ໃນວັນທີ 26 ກັນຍາ ນີ້ ທີ່ຫ້ອງວ່າການແຂວງເຊກອງ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ຕ້ອນຮັບການເຂົ້າຢ້ຽມຢາມພົບປະ ຂອງທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດ ແຫ່ງຣາຊະອານາຈັກໄທ ປະຈຳ ສປປ ລາວ ພ້ອມດ້ວຍຄະນະ, ໃນໂອກາດມາຢ້ຽມຢາມ ແລະ ເຮັດວຽກຢູ່ແຂວງເຊກອງ. ໂອກາດນີ້, ທ່ານເຈົ້າແຂວງໄດ້ສະແດງຄວາມຕ້ອນຮັບ ແລະ ຊົມເຊີຍທ່ານເອກອັກຄະຣາຊະທູດໄທ ປະຈຳ ສປປ ລາວ ທີ່ໄດ້ມາຢ້ຽມຢາມ ແລະ ເຮັດວຽກຢູ່ແຂວງເຊກອງ.

ພ້ອມນີ້, ທ່ານເຈົ້າແຂວງຍັງໄດ້ແຈ້ງໃຫ້ຊາບກ່ຽວກັບສະພາບລວມຂອງແຂວງ, ການລົງທຶນຂອງນັກທຸລະກິດໄທໃນຂະແໜງການຕ່າງໆຢູ່ແຂວງເຊກອງ ໂດຍສະເພາະໂຄງການໄຟຟ້າພະລັງລົມ ຊຶ່ງເປັນໂຄງການໃຫຍ່ ມີກໍາລັງການຕິດຕັ້ງ 600 ເມກາວັດ ແລະ ການຊ່ວຍເຫຼືອຂອງຣາຊະນາຈັກໄທ ໃນໄລຍະຜ່ານມາ ໂດຍສະເພາະການຊ່ວຍເຫຼືອດ້ານການສຶກສາ. ພ້ອມນັ້ນ, ທ່ານເຈົ້າແຂວງ ຍັງໄດ້ສະເໜີໃຫ້ທ່ານທູດຊ່ວຍຊຸກຍູ້ນັກທຸລະກິດໄທເຂົ້າມາລົງທຶນໃນຂະແໜງການຕ່າງໆ ເປັນຕົ້ນແມ່ນຂະແໜງການທ່ອງທ່ຽວ, ກະສິກໍາ ແລະ ອຸດສາຫະກໍາ-ການຄ້າ ຊຶ່ງທັງໝົດນັ້ນ ເປັນການປະກອບສ່ວນອັນໃຫຍ່ຫຼວງເຂົ້າໃນການພັດທະນາເສດຖະກິດ-ສັງຄົມ ຂອງແຂວງເຊກອງ ແນໃສ່ສ້າງອາຊີບ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຂອງປະຊາຊົນ ແລະ ເຊື່ອໝັ້ນຢ່າງຍິ່ງວ່າ ໃນວາລະທ່ານດໍາລົງຕໍາແໜ່ງນີ້ ການພົວພັນຮ່ວມມື ລະຫວ່າງ ຣາຊະອານາຈັກໄທ ກັບ ສປປ ລາວ ໂດຍສະເພາະແຂວງເຊກອງ ກັບ ບັນດາແຂວງຕ່າງໆຂອງໄທ ຈະໄດ້ຮັບການເສີມຂະຫຍາຍຂຶ້ນໄປເລື້ອຍໆ.

ທ່ານ ນາງ ມໍລະກົດ ສີສະຫວັດ ກໍໄດ້ສະແດງຄວາມຂອບໃຈຕໍ່ທ່ານເຈົ້າແຂວງ ພ້ອມຄະນະນໍາຂອງແຂວງ ທີ່ໃຫ້ການຕ້ອນຮັບຢ່າງອົບອຸ່ນ ແລະ ໄດ້ກ່າວຈຸດປະສົງ ຂອງການມາຢ້ຽມຢາມແຂວງເຊກອງໃນຄັ້ງນີ້ ຊຶ່ງເປັນຂີດໜາຍທີ່ສຳຄັນ ໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມື ເພື່ອການພັດທະນາເສດຖະກິດຂອງສອງປະເທດ ໂດຍສະເພາະການພັດທະນາເສດຖະກິດ-ສັງຄົມ ຂອງແຂວງເຊກອງ

ຂ່າວ: ເຊກອງ