ເມືອງໄຊຍະບູລີ ປາຖະກາຖາວັນສ້າງຕັ້ງຊາວໜຸ່ມ ຄົບຮອບ 69 ປີ

ເມື່ອບໍ່ດົນມານີ້ ເມືອງໄຊຍະບູລີ ແຂວງໄຊຍະບູລີ ປາຖະກາຖາວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 69 ປີ (14 ເມສາ 1955-14 ເມສາ 2024) ຢູ່ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານຂອງທ່ານ ດວງຕາ ໄຊວຸດ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງ, ມີກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການຂອງເມືອງ, ອົງການປົກຄອງບ້ານ ແລະ ພະນັກງານຫຼັກແຫຼ່ງຂອງເມືອງເຂົ້າຮ່ວມ.
ໃນພິທີທ່ານ ດວງຕາ ໄຊວຸດ ໄດ້ຍົກໃຫ້ເຫັນປະຫວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວ ຂອງຄະນະຊາວໜຸ່ມ ປະຊາຊົນ ປະຕິວັດລາວ, ການເຄື່ອນໄຫວ ຂອງຄະນະຊາວໜຸ່ມ ປະຊາຊົນ ປະຕິວັດລາວ ນັບຕັ້ງແຕ່ກອງປະຊຸມໃຫ່ຍ ຜູ້ແທນຊາວໜຸ່ມ ທົ່ວປະເທດ ຄັ້ງທີ I-VIII. ຈຸດປະສົງ ກໍແມ່ນເປັນການສຶກສາອົບຮົມການເມືອງ-ແນວຄິດໃຫ້ແກ່ອະນຸຊົນ - ເຍົາວະຊົນ, ສະມາຊິກຊາວໜຸ່ມ, ສະມາຊິກພັກ, ພະນັກງານລັດຖະກອນ ແລະ ປະຊາຊົນທຸກທົ່ວໜ້າ, ມີຄວາມຮັບຮູ້ເຊືອມຊືມຢ່າງເລິກເຊິ່ງຕໍ່ມູນເຊື້ອແຫ່ງການກຳເນີດເຕີບໃຫ່ຍຂະຫຍາຍຕົວ ຂອງກຳລັງຊາວໜຸ່ມ ປະຊາຊົນ ປະຕິວັດລາວ  ຕະຫຼອດໄລຍະ 69 ປີທີ່ຜ່ານມາ, ຍົກໃຫ້ເຫັນບົດບາດໃນການຊີ້ນຳ - ນຳພາຢ່າງໃກ້ສິດຕິດແທດຂອງພັກປະຊາຊົນປະຕິວັດລາວໃນການວາງແຜນນະໂຍບາຍກ່ຽວກັບການປັບປຸງກໍ່ສ້າງກໍາລັງຊາວໜຸ່ມປະຊາຊົນປະຕິວັດລາວໃນແຕ່ລະໄລຍະຢ່າງຖືກຕ້ອງສອດຄ່ອງກັບການຂະຫຍາຍຕົວຂອງການປະຕິວັດລາວ.
    ໃນໂອກາດນີ້, ເມືອງໄຊຍະບູລີ ກໍໄດ້ຈັດງານແຂ່ງຂັນກິລາເປຕັງຊິງຂັນທ່ານ ເຈົ້າເມືອງ ຊຶ່ງມີທີມເຂົ້າຮ່ວມແຂ່ງຂັນທັງໝົດ 51 ທີມ, ຜ່ານການແຂ່ງຂັນທີ 1 ໄດ້ແກ່ທີມກອງບັນຊາການທະຫານເມືອງ ໄດ້ຮັບຂັນ 1 ໜ່ວຍ ເງີນສົດ 1 ລ້ານ 5 ແສນກີບ, ທີ 2 ທີມ ບ້ານທ່ານາ ໄດ້ຮັບເງິນ 1 ລ້ານ 3 ແສນກີບ, ທີ 3 ໄດ້ແກ່ທີມ ໂຮງຮຽນ ມສ ເອກະພາບ ໄດ້ຮັບເງີນ 1 ລ້ານກີບ. ໃຫ້ກຽດມອບຂອງຂັວນລາງວັນໂດຍທ່ານ  ດວງຕາ ໄຊວຸດ.
(ຂ່າວ-ພາບ: ສົມພົງ ສີສະຫັວດ)