ພິທີເປີດໄຟສີສົ້ມ ໃສ່ປະຕູໄຊ ເນື່ອງໃນໂອກາດ ລະນຶກວັນສາກົນເພື່ອລຶບລ້າງຄວາມ ຮຸນແຮງຕໍ່ແມ່ຍິງ 25 ພະຈິກ ພາຍໃຕ້ຫົວຂໍ້: ຮ່ວມກັນ ລົງທຶນໃສ່ການປ້ອງກັນ ແລະ ການຊ່ວຍເຫຼືອແມ່ຍິງ ແລະ ເດັກຍິງ ທີ່ຖືກຄວາມຮຸນແຮງ ຄົບຮອບ 23 ປີ ໂດຍການເຂົ້າຮ່ວມຂອງ ທ່ານ ນາງ ອາລີ ວົງໜໍ່ບຸນທຳ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ປະທານ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ; ມີຮອງລັດຖະມົນຕີ, ຜູ້ຕາງໜ້າຈາກອົງການຈັດຕັ້ງສາກົນ ມີບັນດາຄູ່ຮ່ວມພັດທະນາ ເຂົ້າຮ່ວມ.

ທ່ານ ນາງ ອາລີ ວົງໜໍ່ບຸນທຳ ໄດ້ມີຄວາມເຫັນກ່າວໃນພິທີວ່າ:ຕາງໜ້າໃຫ້ຄະນະກຳມາທິການແຫ່ງຊາດເພື່ອຄວາມກ້າວໜ້າແມ່ຍິງແມ່, ແມ່ ແລະ ເດັກ ເຂົ້າຮ່ວມໃນພິທີເປີດໄຟສີສົ້ມ ເນື່ອງໃນໂອກາດ ລະນຶກວັນສາກົນເພື່ອລຶບລ້າງຄວາມ ຮຸນແຮງຕໍ່ແມ່ຍິງ 25 ພະຈິກ ໃນຄັ້ງນີ້ ພາຍໃຕ້ຫົວຂໍ້: ຮ່ວມກັນລົງທຶນໃສ່ການປ້ອງກັນ ແລະ ການ ຊ່ວຍເຫຼືອແມ່ຍິງ ແລະ ເດັກຍິງ ທີ່ຖືກຄວາມຮຸນແຮງ”ການລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ປີ 2023 ຈັດຂຶ້ນ ຄົບຮອບ 23 ປີ ຊຶ່ງໄດ້ເລີ່ມຕົ້ນຂະບວນການທໍາອິດໃນປີ 2008 ໂດຍແມ່ນ ທ່ານ ບັນ ກິ-ມູນ ອະດີດເລຂາທິການໃຫຍ່ ສປຊ ໄດ້ນໍາພາ “ຂະບວນການຮ່ວມກັນເພື່ອຢຸຕິຄວາມຮຸນແຮງຕໍ່ແມ່ຍິງ”. ຂະບວນການນີ້ສ້າງຂຶ້ນ. ເພື່ອເປັນການປຸກລະດົມໃຫ້ທຸກຮຸ່ນຄົນໃນທົ່ວສັງຄົມໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນການລ່ວງລະເມີດສິດທິ ມະນຸດຂັ້ນພື້ນຖານຂອງແມ່ຍິງ ແລະ ເດັກຍິງ, ສ້າງຈິດສຳນຶກໃຫ້ທຸກຄົນ ທຸກພາກສ່ວນ, ພ້ອມກັນ ສົ່ງເສີມ ແລະ ປະຕິບັດສິດສະເໝີພາບຍິງ-ຊາຍ, ກ້າວໄປເຖິງໃຫ້ທຸກຄົນໃນທົ່ວສັງຄົມ ເຄົາລົບ ນັບຖື ໃຫ້ກຽດເຊິ່ງກັນ ແລະ ກັນ ບໍ່ມີການຈໍາແນກຕໍ່ແມ່ຍິງ, ເຮັດໃຫ້ທັງຍິງ-ຊາຍ, ເດັກຍິງ ແລະ ເດັກຊາຍ ມີສິດສະເໝີພາບເທົ່າທຽມກັນໃນການດຳລົງຊີວິດ ແລະ ເຄື່ອນໄຫວຢ່າງມີກຽດສັກສີ.

ຄວາມຮຸນແຮງຕໍ່ແມ່ຍິງ ເມື່ອເກີດຂຶ້ນແລ້ວມີຜົນກະທົບຍາວນານ ຕໍ່ກະໂຕແມ່ຍິງ ແລະ ລູກເຕົ້າຂອງເຂົາເຈົ້າ, ຕະຫຼອດຮອດຜົນກະທົບຕໍ່ຊຸມຊົນ ແລະ ທົ່ວສັງຄົມ ແມ່ຍິງທີ່ຖືກຄວາມຮຸນແຮງແມ່ນປະເຊີນກັບບັນຫາດ້ານສຸຂະພາບ, ຄວາມສາມາດຂອງເຂົາເຈົ້າທີ່ ຈະຫາລ້ຽງຊີບ ແລະ ເຂົ້າຮ່ວມຊີວິດໃນສັງຄົມກໍຫຼຸດໜ້ອຍຖອຍລົງ; ສ່ວນລູກເຕົ້າກໍປະເຊີນກັບ ຄວາມສ່ຽງຢ່າງໃຫຍ່ຫຼວງທາງດ້ານສຸຂະພາບ, ບັນຫາການສຶກສາຮໍ່າຮຽນ ແລະ ມີການປະພຶດຕົວທີ່ຜິດປົກກະຕິ; ແລະ ຍັງເປັນສາເຫດເຮັດໃຫ້ຫຼຸດຜ່ອນຊັບພະຍາກອນມະນຸດທີ່ສາມາດອອກແຮງງານໄດ້ຢ່າງເຕັມສ່ວນ ອັນສົ່ງຜົນກະທົບທາງລົບຕໍ່ການຜະລິດໃນຄອບຄົວ ກໍຄືການສ້າງສາ ພັດທະນາລວມຂອງປະເທດຊາດ ແລະ ເປັນສິ່ງກີດຂວາງ ບໍ່ໃຫ້ແມ່ຍິງໄດ້ປະກອບສ່ວນ ແລະ ໄດ້ຮັບຜົນປະໂຫຍດ, ຈາກການພັດທະນາດ້ວຍການຈຳກັດທາງເລືອກ ແລະ ຈຳກັດຄວາມສາມາດໃນ ການເຄື່ອນໄຫວຂອງເຂົາເຈົ້າ.ຂະບວນການຢຸຕິຄວາມຮຸນແຮງຕໍ່ແມ່ຍິງ ຂອງ ອົງການສະຫະປະຊາຊາດ ຈຶ່ງໄດ້ກຳນົດເອົາ ທຸກໆວັນທີ 25 ຂອງແຕ່ລະເດືອນ ເປັນ “ວັນສີສົ້ມ” ເປັນສີທີ່ສົດໃສ ແລະເບິ່ງໂລກໃນມຸມມອງທີ່ດີ, ເປັນສີທີ່ສະແດງເຖິງອະນາຄົດທີ່ສົດໃສ ປາສະຈາກຄວາມຮຸນແຮງຕໍ່ແມ່ຍິງ ແລະເດັກຍິງ.

ຂ່າວ: ຍຸພິນທອງ