ກອງປະຊຸມເວທີປາໄສທາງວັດທະນະທຳແມ່ນໍ້າຢາງຊີ ໄດ້ຈັດຂຶ້ນທີ່ຫໍປະຊຸມສາກົນແມ່ນໍ້າຢາງຊີນານຈິງ ສປ ຈີນ ໃນວັນທີ24 ພະຈິກ ນີ້, ຈັດໂດຍຄະນະກຳມະການສຳນັກງານຂ່າວສານຊິນຮົວ ທີ່ແຂວງຈາງຊູເມືອງນານຈິງໂດຍໃຫ້ກຽດຂຶ້ນກ່າວຄຳປາໄສຂອງ ທ່ານຊິນຈາງຊິງ (Xin Changxing) ເລຂາທິການຄະນະກຳມະການພັກກອມມູນິດຈີນ ປະຈຳແຂວງຈາງສູ ທັງເປັນປະທານຄະນະກຳມະການສະພາແຂວງຈາງສູ, ທ່ານ ຫຼິວ ຢານສົງ(Lyu Yansong) ຫົວໜ້າບັນນາທິການໃຫຍ່ ສຳນັກງານຂ່າວສານຊິນຮົວ ແລະ ທ່ານ ຊາບາດຄັນ (Shahbaz khan) ຜູ້ອຳນວຍການຈາກອົງກອນອຸຍເນັສໂກ (UNESCO)ປະຈຳສຳນັກງານພາກພື້ນອາຊີຕາເວັນອອກ ພ້ອມດ້ວຍຊ່ຽວຊານແລະ ບັນດາສື່ມວນຊົນ 18 ພາກສ່ວນເຂົ້າຮ່ວມ ຊຶ່ງກອງປະຊຸມດັ່ງກ່າວຈັດຂຶ້ນເປັນຄັ້ງທຳອິດ.

ຈຸດປະສົງຂອງກອງປະຊຸມໃນຄັ້ງນີ້ເພື່ອເຜີຍແຜ່ປະຫວັດທາງດ້ານວັດທະນະທຳຂອງແມ່ນໍ້າຢາງຊີແລະປົກປັກຮັກສາໃຫ້ເປັນມໍລະດົກຕົກທອດສູ່ຄົນຮຸ່ນໜຸ່ມແລະໃຫ້ຊາວໂລກຮັບຮູ້ ການຮັກສາສິ່ງແວດລ້ອມ, ການພັດທະນາຕາມແມ່ນ້ຳຢາງຊີແບບຍືນຍົງກໍຄືການຮັກສາຊີວະນາໆພັນໃນແມ່ນ້ຳແຫ່ງນີ້ ເພາະວ່າສາຍນ້ຳຄືຊີວິດ. ນອກຈາກນີ້ຍັງໄດ້ມີການສົນທະນາປຶກສາຫາລືກັບບັນດານັກຊ່ຽວຊານແບບຖາມ - ຕອບເຖິງການວາງແຜນປົກປັກຮັກສາ ແລະ ກົນລະຍຸດການພັດທະນາອອກແບບຜັງເມືອງຕ່າງໆໃນອະນາຄົດເພື່ອໃຫ້ແມ່ນ້ຳແຫ່ງນີ້ມີຄວາມປອດໄພໂດຍສະເພາະແມ່ນສັດໃນແມ່ນ້ຳດັ່ງກ່າວບໍ່ໃຫ້ສູນພັນ.

ນອກຈາກນີ້ຍັງມີນັກຊ່ຽວຊານກ່ຽວກັບພິພິມະພັນຈາກເອີຣົບ ມາເຜີຍແຜ່ໃຫ້ຄວາມຮູ້ກ່ຽວກັບການສ້າງພິພິທະພັນນ້ຳ ແລະ ການຈັດການລະບົບສິ່ງແວດລ້ອມເພື່ອໃຫ້ພື້ນທີ່ຕາມແມ່ນ້ຳຢາງຊີເປັນສີຂຽວແບບຍືນຍົງ ແລະ ໃຫ້ເປັນມໍລະດົກຂອງໂລກອີກດ້ວຍ.

ຂ່າວ-ພາບ: ຈັນທະໄມຕຣີ