ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 22 ພະຈິກ ຜ່ານມາ ຢູ່ນະຄອນຫຼວງປາຣີ ປະເທດ ຝຣັ່ງ, ໃນຂອບເຂດກອງປະຊຸມສະມັດຊາໃຫຍ່ ຄັ້ງທີ 24 ຂອງບັນດາປະເທດສະມາຊິກ ສົນທິສັນຍາອະນຸລັກຮັກສາມໍລະດົກວັດທະນະທຳ ແລະ ທຳມະຊາດໂລກ (ສົນທິສັນຍາມໍລະດົກໂລກ), ຫວຽດນາມ ໄດ້ຮັບເລືອກຕັ້ງເປັນສະມາຊິກຂອງຄະນະກຳມະການມໍລະດົກໂລກ ອາຍຸການ 2023 – 2027, ໜຶ່ງໃນບັນດາອົງການບໍລິຫານສຳຄັນທີ່ສຸດຂອງ ອົງການວິທະຍາສາດ, ການສຶກສາ ແລະ ວັດທະນະທຳຂອງ ສປຊ (UNESCO).
ຂ່າວລະບຸວ່າ: ດ້ວຍຈຳນວນບັດເຫັນດີ 121 ບັດ, ນີ້ແມ່ນຄັ້ງທີ 2 ທີ່ ຫວຽດນາມ ສືບຕໍ່ໄດ້ຮັບການເລືອກຕັ້ງເປັນສະມາຊິກ ຄະນະກຳມະການມໍລະດົກໂລກ, ນັບແຕ່ປີ 2013 ເປັນຕົ້ນມາ. ທ່ານ ຮ່າກິມງອກ ຮອງລັດຖະມົນຕີ ກະຊວງການຕ່າງປະເທດ ຫວຽດນາມ ປະທານຄະນະກຳມະການ UNESCO ແຫ່ງຊາດ ຫວຽດນາມ ຫົວໜ້າຄະນະຜູ້ແທນຫວຽດນາມ ທີ່ເຂົ້າຮ່ວມກອງປະຊຸມດັ່ງກ່າວ ໃຫ້ຮູ້ວ່າ: ໝາກຜົນນີ້ແມ່ນການຕີລາຄາສູງ, ການສະໜັບສະໜູນ ແລະ ຄວາມໄວ້ວາງໃຈຂອງປະຊາຄົມສາກົນທີ່ມີຕໍ່ ຫວຽດນາມ. UNESCO ໄດ້ຕີລາຄາສູງຄວາມພະຍາຍາມໃນການບໍລິຫານ, ການປະກອບສ່ວນຂອງ ຫວຽດນາມ ຢູ່ບັນດາເວທີປາໄສຫຼາຍຝ່າຍກໍຄືບັນດາການປະກອບສ່ວນຢ່າງແທດຈິງ ແລະ ມີປະສິດທິຜົນຂອງ ຫວຽດນາມ ໃນການຊຸກຍູ້ບັນດາເນື້ອໃນບຸລິມະສິດຂອງ UNESCO. ໂດຍສະເພາະແມ່ນໃນການອະນຸລັກຮັກສາ ແລະ ເສີມຂະຫຍາຍບັນດາມໍລະດົກໂລກ ຢູ່ ຫວຽດນາມ ແລະ ຢູ່ບັນດາປະເທດອື່ນ. ນີ້ແມ່ນຄັ້ງທຳອິດທີ່ ຫວຽດນາມ ເປັນສະມາຊິກຂອງ 5 ອົງການບໍລິຫານງານສຳຄັນທີ່ສຸດຂອງ UNESCO. ສິ່ງດັ່ງກ່າວໄດ້ສະແດງໃຫ້ເຫັນທີ່ຕັ້ງບົດບາດ, ອິດທິພົນຊື່ສຽງ ຂອງ ຫວຽດນາມ ຕໍ່ກັບປະຊາຄົມສາກົນ.