ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ຮ່ວມກັບກຸ່ມບໍລິສັດກໍ່ສ້າງ ແຂວງຫູເປີຍ ໄດ້ຈັດພິທີມອບ-ຮັບສູນກິດຈະກຳຄົບວົງຈອນ ຊາວໜຸ່ມລາວ-ຈີນ ຂຶ້ນຢ່າງເປັນທາງການ ໃນວັນທີ 23 ພະຈິກນີ້ ທີ່ບ້ານໂນນສະອາດ ເມືອງໄຊທານີ ນະຄອນຫຼວງວຽງຈັນ ເປັນກຽດເຂົ້າຮ່ວມຕັດແຖບຜ້າ ໂດຍມີທ່ານ ອາລຸນໄຊສູນນະລາດ ກຳມະການສູນກາງພັກລັດຖະມົນຕີຫົວໜ້າຫ້ອງວ່າການສຳນັກງານນາຍົກລັດຖະມົນຕີ,ທ່ານ ມອນໄຊ ລາວມົວຊົ່ງ ກຳມະການສຳຮອງສູນກາງພັກ ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ,ທ່ານ ໄຊຊະນະ ສິດທິພອນ ຮອງປະທານຜູ້ປະຈຳການ ຄະນະກຳມະການຮ່ວມມືລາວ-ຈີນກະຊວງແຜນການ ແລະ ການລົງທຶນຮອງປະທານຜູ້ປະຈຳການ ຄະນະກຳມະການຮ່ວມມືລາວ-ຈີນ, ທ່ານ ຫວາງຊ່າງ ອຸປະທູດ ສປ ຈີນ ປະຈຳ ສປປ ລາວ; ທ່ານ ຕິ່ງ ຈຸ້ນ ປະທານ ກຸ່ມບໍລິສັດ ອຸດສາຫະກຳກໍ່ສ້າງ ແຂວງຫູເປີຍຈຳກັດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ນວນທອງ ສຸວັນວິໄຊ ຮອງເລຂາຄະນະບໍລິຫານງານ ສຊປລ ໄດ້ລາຍງານໃຫ້ຮູ້ວ່າ: ສຊປລ ມີແນວຄວາມຄິດສ້າງສູນກິດຈະກຳ ເພື່ອເປັນບ່ອນສຶກສາອົບຮົມ ແລະ ເປັນບ່ອນສ້າງກິດຈະກຳຕ່າງໆຂອງຊາວໜຸ່ມ-ເຍົາວະຊົນບັນດາເຜົ່າ, ແນໃສ່ໃຫ້ເຫັນເຖິງໄພອັນຕະລາຍຂອງຢາເສບຕິດ ແລະ ເຮັດໃຫ້ຊາວໜຸ່ມໃຊ້ເວລາວ່າງໃຫ້ເປັນປະໂຫຍດ.ໃນປີ 2014 ລັດຖະບານແຫ່ງ ສປປ ລາວ ໄດ້ເຊັນສັນຍາຮັບໂຄງການຊ່ວຍເຫຼືອຈາກລັດຖະບານ ສປ ຈີນ ເປັນຈຳນວນ 9 ໂຄງການຊຶ່ງໜຶ່ງໃນນັ້ນແມ່ນໂຄງການສ້າງສູນກິດຈະກຳຊາວໜຸ່ມ-ເຍົາວະຊົນລາວ, ຈາກນັ້ນ ໃນທ້າຍປີ 2015 ກະຊວງການຄ້າ ສປຈີນ ໄດ້ແຕ່ງຕັ້ງຄະນະຊ່ຽວຊານ ມາເຮັດວຽກກັບ ສຊປລ ເພື່ອມາສຶກສາຄວາມເປັນໄປໄດ້ໂຄງການສ້າງສູນກິດຈະກຳຂອງຊາວໜຸ່ມ-ເຍົາວະຊົນລາວ, ຜ່ານການສຶກສາເອົາຂໍ້ມູນ ແລະ ເຮັດວຽກນໍາຜູ້ຮັບຜິດຊອບເບື້ອງຕົ້ນຂອງ ສຊປລ ໃນການສະໜອງຂໍ້ມູນຕ່າງໆ, ສປ ຈີນ ຈຶ່ງຕົກລົງເຫັນດີ ຊ່ວຍເຫຼືອສ້າງສູນດັ່ງກ່າວ ໃນມູນຄ່າກໍ່ສ້າງທັງໝົດ 72.060.000 ຢວນ (ສະກຸນເງິນ ສປ ຈີນ), ໃນນີ້ລວມມີ, ຄ່າເກັບກຳຂໍ້ມູນ 500.000 ຢວນ, ຄ່າສໍາຫຼວດ 900.000 ຢວນ, ຄ່າອອກແບບ 4.800.000 ຢວນ ແລະ ມູນຄ່າກໍ່ສ້າງຕຶກ65.860.000 ຢວນ.ໂຄງການກໍ່ສ້າງໄດ້ວາງສີລາລືກໃນວັນທີ 28 ທັນວາ 2020 ແລະ ກຳນົດເວລາກໍ່ສ້າງແມ່ນ 2 ປີ. ໃນວັນທີ 19 ກັນຍາ 2023 ໄດ້ມີການກວດກາສຳເລັດ 100%

ທ່ານ ໂຈ່ຈຸ່ນ ຮອງຜູ້ຈັດການ ກຸ່ມບໍລິສັດ ກໍ່ສ້າງອຸດສາຫະກຳ ແຂວງຫູເປີຍ ຈຳກັດໄດ້ກ່າວວ່າ: ໃນການມອບ-ຮັບໂຄງການສູນກິດຈະກຳຄົບວົງຈອນ ສູນກາງຊາວໜຸ່ມລາວຢ່າງເປັນທາງການ ໃນໄລຍະການກໍ່ສ້າງ ໂຄງການຊ່ວຍເຫຼືອລາວ ພວກເຮົາໄດ້ຢຶດໝັ້ນຕາມຫຼັກການ ຄຸນນະພາບສູງ, ປະສິດທິພາບສູງ ແລະ ມາດຕະຖານສູງເປົ້າໝາຍກໍເພື່ອເຮັດໃຫ້ການກໍ່ສ້າງໂຄງການຊ່ວຍເຫຼືອປະເທດລາວກາຍເປັນສັນຍາລັກອັນພົົ້ນເດັ່ນຂອງການຊ່ວຍເຫຼືອຈີນຕໍ່ຕ່າງປະເທດ.

ທ່ານ ຫວາງຊ່າງ ໄດ້ກ່າວວ່າ: ໃນການມອບ-ຮັບໂຄງການສູນກິດຈະກໍາຄົບວົງຈອນສູນກາງຊາວໜຸ່ມລາວ ຢ່າງເປັນທາງການ, ໂຄງການນີ້ຊຶ່ງເປັນການປະກອບສ່ວນອັນສໍາຄັນໃນການສ້າງສາສາຍພົວພັນມິດຕະພາບລະຫວ່າງສອງຊາດຈີນ ແລະ ລາວ. ບໍລິສັດຮ່ວມລົງທຶນຫູເປີຍ ໃນນາມທີ່ເປັນໜຶ່ງໃນ 500 ບໍລິສັດທີ່ເຂັ້ມແຂງຂອງ ສປ ຈີນ, ພວກເຮົາມີທ່າແຮງພິເສດ ທີ່ແບ່ງເປັນ 3 ຂັ້ນຫົວໜ່ວຍທີ່ປະສານໄປນໍາກັນ, ມີກິດຈະການທີ່ຫຼາກຫຼາຍຮ່ວມກັນ, ມີການພັດທະນາແບບປະສົມປະສານລະຫວ່າງການຜະລິດ ແລະການພັດທະນາຕົວເມືອງ, ມີການດໍາເນີນທຸລະກິດແບບຮອບວຽນຄົບຖ້ວນ. ບໍລິສັດອຸດສາຫະກໍາ-ກໍ່ສ້າງແຂວງຫູເປີຍ ທີ່ເປັນໜ່ວຍງານຮັບເໝົາກໍ່ສ້າງໂຄງການໃນຄັ້ງນີ້ ຖືເປັນກໍາລັງຫຼັກຂອງບໍລິສັດຮ່ວມລົງທຶນຫູເປີຍ ໃນຂົງເຂດວຽກງານຮັບເໝົາໂຄງການວິສະວະກໍາການກໍ່ສ້າງ ຊຶ່ງໄດ້ຮັບເໝົາກໍ່ສ້າງໂຄງການຕ່າງໆ ຢູ່ຫຼາຍກວ່າ 20 ປະເທດ ແລະພາກພື້ນ, ມີຫຼາຍໂຄງການໄດ້ກາຍເປັນສັນຍາລັກຂອງພື້ນທີ່ເຫຼົ່ານັ້ນ. ໃນໄລຍະການກໍ່ສ້າງ ໂຄງການຊ່ວຍເຫຼືອຂອງລາວ, ພວກເຮົາແມ່ນຢຶດໝັ້ນຕາມຫຼັກການ ຄຸນນະພາບສູງ, ປະສິດທິພາບສູງ ແລະມາດຕະຖານທີ່ສູງ, ເປົ້າໝາຍກໍເພື່ອເຮັດໃຫ້ການກໍ່ສ້າງໂຄງການຊ່ວຍເຫຼືອປະເທດລາວ ກາຍເປັນສັນຍາຫຼັກອັນພົ້ນເດັ່ນຂອງການຊ່ວຍເຫຼືອຈີນຕໍ່ຕ່າງປະເທດ.

ຈາກນັ້ນ, ທ່ານ ມອນໄຊ ລາວມົວຊົ່ງ ໄດ້ກ່າວວ່າ: ສູນກິດຈະກຳຄົບວົງຈອນ ຊາວໜຸ່ມ-ເຍົາວະຊົນ ສ້າງຂຶ້ນເພື່ອເປັນບ່ອນເຕົ້າໂຮມຄວາມສາມັກຄີ, ສຶກສາອົບຮົມປູກຈິດສໍານຶກທີ່ດີ ແລະ ເປັນບ່ອນສ້າງກິດຈະກໍາຕ່າງໆ ຂອງຊາວໜຸ່ມ-ເຍົາວະຊົນ ບັນດາເຜົ່າທີ່ເປັນຜູ້ສືບທອດ ເປັນໜໍ່ແໜງຂອງປະເທດຊາດ, ແນໃສ່ໃຫ້ເຫັນເຖິງໄພອັນຕະລາຍຂອງຢາເສບຕິດ ແລະ ເຮັດໃຫ້ຊາວໜຸ່ມ-ເຍົາວະຊົນ ໄດ້ນໍາໃຊ້ເວລາວ່າງໃຫ້ເປັນປະໂຫຍດ. ຍ້ອນເຫັນໄດ້ເຖິງຄວາມສຳຄັນດັ່ງກ່າວ ພັກ ແລະ ລັດຖະບານຂອງ ສປປ ລາວ ແລະ ໂດຍໄດ້ຮັບການຊ່ວຍເຫຼືອຢ່າງຈິງໃຈ ຂອງລັດຖະບານ ສປ ຈີນ ຜ່ານສະຖານທູດ ສປ ຈີນ ປະຈຳ ລາວ ໄດ້ມີຄວາມເອົາໃຈໃສ່, ອຳນວຍຄວາມສະດວກ ພ້ອມທັງຊຸກຍູ້ໃຫ້ກຸ່ມບໍລິສັດ ອຸດສາຫະກຳກໍ່ສ້າງ ແຂວງຫູເປີຍຈຳກັດ ໄດ້ສຸມໃສ່ການກໍ່ສ້າງໂຄງການສູນກິດຈະກຳຄົບວົງຈອນ ຊາວໜຸ່ມ-ເຍົາວະຊົນ ຈົນສຳເລັດຮ້ອຍສ່ວນຮ້ອຍ ຕາມແຜນການທີ່ວາງໄວ້. ເພື່ອເຮັດໃຫ້ສູນກິດຈະກຳຄົບວົງຈອນ ຊາວໜຸ່ມ-ເຍົາວະຊົນ ດັ່ງກ່າວນີ້ ທີ່ເປັນດັ່ງສັນຍາລັກຂອງໄມຕີຈິດ ມິດຕະພາບລະຫວ່າງສອງພັກ ສອງລັດ, ອົງການຈັດຕັ້ງຊາວໜຸ່ມ ກໍຄືປະຊາຊົນ ສອງຊາດລາວ-ຈີນ, ຈີນ-ລາວ. ສູນກິດຈະກຳຄົບວົງຈອນ ຊາວໜຸ່ມ-ເຍົາວະຊົນ ທີ່ຈະມາຮັບຜິດຊອບໃນຕໍ່ໜ້ານີ້ ໃຫ້ມີຄວາມເອົາໃຈໃສ່, ປົກປັກຮັກ ແລະ ນຳໃຊ້ເຂົ້າໃນການພັດທະນາວຽກງານຊາວໜຸ່ມ-ເຍົາວະຊົນ ຢ່າງມີປະສິດທິຜົນສູງ ແລະ ໃຫ້ມີຄວາມຍືນຍົງ ໃຫ້ສົມກັບການລົງທຶນອັນມະຫາສານ ທີ່ທັງສອງພັກ ສອງລັດ ໄດ້ລົງທຶນໃຫ້ສູນກາງຊາວໜຸ່ມປະຊາຊົນປະຕິວັດລາວ ຂອງພວກເຮົາ ກໍຄື ຊາວໜຸ່ມ-ເຍົາວະຊົນລາວ ບັນດາເຜົ່າໃນຂອບເຂດທົ່ວປະເທດ ໃຫ້ໄດ້ມີບ່ອນຮຽນຮູ້, ຝຶກຝົນຫຼໍ່ຫຼອມຕົນເອງ ກາຍເປັນຜູ້ສືບທອດທີ່ດີ ຂອງປະເທດຊາດໃນອະນາຄົດ.

ໃນໂອກາດນີ້, ທ່ານ ຈ້າວ ເວັນຢູ ທີ່ປຶກສາທູດເສດຖະກິດ-ການຄ້າ ສະຖານທູດຈີນ ປະຈຳ ສປປ ລາວໄດ້ເຊັນມອບ ແລະ ເຊັນຮັບໂດຍທ່ານ ມອນໄຊ ລາວມົວຊົ່ງ.

(ຂ່າວ-ພາບ: ບຸນຕອມ)