ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 22 ພະຈິກ ຜ່ານມາ, ທະນາຄານໂລກ (WB) ປະຈຳຫວຽດນາມ ໄດ້ປະກາດບົດລາຍງານສະພາບການເສດຖະກິດມະຫາພາກຂອງ ຫວຽດນາມ ໃນເດືອນຕຸລາ 2023.

ຕາມບົດລາຍງານຂອງ WB, ຕໍ່ກັບສະພາບການການຂາດສະຖຽນລະພາບທົ່ວໂລກ, ເງິນລົງທຶນຈາກຕ່າງປະເທດ (FDI) ໃນ 10 ເດືອນຜ່ານມາຂອງ ຫວຽດນາມ ບັນລຸໄດ້ 25,7 ຕື້ໂດລາ, ສູງກວ່າ 14,7% ເມື່ອທຽບໃສ່ໄລຍະດຽວກັນຂອງປີ 2022. ບັນລຸໄດ້ຜົນງານດັ່ງກ່າວແມ່ນຍ້ອນຄວາມໄວ້ເນື້ອເຊື່ອໃຈຂອງບັນດານັກລົງທຶນຕ່າງປະເທດ ທີ່ມີຕໍ່ຄວາມສະຖຽນລະພາບ ແລະ ການເປີດປະຕູຂອງ ຫວຽດນາມ.

WB ໃຫ້ຂໍ້ສັງເກດວ່າ, ການຜະລິດອຸດສາຫະກຳສືບຕໍ່ແມ່ນຂົງເຂດດຶງດູດ FDI ຕົ້ນຕໍເຂົ້າ ຫວຽດນາມ ແລະ ຂົງເຂດນີ້ສືບຕໍ່ໄດ້ຮັບການປັບປຸງ. ລະອຽດແມ່ນ, ດັດຊະນີຜະລິດອຸດສາຫະກຳ (IIP) ໃນແຕ່ລະເດືອນເລີ່ມເຕີບໂຕເປັນບວກນັບແຕ່ເດືອນເມສາ.

ມີດັດຊະນີອື່ນທີ່ໜ້າສົນໃຈຊຶ່ງ WB ໄດ້ສະຖິຕິໃນບົດລາຍງານຄັ້ງນີ້. ນັ້ນແມ່ນລະດັບການເຕີບໂຕຂອງການຂາຍຍ່ອຍເດືອນຕຸລາ ເພີ່ມຂຶ້ນ 0,01% ເມື່ອທຽບໃສ່ເດືອນກັນຍາ. ການສົ່ງອອກ - ນຳເຂົ້າສິນຄ້າຂອງເດືອນຕຸລາ ສືບຕໍ່ຟື້ນຟູ ເພື່ອແນໃສ່ຕອບສະໜອງຄວາມຕ້ອງການພາຍນອກ, ທຽບກັບການເພີ່ມຂຶ້ນແມ່ນ 1,6% ເມື່ອທຽບໃສ່ເດືອນກັນຍາ.