ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ສູນຄວບຄຸມ ແລະ ປ້ອງກັນພະຍາດແຫ່ງສະຫະລັດ ອາເມຣິກາ (CDC) ຢືນຢັນການພົບເດັກນ້ອຍຕິດເຊື້ອໄວຣັດໄຂ້ຫວັດສັດປີກ ສາຍພັນ H5N1 ໃນລັດແຄລິຟໍເນຍ ຊຶ່ງເປັນກໍລະນີການຕິດເຊື້ອໄຂ້ຫວັດສັດປີກສາຍພັນ H5N1 ໃນເດັກນ້ອຍຄົນທຳອິດທີ່ມີລາຍງານໃນສະຫະລັດ ອາເມຣິກາ.

ສູນ CDC ລະບຸວ່າ: ເດັກນ້ອຍຜູ້ນີ້ມີອາການບໍ່ຮຸນແຮງ ແລະ ໄດ້ຮັບຢາຕ້ານໄວຣັດໄຂ້ຫວັດສັດປີກ ຊຶ່ງສອດຄ່ອງກັບກໍລະນີການຕິດເຊື້ອໃນມະນຸດທີ່ເຄີຍພົບເຫັນໃນ ສະຫະລັດ ອາເມຣິກາ ແລະ ຄົນເຈັບເດັກນ້ອຍດັ່ງກ່າວກຳລັງຟື້ນຟູຕົວ.

ໜ່ວຍງານທີ່ກ່ຽວຂ້ອງກຳລັງສືບສວນຫາແຫຼ່ງທີ່ມາຂອງເຊື້ອໄວຣັດ ທີ່ແຜ່ໄປສູ່ເດັກນ້ອຍດັ່ງກ່າວ ໂດຍຈົນເຖິງຂະນະນີ້ຍັງບໍ່ພົບການແຜ່ລະບາດຂອງສາຍ H5N1 ຈາກຄົນສູ່ຄົນໃນ ສະຫະລັດ ອາເມຣິກາ.

ສູນ CDC ເປີດເຜີຍວ່າ: ມີລາຍງານຄົນເຈັບພະຍາດໄຂ້ຫວັດສັດປີກ ສາຍພັນ H5N1 ໃນສະຫະລັດ ອາເມຣິກາ 55 ຄົນແລ້ວ ໃນປີ 2024 ຊຶ່ງມີ 29 ຄົນ ຢູ່ໃນລັດແຄຣີຟໍເນຍ.

ທັງນີ້, ສູນ CDC ປະເມີນວ່າ: ຄວາມສ່ຽງການຕິດເຊື້ອດັ່ງກ່າວໃນກຸ່ມປະຊາຊົນທົ່ວໄປນັ້ນຢູ່ໃນລະດັບຕໍ່າ ແຕ່ວ່າຜູ້ທີ່ສຳຜັດກັບສັດທີ່ຕິດເຊື້ອ ຫຼື ສັດທີ່ມີໂອກາດຕິດເຊື້ອເຊັ່ນ: ສັດປີກ, ງົວນົມ ແລະ ສັດອື່ນໆ ຫຼື ຢູ່ໃນສະພາບແວດລ້ອມທີ່ອາດມີການປົນເປື້ອນຈາກສັດປີກ ຫຼື ສັດອື່ນໆທີ່ຕິດເຊື້ອ ຈະມີຄວາມສ່ຽງຕໍ່ການຕິດເຊື້ອສູງ.