ໃນວັນທີ 24 ພະຈິກ ຜ່ານມາ ທີ່ຫ້ອງວ່າການແຂວງເຊກອງ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ໄດ້ໃຫ້ກຽດຕ້ອນຮັບທ່ານ ຫງວຽນ ວັນ ຈຸງ ກົງສູນໃຫຍ່ ສສ ຫວຽດນາມ ປະຈໍາ ນະຄອນປາກເຊ ແຂວງຈໍາປາສັກ, ພ້ອມດ້ວຍນັກທຸລະກິດ ແລະ ສະມາຄົມມິດຕະພາບຫວຽດນາມ 4 ແຂວງພາກໃຕ້ລາວ ເດີນທາງອວຍພອນການນໍາແຂວງເຊກອງ ເນື່ອງໃນໂອກາດ ວັນຊາດທີ 2 ທັນວາ ຄົບຮອບ 48 ປີ ທີ່ຈະມາເຖິງໃນມໍ່ໆນີ້.

ໃນໂອກາດດັ່ງກ່າວ, ທ່ານ ຫງວຽນ ວັນ ຈຸງ ໄດ້ກ່າວຍ້ອງຍໍຊົມເຊີຍຕໍ່ການນໍາພັກ-ລັດຖະບານແຫ່ງ ສປປ ລາວເວົ້າລວມ, ເວົ້າສະເພາະຄະນະພັກ-ຄະນະນໍາແຂວງເຊກອງທີ່ສຸມເຫື່ອແຮງສະຕິປັນຍານໍາພາ-ຊີ້ນໍາປະຊາຊົນບັນດາເຜົ່າປົກປັກຮັກສາ ແລະສ້າງສາພັດທະນາແຂວງເຊກອງ ຊຶ່ງຕະຫຼອດໄລຍະ 48 ປີຜ່ານມາ ພາຍໃຕ້ການນໍາພາອັນປີຊາສາມາດສະຫຼາດສ່ອງໃສຂອງພັກປະຊາຊົນປະຕິວັດລາວ ອັນເຮັດໃຫ້ແຂວງເຊກອງພັດທະນາຫຼາຍດ້ານ, ພ້ອມນີ້ ທ່ານກໍໄດ້ຫວນຄືນການພົວພັນຮ່ວມມືຮອບດ້ານ ສາມັກຄີແບບພິເສດລະຫວ່າງສອງຊາດລາວ-ຫວຽດນາມ ທີ່ມີມູນເຊື້ອມາແຕ່ດົນນານ ຊຶ່ງໃນໄລຍະຜ່ານມາ ສອງຊາດລາວ-ຫວຽດນາມ ໄດ້ສາມັກຄີກັນຄຽງບ່າຄຽງໄຫຼ່ຕໍ່ສູ້ກູ້ຊາດຕ້ານຈັກກະພັດຕ່າງດ້າວ ຈົນໄດ້ຮັບໄຊຊະນະອັນຍິ່ງໃຫຍ່ມາສູ່ປະເທດຊາດ ແລະໄດ້ຮັບການພັດທະນາ ຮຸ່ງເຮືອງ ສີວິໄລ ເປັນກ້າວໆມາ.

ໂອກາດນີ້, ທ່ານ ເຫຼັກໄຫຼ ສີວິໄລ ກໍໄດ້ສະແດງຂອບໃຈມາຍັງທ່ານ ຫວຽນ ວັນ ຈຸງ ກົງສູນໃຫຍ່ ສສ ຫວຽດນາມ ປະຈໍານະຄອນປາກເຊ ແຂວງຈໍາປາສັກ ພ້ອມຄະນະທີ່ເດີນທາງມາອວຍພອນໃນຄັ້ງນີ້ ແລະ ຖືໄດ້ວ່າເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບລາວ-ຫວຽດນາມ, ຫວຽດນາມ-ລາວເວົ້າລວມ, ເວົ້າສະເພາະກໍຄືແຂວງເຊກອງກັບບັນດາແຂວງຂອງ ສສ ຫວຽດນາມ ໃຫ້ນັບມື້ນັບຂະຫຍາຍຕົວເຂົ້າສູ່ລວງເລິກ ແລະ ແໜ້ນແຟ້ນຂຶ້ນກວ່າເກົ່າ. ຂ່າວ-ພາບ: ພຸດທະສອນ