ພິທີມອບ-ຮັບອາຄານຮຽນ 2 ຫຼັງຈາກມູນນິທິເກື້ອຝັນເດັກ ໄດ້ຈັດຂຶ້ນເມື່ອບໍ່ດົນມານີ້ ທ່ີໂຮງຮຽນປະຖົມສົມ ບູນນໍ້າເງິນ ເມືອງເງິນ ແຂວງໄຊຍະບູລີ ໂດຍມີທ່ານ ບຸນເລື່ອນ ບົວໄລ ຮອງເຈົ້າເມືອງໆເງິນ ຜູ້ຊີ້ນໍາຂົງເຂດວັດ ທະນະທໍາ-ສັງຄົມ, ມີທ່ານ ບຸນທະວີ ໂສພາ ຮອງຫົວໜ້າພະແນກສຶກສາທິການ ແລະ ກິລາ (ສກຂ) ແຂວງ, ມີທ່ານ ແດນຽວ ມາໂຄ ຊີຟຣີ ປະທານມູນນິທິເກື້ອຝັນເດັກ ພ້ອມດ້ວຍຄູ-ອາຈານ, ນັກຮຽນເຂົ້າຮ່ວມ.

ທ່ານ ຄໍາຫວາດ ຄໍາເຄື່ອງ ຕາງໜ້າຜູ້ຮັບເໜົາກໍ່ສ້າງກ່າວວ່າ: ການກໍ່ສ້າງອາຄານຮຽນໄດ້ເລີ່ມລົງມືກໍ່ສ້າງມາແຕ່ເດືອນມັງກອນ ແລະ ສໍາເລັດການກໍ່ສ້າງໃນເດືອນກັນຍາ 2023 ເປັນອາຄານຊັ້ນດຽວ, ມີຄວາມຍາວ 42 ແມັດ, ກວ້າງ 8 ແມັດ ປະກອບມີ 6 ຫ້ອງຮຽນ, 4 ຫ້ອງນໍ້າ, ປະກອບມີອຸປະກອນຄົບຊຸດ ໃຊ້ເວລາໃນການກໍ່ສ້າງຕາມສັນ ຍາແມ່ນ 6 ເດືອນ ມູນຄ່າການກໍ່ສ້າງ 1.039.834.250 ກີບ ໂດຍແມ່ນທຶນສົມທົບລະຫວ່າງມູນນິທິເກື້ອຝັນເດັກ ແລະ ປະຊາຊົນ. ໃຫ້ກຽດກ່າວມອບໂດຍທ່ານ ແດນຽວ ມາໂຄ ຊີຟຣີ ແລະ ກ່າວຮັບໂດຍທ່ານ ໄວພົດ ບັນຍາສອນ ວ່າການຫົວໜ້າຫ້ອງການສຶກສາທິການ ແລະ ກິລາເມືອງ ຈາກນັ້ນທ່ານໄດ້ມອບອາຄານຮຽນຕໍ່ໃຫ້ຄູ-ອາຈານ, ອົງການປົກຄອງບ້ານເປັນຜູ້ປົກປັກຮັກສາ ແລະ ນໍາໃຊ້ໃຫ້ຍາວນານທີ່ສຸດ. ໂອກາດນີ້, ທ່ານ ແດນຽວ ມາໂຄ ຊີຟຣີ ໄດ້ມອບອຸປະກອນການຮຽນ-ກິລາໃຫ້ໂຮງຮຽນອີກຈຳນວນໜຶ່ງ.

ຂ່າວໃຫ້ຮູ້ຕື່ມອີກວ່າ: ໃນວັນດຽວກັນໄດ້ມີພິທີມອບ-ຮັບອາຄານຮຽນໂຮງຮຽນລ້ຽງເດັກ-ອະນຸບານປະຊາຮ່ວມໃຈ ຊຶ່ງເປັນອາຄານຊັ້ນດຽວປະກອບມີ 4 ຫ້ອງ, ມີ 1 ຫ້ອງການ, 3 ຫ້ອງນໍ້າ ແລະ 1 ຫ້ອງອາບນໍ້າຂອງເດັກ, ມີຄວາມຍາວ 35 ແມັດ, ກວ້າງ 8 ແມັດ ປະກອບມີເຄື່ອງເຟີນີເຈີຄົບຊຸດ ມູນຄ່າການການກໍ່ສ້າງທັງໜົດ 805.023.060 ກີບ ຊຶ່ງແມ່ນທຶນສົມທົບລະຫວ່າງມູນນິທິເກື້ອຝັນເດັກ ແລະ ປະຊາຊົນ.

ຂ່າວ-ພາບ: ສຸລີຍາ ແສງເດືອນ