ໃນວັນທີ 24 ພະຈິກນີ້ທີ່ ກະຊວງການຕ່າງປະເທດ,ທ່ານ ສະເຫຼີມໄຊ ກົມມະສິດຮອງນາຍົກ ລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການຢ້ຽມຂ່ຳນັບຂອງທ່ານ ດຣ.ອິນດຣາ ປຣາດາເລຂາທິການໃຫຍ່ຂອງອົງການຜະລິດຕະພາບແຫ່ງອາຊີ Asian Productivity Organization (APO), ໃນໂອກາດທີ່ຄະນະຜູ້ແທນອົງການ APO ໄດ້ເດີນທາງມາເຄື່ອນໄຫວວຽກງານທາງການຢູ່ ສປປ ລາວ ແລະ ເຂົ້າຮ່ວມງານເທດສະການຜະລິດຕະພາບແຫ່ງຊາດ ຢູ່ ສປປ ລາວ ຕາມການເຊື້ອເຊີນຂອງ ກະຊວງອຸດສາຫະກຳ ແລະ ການຄ້າ, ແຕ່ວັນທີ 23-25 ພະຈິກ 2023.

ໃນໂອກາດດັ່ງກ່າວນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຕ້ອນຮັບອັນອົບອຸ່ນ ແລະຊົມເຊີຍ ທ່ານເລຂາທິການໃຫຍ່ ຂອງອົງການ APO ທີ່ໄດ້ຮັບການມອບໝາຍໃຫ້ຮັບໜ້າທີ່ໃໝ່ ແຕ່ເດືອນ ກັນຍາ 2022 ເປັນຕົ້ນມາ. ພ້ອມທັງຕີລາຄາສູງ ຕໍ່ການຮ່ວມມືລະຫວ່າງ ສປປ ລາວ ກັບ ອົງການ APO ແລະ ການສະໜັບສະໜູນຂອງອົງການດັ່ງກ່າວຕໍ່ ສປປ ລາວ. ພ້ອມນັ້ນທ່ານຍັງໄດ້ຍົກໃຫ້ເຫັນສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະເຄິ່ງສະໄໝຂອງສົກປີ 2021-2025 ແລະ ສະເໜີຂໍໃຫ້ອົງການAPO ສືບຕໍ່ໃຫ້ການຊ່ວຍເຫຼືອ ສປປ ລາວ ເປັນຕົ້ນແມ່ນການຄົ້ນຄວ້າ ແລະ ຜັນຂະຫຍາຍແຜນແມ່ບົດຜະລິດຕະພາບແຫ່ງຊາດຂອງ ສປປ ລາວ ຮອດປີ 2030, ສ້າງຄວາມເຂັ້ມແຂງໃຫ້ແກ່ພະນັກງານຂອງອົງການຜະລິດຕະພາບແຫ່ງຊາດ, ການສ້າງນິຕິກຳຕ່າງໆທີ່ກ່ຽວຂ້ອງກັບວຽກງານ ການເພີ່ມຜະລິດຕະພາບໃຫ້ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແລະ ຊ່ວຍຈັດຊື້ເຮືອນຮົ່ມເພື່ອສະໜອງໃຫ້ຜູ້ປະກອບການກິດຈະການກະສິກຳຂະໜາດນ້ອຍ ແລະ ກາງ.ພ້ອມດຽວກັນນັ້ນ, ທ່ານ ເລຂາທິການໃຫຍ່ຂອງອົງການ APO ກໍໄດ້ໃຫ້ຄຳໝັ້ນສັນຍາວ່າຈະໃຫ້ການສະໜັບສະໜູນ ສປປ ລາວ ໃນດ້ານຕ່າງໆ ຕາມທິດນຳ, ວິໄສທັດ ແລະ ເປົ້າໝາຍຂອງອົງການ APO.

ການຢ້ຽມຢາມຂອງເລຂາທິການໃຫຍ່ຂອງອົງການ APOເປັນຂີດໝາຍ ແລະ ບາດກ້າວອັນສໍາຄັນໃນການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ APO ໃຫ້ຫຼາຍຂຶ້ນຕື່ມອີກ, ໂດຍສະເພາະ ລະຫວ່າງ ກະຊວງອຸດສາຫະກຳ ແລະ ການຄ້າ ແລະ ອົງການ APO ໃນຂົງເຂດວຽກງານການເພີ່ມຜະລິດຕະພາບ ໃຫ້ທາງ ພາກລັດ ແລະ ພາກທຸລະກິດ ແລະ ວຽກອື່ນໆ ທີ່ກ່ຽວຂ້ອງ.

ໃນຕອນທ້າຍຂອງການຢ້ຽມຂ່ຳນັບ, ທ່ານ ຮອງນາຍົກລັດຖະມົນຕີໄດ້ສະແດງຄວາມຂອບໃຈຕໍ່ອົງການ APO ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຕໍ່ການຮ່ວມມືໃນດ້ານຕ່າງໆໃນລຍະຜ່ານມາ.

APO ແມ່ນອົງການຈັດຕັ້ງສາກົນລະຫວ່າງລັດຖະບານທີ່ບໍ່ຫວັງຜົນກຳໄລ, ບໍ່ແຊກແຊງທາງດ້ານການເມືອງແລະ ມີຄວາມເປັນທຳ ໂດຍບໍ່ມີການຈຳແນກບັນດາປະເທດສະມາຊິກດ້ວຍກັນ ຊຶ່ງມີເປົ້າໝາຍແນໃສ່ຊ່ວຍເຫຼືອເສດຖະກິດຂອງພາກພື້ນ ກໍຄືບັນດາປະເທດສະມາຊິກ ໃນການພັດທະນານະໂຍບາຍແຫ່ງຊາດ ເພື່ອເພີ່ມຜະລິດຕະພາບ ໂດຍຜ່ານບັນດາໂຄງການຕ່າງໆທີ່ຫຼາກຫຼາຍ ລວມເຖິງການວິໄຈ, ຄົ້ນຄວ້າ ແລະ ການສ້າງສູນດີເລີດໃນບັນດາປະເທດສະມາຊິກໃນພາກພື້ນອາຊີ-ປາຊີຟິກ. ອົງການດັ່ງກ່າວໄດ້ຮັບການສ້າງຕັ້ງຂຶ້ນໃນປີ 1961ໂດຍມີສໍານັກງານໃຫຍ່ ແລະ ກອງເລຂາ ຕັ້ງຢູ່ນະຄອນຫຼວງໂຕກຽວ ປະເທດຍີ່ປຸ່ນ. ປັດຈຸບັນມີສະມາຊິກທັງໝົດ 21 ປະເທດ, ໃນນັ້ນ ສປປ ລາວ ກໍເປັນໜຶ່ງໃນບັນດາປະເທດສະມາຊິກຊຶ່ງໄດ້ເຂົ້າເປັນສະມາຊິກຂອງອົງການ ດັ່ງກ່າວໃນປີ 2002 ໂດຍກົມສົ່ງເສີມວິສາຫະກິດຂະໜາດນ້ອຍ ແລະ ກາງ (ກສວ), ກະຊວງອຸດສາຫະກຳ ແລະ ການຄ້າ ໄດ້ຖືກມອບໝາຍໃຫ້ເປັນຈຸດປະສານງານກັບອົງການ APO ແລະ ເປັນອົງການຜະລິດຕະພາບແຫ່ງຊາດ ສປປ ລາວ.

(ຂ່າວ-ພາບ: ກຕທ)