ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ກ​ຊ​ສ) ວາງຄາດໝາຍ ໃນປີ 2025 ຈະອອກໃບຕາດິນໃຫ້ໄດ້ 500,000 ຕອນ, ເພື່ອໃຫ້ບັນລຸການອອກໃບຕາດິນທັງໝົດໃນທົ່ວປະເທດ ໃນຈໍານວນ 1.6 ລ້ານຕອນ, ແຕ່ໂຕເລກຄາດໝາຍອາດບໍ່ສາມາດບັນລຸໄດ້ເນື່ອງຈາກມີຫຼາຍສາເຫດ. ເຖິງຢ່າງໃດກໍຕາມ ກຊສ ຈະໄດ້ສືບຕໍ່ເອົາໃຈໃສ່ ໃນການກໍານົດວິທີການ ແລະ ມາດຕະການຊຸກຍູ້ການຈັດຕັ້ງປະຕິບັດ.

ທ່ານ ນາງ ບຸນຄຳ ວໍລະຈິດ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຊີ້ແຈງຕໍ່ຄຳຊັກຖາມ ຂອງບັນດາສະມາຊິກສະພາແຫ່ງຊາດ (ສສຊ) ໃນກອງປະຊຸມສະໄໝສາມັນ ເທື່ຶອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກນີ້, ພາຍໃຕ້ການເປັນ ປະທານ ຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.

ທ່ານ ນາງ ບຸນຄຳ ວໍລະຈິດ ກ່າວວ່າ: ການອອກໃບຕາດິນ ນັບແຕ່ປີ 2021 ຮອດເດືອນກັນຍາ 2024 ສາມາດຂຶ້ນທະບຽນອອກໃບຕາດິນໄດ້ ປະມານ 540,000 ກວ່າຕອນ ແລະ ຄາດຄະເນວ່າ ໝົດປີນີ້ ຈະສາມາດຂຶ້ນທະບຽນອອກໃບຕາດິນໃຫ້ໄດ້ 220,000 ຕອນ, ໃນຂະນະດຽວກັນການກຳນົດຄາດໝາຍ ອອກໃບຕາດິນໃນປີ 2025 ຈໍານວນ 500,000 ຕອນ ແມ່ນຄາດໝາຍເບື້ອງຕົ້ນ ທີ່ຈະໃຫ້ບັນລຸ ການອອກໃບຕາດິນທັງໝົດໃນທົ່ວປະເທດ ໃນຈໍານວນ 1.6 ລ້ານຕອນ ໃນປີ 2025. ແຕ່ອີງໃສ່ ການຈັດຕັ້ງປະຕິບັດຕົວຈິງ ເຫັນວ່າເລີ່ມແຕ່ການປະຕິບັດຄາດໝາຍ ການຂຶ້ນທະບຽນອອກໃບຕາດິນ ນັບແຕ່ປີ 2021-2024 ເຫັນວ່າບໍ່ສາມາດບັນລຸຄາດໝາຍທີ່ກຳນົດໄວ້, ອີງໃສ່ສະພາບຄວາມເປັນຈິງ ສະນັ້ນ, ຈຶ່ງເຫັນວ່າ ໃນປີ 2025 ການກໍານົດຄາດໝາຍ 500,000 ຕອນ ກໍອາດບໍ່ສາມາດບັນລຸໄດ້ ຍ້ອນມີຫຼາຍສາເຫດ. ແຕ່ເຖິງຢ່າງໃດກໍຕາມ ກຊສ ກໍຈະໄດ້ສືບຕໍ່ເອົາໃຈໃສ່ ໃນການກໍານົດວິທີການ ແລະ ມາດຕະການປະຕິບັດຊຸກຍູ້ການຈັດຕັ້ງປະຕິບັດ ມະຕິຂອງຄະນະປະຈຳສະພາແຫ່ງຊາດ ສະບັບເລກທີ 57/ຄຈປ, ຄໍາສັ່ງ ຂອງນາຍົກລັດຖະມົນຕີ ເລກທີ 20/ນຍ, ແຈ້ງການ ຂອງ ກຊສ ເລກທີ 4187/ກຊສ ກ່ຽວກັບ ການຮັບຮູ້ສິດ ການນໍາໃຊ້ທີ່ດິນ ໃນເຂດທີ່ດິນປ່າໄມ້ ແລະ ຂໍ້ຕົກລົງ ຂອງ ກຊສ ເລກທີ 4186/ກຊສ ວ່າດ້ວຍການກໍານົດ ເນື້ອໃນໃນແບບພິມ ແລະ ການພິມຕາມແບບພິມ ໃບທະບຽນຢັ້ງຢືນການນໍາໃຊ້ທີ່ດິນ ແລະ ໃບຢັ້ງຢືນການນໍາໃຊ້ທີ່ດິນ ໃນເຂດທີ່ດິນປ່າໄມ້, ຊຸກຍູ້ການມອບວຽກຂຶ້ນທະບຽນອອກໃບຕາດິນໃຫ້ເມືອງ ໃຫ້ສຳເລັດໃນທົ່ວປະເທດ, ໄປພ້ອມກັບການຈັດສັນພະນັກງານ ແລະ ສ້າງຄວາມເຂັ້ມແຂງໃຫ້ພະນັກງານຂັ້ນເມືອງ, ຮ່ວມກັບກະຊວງກະສິກຳ ແລະ ປ່າໄມ້ ໃນການຈັດສັນທີ່ດິນກະສິກຳ ແລະ ດິນປ່າໄມ້ ຕາມບົດບັນທຶກທີ່ໄດ້ເຊັນກັນ, ຊຸກຍູ້ ແລະ ຮ່ວມມືກັບກະຊວງໂຍທາທິການ ແລະ ຂົນສົ່ງ ໃນການກຳນົດເຂດສະຫງວນ ໂດຍສອດຄ່ອງກັບແຜນແມ່ບົດຈັດສັນທີ່ດິນແຫ່ງຊາດ ແລະ ແຜນຈັດສັນທີ່ດິນ ແລະ ຄຸ້ມຄອງສິ່ງແວດລ້ອມຂັ້ນທ້ອງຖິ່ນ ເພື່ອເປັນບ່ອນອີງໃນການອອກໃບຕາດິນ,ຊຸກຍູ້ໃຫ້ແຕ່ລະທ້ອງຖິ່ນກວດກາການປະຕິບັດໜ້າທີ່ ຂອງຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ຂັ້ນເມືອງ ລົງສໍາຫຼວດ ວັດແທກ ແລະ ເຊັນໃບຕາດິນສໍາເລັດ ພາຍໃນ 50 ວັນ ຕາມກົດໝາຍ, ສົມທົບກັບອົງການປົກຄອງທ້ອງຖິ່ນ ໃນການປະກອບພະນັກງານ ໃນຂັ້ນເມືອງໃຫ້ພຽງພໍ, ແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ ທີ່ເຮັດວຽກກ່ຽວກັບທີ່ດິນ, ເລັ່ງປັບປຸງລະບົບຫັນເປັນທັນສະໄໝໃນວຽກງານຄຸ້ມຄອງທີ່ດິນ ໃຫ້ສຳເລັດໂດຍໄວ ແລະ ການປັບປຸງເຂດປະເມີນລາຄາທີ່ດິນ ເພື່ອສາມາດເປັນຖານຂໍ້ມູນ ໃນການເກັບລາຍຮັບໃຫ້ແກ່ລັດຖະບານ ແລະ ວຽກງານອອກໃບຕາດິນເປັນລະບົບ,

ໃນຂະນະດຽວກັນ ຊຸກຍູ້ ພຊສ ແຂວງ ແລະ ຫ້ອງການ ຊສ ເມືອງ ຈຳນວນ 32 ເມືອງ ໃຫ້ ກວດກາສໍານວນ ແລະ ພິສູດຫຼັກຖານ ແລະ ນໍາເອົາຂໍ້ມູນຕອນດິນເຂົ້າຖານຂໍ້ມູນທີ່ດິນ ທີ່ໄດ້ສໍາຫຼວດແລ້ວ ແລະ ຍັງຄ້າງເຊັນໃບຕາດິນ ປະມານ 100,000 ຕອນ ແລະ ການມອບວຽກໃຫ້ ຫ້ອງການ ຊສ ເມືອງ ເຊັນໃບຕາດິນ ຕາມແບບຟອມ ໃບຕາດິນໃໝ່ (A), ສຸມໃສ່ການປະຕິບັດລະບຽບການ ໃນການຂຶ້ນທະບຽນອອກໃບຕາດິນໃຫ້ໄດ້ ພາຍໃນ 50 ວັນໃຫ້ເປັນຮູບປະທຳ, ປັບປຸງໜ່ວຍງານໂຄງການໃນການຂຶ້ນທະບຽນອອກໃບຕາດິນຂັ້ນເມືອງຄື: ກວດກາ ແລະ ຍຸບໂຮມໜ່ວຍງານຂຶ້ນທະບຽນອອກໃບຕາດິນ ຈໍານວນ 32 ເມືອງ ຈາກ 5 ຈຸງານ ໃຫ້ເຫຼືອ 3 ຈຸງານ ເພື່ອໃຫ້ກະທັດຮັດ ແລະ ສາມາດເຄື່ອນໄຫວໄດ້ຄ່ອງແຄ້ວ ແລະ ສອດຄ່ອງກັບ ສະພາບການຂາດແຄນພະນັກງານ ແລະ ປິດ ເມືອງທີ່ສໍາເລັດການນອອກໃບຕາດິນແລ້ວ 6 ເມືອງ ແລະ ຍົກຍ້າຍ 6 ໜ່ວຍງານທີ່ປິດແລ້ວ ໄປ 6 ເມືອງໃໝ່,ຂະຫຍາຍ ໜ່ວຍງານຂຶ້ນທະບຽນອອກໃບຕາດິນ ຕື່ມ ອີກ 18 ເມືອງ ພ້ອມທັງ ທົດລອງໃຫ້ ພາກເອກະ ຊົນ (ບໍລິສັດ) ເຂົ້າມາໃຫ້ບໍລິການ ໃນການສໍາຫຼວດ-ວັດແທກຕອນດິນ ໃນການຂຶ້ນທະບຽນອອກໃບ ຕາດິນໃນ 10 ເມືອງ, ຝຶກອົບຮົມ ແລະ ຍົກປະສິດທິພາບ ຂອງໜ່ວຍງານຂຶ້ນທະບຽນອອກໃບຕາດິນໃນ 50 ເມືອງ ໃຫ້ສາມາດ ສໍາຫຼວດ-ວັດແທກທີ່ດິນ ໃຫ້ໄດ້ 6-10 ຕອນຕໍ່ວັນ, ສ້າງຄວາມສາມາດ ແລະ ຝຶກອົບຮົມ ຫ້ອງການ ຊສ ເມືອງ ຈຳນວນ 98 ເມືອງ ໃຫ້ສາມາດນໍາໃຊ້ງົບປະມານລາຍຮັບວິຊາການ ໃນການຂຶ້ນທະບຽນອອກໃບຕາດິນ.

(ຂ່າວ-ພາບ: ສຳນານ)