ຄະນະກຳມະການໂອລິມປິກເກຣັກໄດ້ແຈ້ງໃຫ້ຮູ້ ເມື່ອ​ວັນ​ທີ 22 ພະ​ຈິກ ຢູ່ນະຄອນຫຼວງອາແຕນວ່າ: ພິທີເອົາໄຟສັກສິດງານກິລາໂອລິມປິກປາຣີປີ 2024 ຈະຈັດຂຶ້ນຢູ່ເມືອງໂອລິມເປຍບູຮານຂອງແຫຼມເປໂລປົນເນສັສປະເທດເກຣັກໃນວັນທີ 16 ເມສາປີ 2024, ແລ້ວຈະແລ່ນສົ່ງຕໍ່ທວນໄຟຢູ່ພາຍໃນປະເທດເກຣັກ.

ເມື່ອຮອດວັນທີ 26 ເມສາ 2024, ທ່ານສະໄປໂຣສ ກາພຣາໂລສ ປະທານຄະນະກຳມະການໂອລິມປິກເກຣັກຈະສົ່ງມອບໄຟສັກສິດງານກິລາໂອລິມປິກໃຫ້ແກ່ຄະນະກຳມະການຈັດງານກິລາໂອລິມປິກປາຣີເຊິ່ງພິທີມອບ-ຮັບຈະຈັດຂຶ້ນຢູ່ສະໜາມກິລາ ພານາທິໄນໂກ ຂອງເກຣັກ. ຈາກນັ້ນວັນທີ 8 ພຶດສະພາ 2024, ໄຟສັກສິດງານກິລາໂອລິມປິກຈະຂ້າມຜ່ານທະເລເມດິເຕີຣາເນ ແລະ ຮອດທ່າກຳປັ່ນມາກໄຊຂອງຝຣັ່ງ, ເລີ່ມການແລ່ນສົ່ງຕໍ່ທວນໄຟພາຍໃນປະເທດຝຣັ່ງ ແລະ ຂ້າມຜ່ານທະເລເປັນເວລາຫຼາຍກວ່າ 2 ເດືອນ.