ຂ່າວສານຊີອາໄອລາຍງານ ເມື່ອບໍ່ດົນມານີ້, ເຈົ້າໜ້າທີ່ສຳນັກງານເລຂາແຫ່ງລັດດ້ານວຽກງານການບິນພົນລະເຮືອນກຳປູເຈຍເປີດເຜີຍໃຫ້ຮູ້ວ່າ: ກຳປູເຈຍພວມກໍ່ສ້າງສະໜາມບິນ 2 ແຫ່ງ, ຂະນະດຽວກັນຍັງມີແຜນຈະກໍ່ສ້າງສະໜາມບິນໃໝ່ອີກ 2 ແຫ່ງ ເພື່ອຍົກສູງຄວາມສາມາດດ້ານການບິນພົນລະເຮືອນໃຫ້ເຊື່ອມຕໍ່ກັບບັນດາແຫຼ່ງທ່ອງທ່ຽວຢູ່ກຳປູເຈຍ.

ເຈົ້າໜ້າທີ່ທ່ານນີ້ກ່າວຕື່ມວ່າ: ກຳປູເຈຍມີແຜນຈະກໍ່ສ້າງສະໜາມບິນໃໝ່ 2 ແຫ່ງຢູ່ແຂວງມົນດຸນຄີຣິ ແລະ ເກາະໂກຣົງ ຂອງແຂວງໂນໂຣດົມ ສີຫະນຸ, ນີ້ແມ່ນແຜນການກະຕຸ້ນການພັດທະນາການທ່ອງທ່ຽວຂອງລັດຖະບານ. ຕາມຂ່າວແຈ້ງໃຫ້ຮູ້ວ່າ: ສະໜາມບິນສາກົນພະນົມເປັນໃໝ່ກຳປູເຈຍ ຫຼືສະໜາມບິນສາກົນເຕໂຈທີ່ພວມກໍ່ສ້າງຢູ່ແມ່ນຮັບເໝົາໂດຍ ບໍລິສັດຈີນ ຊຶ່ງຄາດວ່າຈະສຳເລັດການກໍ່ສ້າງໃນປີ 2024. ສະໜາມບິນອີກແຫ່ງໜຶ່ງທີ່ພວມກໍ່ສ້າງແມ່ນສະໜາມບິນສາກົນດາຣາ ສະເກີ ຢູ່ແຂວງກອນກົງ ກຳປູເຈຍ, ໂຄງການນີ້ມີມູນຄ່າກໍ່ສ້າງ 200 ລ້ານໂດລາ, ຮັບເໝົາກໍ່ສ້າງໂດຍບໍລິສັດຈີນ, ມາຮອດປັດຈຸບັນແມ່ນເຂົ້າສູ່ຂັ້ນຕອນສຸດທ້າຍແລ້ວ.