ສູນວັດທະນະທຳຈີນປະຈຳລາວ ໄດ້ຈັດກິດຈະກຳປາຖະກະຖາເລື່ອງລາວປະເທດຈີນ ພາຍໃຕ້ຫົວຂໍ້: ການທ່ອງທ່ຽວບຸນປະເພນີຈີນຂຶ້ນໃນວັນທີ 24 ພະຈິກນີ້ ທີ່ສູນດັ່ງກ່າວໂດຍການເປັນກຽດເຂົ້າຮ່ວມຂອງທ່ານ ເວີ້ຍຢ້ຽນຊົ່ງ (ວິລະວົງ) ເລຂາເອກພະແນກການເມືອງສະຖານທູດຈີນ ປະຈຳ ລາວ, ມີທ່ານນາງ ຫຼີຢີ່ຜິງ ຫົວໜ້າສູນວັດທະນະທຳຈີນປະຈຳລາວ, ມີນັກສຶກສາຈາກຄະນະອັກສອນສາດມະຫາວິທະຍາໄລແຫ່ງຊາດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ເວີ້ຍຢ້ຽນຊົ່ງ ໄດ້ບັນລະຍາຍຫົວຂໍ້: ການທ່ອງທ່ຽວບຸນປະເພນີຈີນ ຊຶ່ງໄດ້ແນະນໍາປະຫວັດສາດ ແລະ ສະພາບການປັດຈຸບັນຂອງການພັດທະນາການທ່ອງທ່ຽວບຸນປະເພນີຈີນພາຍໃຕ້: ຄວາມທັນສະໄໝແບບຈີນ ຕາມແນວທາງການຄົ້ນຄວ້າຂອງຕົນເອງ. ຫຼັງຈາກນັ້ນຜູ້ເຂົ້າຮ່ວມຍັງໄດ້ມີການຖາມ-ຕອບ, ແລກປ່ຽນ ແລະ ຖອດຖອນບົດຮຽນຊຶ່ງກັນ ແລະ ກັນ.

ກິດຈະກຳໃນຄັ້ງນີ້ຈັດຂຶ້ນເພື່ອໃຫ້ຜູ້ເຂົ້າຮ່ວມໄດ້ຮູ້ຈັກເລື່ອງລາວປະເທດຈີນໃຫ້ໄດ້ດີ ແລະ ລົງເລິກການແລກປ່ຽນຮຽນຮູ້ອະລິຍະທຳຊຶ່ງກັນ ແລະ ກັນ. ພ້ອມນັ້ນ, ກະຊວງວັດທະນະທຳ ແລະ ທ່ອງທ່ຽວຈີນຍັງໄດ້ນໍາໃຊ້ສູນວັດທະນະທໍາຈີນ 45 ແຫ່ງ ແລະ ຫ້ອງການທ່ອງທ່ຽວຈີນ 23 ແຫ່ງຢູ່ທົ່ວໂລກເປັນເວທີຈັດກິດຈະກຳເລື່ອງລາວປະເທດຈີນ（China’s stories）ທີ່ເປັນໂຄງການຫຼັກປະຈຳປີ 2023 ໂດຍປິ່ນອ້ອມ 3 ຫົວຂໍ້ຫຼັກຄື: ຄວາມທັນສະໄໝໃນຮູບແບບປະເທດຈີນ, ການແລກປ່ຽນຮຽນຮູ້ອະລິຍະທຳຊຶ່ງກັນ ແລະ ກັນ ແລະວັດທະນະທຳດັ່ງເດີມທີ່ດີເລີດຂອງຈີນ.

ໂອກາດນີ້, ຜູ້ເຂົ້າຮ່ວມຍັງໄດ້ຊົມງານວາງສະແດງຮູບພາບສະບາຍດີປະເທດຈີນ, ມໍລະດົກໂລກຂອງຈີນ ໂດຍມີນັກບັນຍາຍສອງພາສາ ຊຶ່ງໄດ້ບອກເລົ່າຄວາມເປັນມາ ແລະ ພື້ນຫຼັງວັດທະນະທໍາຂອງແຫຼ່ງມໍລະດົກທັງ 57 ແຫ່ງຂອງຈີນ.

(ຂ່າວ-ພາບ: ວັນເພັງ)