມີພົນລະເມືອງ 27. 100 ຄົນ ຍິງ, 13.280 ຄົນ, ມີບ້ານພັດທະນາ 28 ບ້ານ, ເທົ່າກັບ  60,86%, ຄອບຄົວພັດທະນາ 3.859 ຄອບຄົວ, ເທົ່າກັບ 84,31% ບ້ານພົ້ນທຸກ 31 ບ້ານ ເທົ່າກັບ 67,39%, ຄອບຄົວພົ້ນທຸກ 4.042 ຄອບຄົວ ເທົ່າກັບ 88,31%, ປັດຈຸບັນຍັງມີບ້ານທຸກຍາກ 15 ບ້ານ ເທົ່າກັບ 32,60% ແລະ ຄອບຄົວທຸກຍາກ 535 ຄອບຄົວ ແລະ ໄດ້ນໍາພາຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດແກ້ໄຂຄວາມທຸກຍາກ ແລະ ວຽກງານ 3 ສ້າງ ຕາມ 4 ເນື້ອໃນ 4 ຄາດໝາຍ. ສ້າງແຜນ ແລະ ຈັດລຽງບູລິມະສິດຈຸດສຸມພັດທະນາ ສ້າງບ້ານໃຫ່ຍເປັນຕົວເມືອງນ້ອຍໃນຊົນນະບົດ ບ້ານນໍ້າຟ້າ ມີ 11 ໂຄ່ງການ, ໄດ້ສ້າງກົນໄກການນໍພາ-ຊີ້ນໍາຢ່າງທົ່ວເຖິງແຕ່ຂັ້ນເມືອງຫາຂັ້ນບ້ານ. ເຮັດໃຫ້ເມືອງວຽງພູຄາ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຕໍ່ເນື່ອງ, ຊິວິດການເປັນຢູ່ຂອງປະຊາຊົນດີຂຶ້ນ.
 (ຂ່າວ: ຄໍາປິງ)