ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ທ່ານ ເມົາ ຮາວານນັນ ລັດຖະມົນຕີປະຈຳສຳນັກງານເລຂາທິການການບິນພົນລະເຮືອນຂອງກຳປູເຈຍໄດ້ເປີດເຜີຍບົດລາຍງານໂດຍລະບຸວ່າ: ປະລິມານນັກເດີນທາງທາງຍົນ ມີ 4,11 ລ້ານຄົນໃນໄລຍະ 10 ເດືອນທຳອິດຂອງປີ 2023 ເພີ່ມຂຶ້ນ 144% ເມື່ອທຽບແບບລາຍປີ.

ທ່ານ ຮາວານນັນ ກ່າວວ່າ: ສາຍການບິນສາກົນ ແລະ ສາຍການບິນພາຍໃນປະເທດປະມານ 32 ແຫ່ງໃຫ້ບໍລິການຖ້ຽວບິນ 41.596 ຖ້ຽວ ສູ່ສະໜາມບິນສາກົນ 3 ແຫ່ງຂອງກຳປູເຈຍໃນໄລຍະເດືອນມັງກອນ-ຕຸລາ 2023 ເພີ່ມຂຶ້ນ 93% ເມື່ອທຽບແບບລາຍປີ. ທ່ານ ຮາວານນັນ ກ່າວຕື່ມວ່າ: ປັດຈຸບັນ, ກຳປູເຈຍມີຖ້ຽວບິນໂດຍກົງກັບ 8 ປະເທດສະມາຊິກອາຊຽນລວມເຖິງ ຈີນ, ສ ເກົາຫຼີ, ກາຕາ ແລະ ອື່ນໆ. ທ່ານ ຮາວານນັນ ກ່າວໃນລະຫວ່າງເຂົ້າຮ່ວມພິທີເປີດສະໜາມບິນສາກົນສຽມຣາດ ອັງກໍ (SAI) ວ່າ: ອຸດສາຫະກຳການບິນໃນກຳປູເຈຍຟື້ນຕົວໄດ້ຫຼາຍກວ່າ 55% ໃນພາບລວມ ເມື່ອທຽບກັບໄລຍະກ່ອນເກີດການແຜ່ລະບາດຂອງພະຍາດໂຄວິດ-19. ທ່ານ ຮາວານນັນ ຫວັງວ່າ ສະໜາມບິນແຫ່ງນີ້ ຊຶ່ງເປັນສະໜາມບິນທີ່ມີຂະໜາດໃຫຍ່ທີ່ສຸດຂອງກຳປູເຈຍໃນປັດຈຸບັນຈະຊ່ວຍດຶງດູດສາຍການບິນສາກົນ ແລະ ນັກເດີນທາງໜ້າໃໝ່ ໂດຍສະເພາະຈາກປະເທດຈີນມາຍັງແຂວງສຽມຣາດ ຊຶ່ງເປັນທີ່ຕັ້ງຂອງອຸທິຍານບູຮານຄະດີອັງກໍ.

ທ່ານ ຮາວານນັນ ຊີ້ໃຫ້ເຫັນວ່າ: ສະໜາມບິນສາກົນຈະຊ່ວຍກະຕຸ້ນການຂະຫຍາຍຕົວທາງດ້ານເສດຖະກິດຂອງກຳປູເຈຍ ສົ່ງເສີມການບິນ, ການທ່ອງທ່ຽວ ແລະ ການລົງທຶນຕະຫຼອດຈົນຮອດມີສ່ວນຊ່ວຍກຳຈັດຄວາມທຸກຍາກ ໂດຍກຳປູເຈຍໝັ້ນໃຈວ່າ ສະໜາມບິນສາກົນແຫ່ງນີ້ຈະກາຍເປັນຂົວເຊື່ອມຕໍ່ລະຫວ່າງກຳປູເຈຍກັບໂລກທີ່ກວ້າງໃຫຍ່ຂຶ້ນ.