ຂ່າວສານຊີອາໄອລາຍງານ ເມື່ອບໍ່ດົນມານີ້, ກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີ-ປາຊີຟິກ (APEC) ຄັ້ງທີ 30 ໄດ້ຈັດຂຶ້ນຢູ່ນະຄອນຊານຟຣານຊິສໂກ ສະຫະລັດອາເມຣິກາ. ກອງປະຊຸມບໍ່ເປັນທາງການໃນຄັ້ງນີ້ເປັນການຮ່ວມປະຊຸມກັນເປັນຄັ້ງທີ 30 ຂອງຜູ້ນຳອົງການຮ່ວມມືເສດຖະກິດອາຊີ-ປາຊີຟິກ ແລະ ມີຄວາມໝາຍສຳຄັນເປັນພິເສດ.

ໃນຮອບ 30 ປີຜ່ານມາ, ການເປີດປະຕູສູ່ພາຍນອກ ແລະ ຄວາມກວມລວມ ເປັນກະແສຕົ້ນຕໍຂອງການຮ່ວມມືອາຊີ-ປາຊີຟິກ. ໃນ 30 ປີມານີ້, ການຮ່ວມມືລະຫວ່າງກຸ່ມເສດຖະກິດຕ່າງໆໃນພາກພື້ນອາຊີ-ປາຊີຟິກໄດ້ເດີນຢູ່ແຖວໜ້າຂອງການເປີດກວ້າງ ແລະ ການພັດທະນາຂອງທົ່ວໂລກ, ການຄ້າ ແລະ ການລົງທຶນພາຍໃນພາກພື້ນໄດ້ບັນລຸເສລີພາບ ແລະ ຄວາມສະດວກສະບາຍ, ເສດຖະກິດ ແລະ ເຕັກໂນໂລຊີໄດ້ພັດທະນາດ້ວຍຄວາມໄວສູງ, ມີການໄປມາຫາສູ່ກັນດ້ານບຸກຄະລາກອນ ແລະ ການແລກປ່ຽນກັນດ້ານວັດຖຸສິນຄ້າເປັນຈຳນວນຫຼວງຫຼາຍ, ລະດັບພາສີສະເລ່ຍໃນພາກພື້ນອາຊີ-ປາຊີຟິກໄດ້ຫຼຸດລົງຈາກ 17% ມາເປັນ 5%, ອັດຕາປະກອບສ່ວນຕໍ່ການເຕີບໂຕຂອງເສດຖະກິດໂລກບັນລຸເຖິງ 70% ຊຶ່ງເປັນການສ້າງ “ຄວາມມະຫັດສະຈັນຂອງອາຊີ-ປາຊີຟິກ” ທີ່ປະຈັກຕາຊາວໂລກ. ໃນຊຸມປີຜ່ານມານີ້, ກະແສແນວຄິດຝືນໂລກາພິວັດໄດ້ຟື້ນຕົວຄືນໃໝ່ຢ່າງບໍ່ຢຸດຢັ້ງ, ລັດທິຝ່າຍດຽວ ແລະ ລັດທິປົກປ້ອງຍົກສູງຂຶ້ນຢ່າງຈະແຈ້ງ, ບັນຫາສິ່ງແວດລ້ອມຮ້າຍແຮງຂຶ້ນຢ່າງບໍ່ຢຸດຢັ້ງ, ຄວາມແຕກໂຕນກັນລະຫວ່າງຄົນຮັ່ງມີ ແລະ ຄົນທຸກຍາກນັບມື້ນັບຫຼາຍຂຶ້ນ. ໂລກໃນປັດຈຸບັນໄດ້ເຂົ້າສູ່ໄລຍະພັດທະນາອັນໃຫຍ່ຫຼວງ, ມີການປ່ຽນແປງ ແລະ ປັບຕົວຢ່າງໃຫຍ່ຫຼວງ, ຄວາມບໍ່ໝັ້ນທ່ຽງ ແລະ ຄວາມບໍ່ແນ່ນອນຂອງການພັດທະນາຂອງໂລກນັບມື້ນັບພົ້ນເດັ່ນກວ່າເກົ່າ. ສະນັ້ນ, ໃນຖານະເປັນກຳລັງຂັບເຄື່ອນຂອງການພັດທະນາຂອງທົ່ວໂລກ, ພາກພື້ນອາຊີ-ປາຊີຟິກຈະແບກຫາບຄວາມຮັບຜິດຊອບແຫ່ງຍຸກສະໄໝໃຫ້ຫຼາຍກວ່າເກົ່າ.

ຈະສ້າງ “3 ທົດສະວັດຄຳ” ແຫ່ງການຮ່ວມມືອາຊີ-ປາຊີຟິກຕໍ່ໄປແນວໃດ? ໃນກອງປະຊຸມບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີ-ປາຊີຟິກຄັ້ງທີ 30 ໂດຍທ່ານ ສີຈິ້ນຜິງ ປະທານປະເທດຈີນໄດ້ສະເໜີຂໍ້ລິເລີ່ມຂອງຕົນຄື: ຢຶດໝັ້ນການຂັບເຄື່ອນດ້ວຍການປະດິດສ້າງໃໝ່, ຢຶດໝັ້ນການເປີດປະຕູສູ່ພາຍນອກເປັນທິດທາງການນຳພາ, ຢຶດໝັ້ນການພັດທະນາແບບສີຂຽວ ແລະ ຢຶດໝັ້ນການສ້າງຜົນປະໂຫຍດທົ່ວເຖິງ ແລະ ຊົມໃຊ້ຮ່ວມກັນ. ບັນດາຝ່າຍຄວນຢຶດໝັ້ນອຸດົມການແຕ່ຫົວທີຂອງການຮ່ວມມືອາຊີ-ປາຊີຟິກ, ຕອບຮັບຄວາມຮຽກຮ້ອງຂອງຍຸກສະໄໝດ້ວຍນ້ຳໃຈຮັບຜິດຊອບ, ຮ່ວມມືກັນຮັບມືກັບສິ່ງທ້າທາຍທີ່ມີລັກສະນະທົ່ວໂລກ, ຈັດຕັ້ງປະຕິບັດວິໄສທັດປູຕຣາຈາຢາຢ່າງຮອບດ້ານ, ສ້າງປະຊາຄົມອາຊີ-ປາຊີຟິກທີ່ເປີດກວ້າງ, ມີຊີວິດຊີວາ, ໜຽວແໜ້ນ ແລະ ສັນຕິພາບ, ບັນລຸຄວາມຈະເລີນຮ່ວມກັນຂອງປະຊາຊົນ ແລະ ລູກຫຼານຂອງພາກພື້ນອາຊີ-ປາຊີຟິກ.

ດັ່ງທີ່ ທ່ານ ສີຈິ້ນຜິງ ເວົ້າວ່າ: ປະຫວັດສາດໜ້າໃໝ່ແຫ່ງ “ຄວາມມະຫັດສະຈັນອາຊີ-ປາຊີຟິກ” ຕ້ອງໃຫ້ບັນດາຝ່າຍຂຽນຮ່ວມກັນ. ຝ່າຍຕ່າງໆຂອງອາຊີ-ປາຊີຟິກມີແຕ່ຮ່ວມມືກັນ ແລະ ອອກເດີນທາງອີກຄັ້ງໃໝ່ຈາກຈຸດເລີ່ມໃໝ່ ຈຶ່ງຈະສາມາດສ້າງ “3 ທົດສະວັດຄຳ” ຂອງພາກພື້ນອາຊີປາຊີຟິກຕໍ່ໄປໄດ້.