ຜົນສໍາເລັດກອງປະຊຸມປະຈຳປີການຈັດຕັ້ງພາຄີຕ້ານການສໍ້ລາດບັງຫຼວງອາຊຽນ ຄັ້ງທີ 19 (ອາຊຽນ-ແພັກ ASEAN-PAC), ກອງປະຊຸມຄັ້ງນີ້ໄດ້ພິຈາລະນາ ແລະ ເຫັນດີເປັນເອກະພາບກັນ ຫຼາຍວຽກງານສຳຄັນ ຊຶ່ງໃນນີ້ ອົງການຕ້ານການສໍ້ລາດບັງຫຼວງຂອງ ອິນໂດເນເຊຍ ເປັນເຈົ້າພາບຈັດກອງປະຊຸມອາຊຽນແພັກຄັ້ງທີ 20 ໃນປີ 2024, ຂະນະທີ່ ຄະນະກຳມະການຕ້ານການສໍ້ລາດບັງຫຼວງຕີມໍແລັດສະເຕເຂົ້າເປັນສະມາຊິກຂອງອາຊຽນ-ແພັກ ແຕ່ການຈັດຕັ້ງປະຕິບັດຕົວຈິງແມ່ນໃຫ້ໄປຕາມຂັ້ນຕອນຂອງອາຊຽນ.
ພາຍຫຼັງທີ່ໄດ້ເປີດກອງປະຊຸມດັ່ງກ່າວໃນວັນທີ 29 ພະຈິກ ຜ່ານມາ ແລະ ດຳເນີນມາເປັນເວລາ 1 ວັນເຄິ່ງ, ໃນວັນທີ 30 ພະຈິກນີ້ ກອງປະຊຸມອາຊຽນ-ແພັກ ຄັ້ງທີ 19 ໄດ້ປິດລົງຢ່າງເປັນທາງການ ທີ່ນະຄອນຫຼວງວຽງຈັນ, ໂດຍມີຄະນະຜູ້ແທນຈາກອົງການຕ້ານການສໍ້ລາດບັງຫຼວງ ຂອງ 10 ປະເທດອາຊຽນ ຫຼືອາຊຽນ-ແພັກ,  ຄະນະຜູ້ແທນຈາກອົງການສະຫະປະຊາຊາດ ເພື່ອຕ້ານຢາເສບຕິດ ແລະອາຊະຍາກໍາ (UNODC) ແລະ ແຂກພາຍໃນເຂົ້າຮ່ວມ.
ກອງປະຊຸມໄດ້ດໍາເນີນຕາມວາລະ ແລະຕາມຈຸດປະສົງຄາດໝາຍທີ່ກໍານົດໄວ້ ດ້ວຍບັນຍາກາດແຫ່ງຄວາມສາມັກຄີ, ເຂົ້າອົກເຂົ້າໃຈ, ຈິງໃຈໃຫ້ການຮ່ວມມືຊ່ວຍເຫຼືອຊຶ່ງກັນ ແລະກັນ,ກອງປະຊຸມໄດ້ພິຈາລະນາຮັບຮອງເອົາບົດບັນທຶກກອງປະຊຸມອາຊຽນ-ແພັກຄັ້ງທີ 18 ຂອງປີ 2022; ຈາກນັ້ນ, ໄດ້ຮັບຟັງການສະເໜີສະພາບການຈັດຕັ້ງປະຕິບັດວຽກງານສະກັດກັ້ນແລະຕ້ານການສໍ້ລາດບັງຫຼວງຂອງປະເທດສະມາຊິກ, ໄດ້ປຶກສາຫາລືເປັນເອກະພາບກັນ ກ່ຽວກັບແຜນການເຄື່ອນໄຫວໄລຍະ 2023-2024; ໄດ້ຮັບຮອງເອົາການນໍາໃຊ້ປຶ້ມຂໍ້ມູນອາຊຽນ-ແພັກຫຼືອີບຸກເລັດ; ໄດ້ແລກປ່ຽນຄວາມຄິດ, ຄວາມເຫັນກ່ຽວກັບການປະຕິບັດຜົນການທົບທວນການຈັດຕັ້ງປະຕິບັດສົນທິສັນຍາສະຫະປະຊາຊາດວ່າດ້ວຍການຕ້ານການສໍ້ລາດບັງຫຼວງແລະ ແຜນການຮ່ວມມືຕໍ່ໜ້າກັບອົງການສະຫະປະຊາຊາດ ເພື່ອຕ້ານຢາເສບຕິດ ແລະອາຊະຍາກໍາ (UNODC),ອົງການUNODCໄດ້ລາຍງານການເຄື່ອນໄຫວວຽກງານຕ້ານການສໍ້ລາດບັງຫຼວງ; ບັນດາປະເທດສະມາຊິກອາຊຽນ-ແພັກ ສະເໜີບົດຮຽນ ກ່ຽວກັບວຽກງານຕ້ານການສໍ້ລາດບັງຫຼວງ; ປຶກສາຫາລື ກ່ຽວກັບການຮ່ວມມືລະຫວ່າງ ອາຊຽນ-ແພັກ; ອົງການUNODCນໍາສະເໜີ ກ່ຽວກັບການຈັດຕັ້ງປະຕິບັດຜົນການທົບທວນສົນທິສັນຍາ (ພາກທີ III: ການກໍານົດ ເປັນຄວາມຜິດທາງອາຍາ ແລະ ການບັງຄັບປະຕິບັດກົດໝາຍ); ລາຍງານຄວາມຄືບໜ້າ ກ່ຽວກັບການເຂົ້າເປັນສະມາຊິກອາຊຽນ-ແພັກ ຂອງຄະນະກຳມະການຕ້ານການສໍ້ລາດບັງຫຼວງຕີມໍແລັດສະເຕ.
ພ້ອມດຽວກັນນັ້ນ, ກອງປະຊຸມໄດ້ພິຈາລະນາ ແລະ ເຫັນດີເປັນເອກະພາບກັນ ໃຫ້ອົງການຕ້ານການສໍ້ລາດບັງຫຼວງຂອງອິນໂດເນເຊຍ ເປັນເຈົ້າພາບຈັດກອງປະຊຸມອາຊຽນແພັກຄັ້ງທີ 20 ໃນປີ 2024; ນອກນີ້, ຍັງໄດ້ປຶກສາຫາລື ເພີ່ມທະວີການຮ່ວມມືວຽກງານຕ້ານການສໍ້ລາດບັງຫຼວງ; ປຶກສາຫາລື ກ່ຽວກັບການສະເຫຼີມສະຫຼອງການກໍ່ຕັ້ງອາຊຽນ-ແພັກຄົບຮອບ 20 ປີ; ລາຍງານ ກ່ຽວກັບລາຍຊື່ຈຸດປະສານຂອງອາຊຽນ-ແພັກຫຼ້າສຸດ. ນອກນັ້ນ,  ຜູ້ເຂົ້າຮ່ວມກອງປະຊຸມຍັງໄດ້ໃຫ້ກຽດເປັນສັກຂີພິຍານໃນພິທີເຊັນບົດບັນທຶກການຮ່ວມມືສອງຝ່າຍລະຫວ່າງອົງການກວດກາແຫ່ງລັດ, ອົງການຕ້ານການສໍ້ລາດບັງຫຼວງຂັ້ນສູນກາງ ຂອງສປປລາວກັບອົງການຕ້ານການສໍ້ລາດບັງຫຼວງຂອງອິນໂດເນເຊຍ ແລະ ອົງການກວດກາແຫ່ງລັດ, ອົງການຕ້ານການສໍ້ລາດບັງຫຼວງຂັ້ນສູນກາງຂອງ ສປປ ລາວ ກັບອົງການຕ້ານການສໍ້ລາດບັງຫຼວງ ຂອງສະຫະພາບມຽນມາ. ນອກຈາກນີ້ ກອງປະຊຸມຍັງໄດ້ຕົກລົງເປັນເອກະພາບເພື່ອຮັບຮອງເອົາຄະນະກຳມະການຕ້ານການສໍ້ລາດບັງຫຼວງຕີມໍແລັດສະເຕເຂົ້າເປັນສະມາຊິກຂອງອາຊຽນ-ແພັກ ແຕ່ການຈັດຕັ້ງປະຕິບັດຕົວຈິງແມ່ນໃຫ້ໄປຕາມຂັ້ນຕອນຂອງອາຊຽນ.
ຫຼັງຈາກນັ້ນ, ທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງແຫ່ງ ສປປ ລາວ ກໍໄດ້ກ່າວຕໍ່ກອງປະຊຸມວ່າ: ພວກເຮົາໄດ້ມີການສົນທະນາປຶກສາຫາລື, ແລກປ່ຽນຄໍາຄິດເຫັນ, ບົດຮຽນປະສົບການຊຶ່ງກັນ ແລະກັນ ດ້ວຍບັນຍາກາດອັນສ້າງສັນ ແລະ ອົບອຸ່ນ; ຕະຫຼອດເວລາດໍາເນີນກອງປະຊຸມຄັ້ງນີ້, ຜົນສໍາເລັດຂອງກອງປະຊຸມ ແມ່ນມາຈາກການປະກອບສ່ວນສໍາຄັນຂອງບັນດາຄະນະຜູ້ແທນ ແລະຜູ້ເຂົ້າຮ່ວມທຸກທ່ານ ຊຶ່ງໄດ້ເປັນເຈົ້າການໃນການປະກອບຄໍາເຫັນ, ໃຫ້ຄໍາປຶກສາຫາລືແລກປ່ຽນບົດຮຽນປະສົບການອັນດີ, ເຮັດໃຫ້ກອງປະຊຸມມີເນື້ອໃນອຸດົມສົມບູນ, ເປັນຂໍ້ມູນທີ່ດີສໍາລັບການສຶກສາຄົ້ນຄວ້າ ແລະໝູນໃຊ້ເຂົ້າໃນວຽກງານຕົວຈິງ. ໃນໂອກາດ ເພື່ອສະເຫຼີມສະຫຼອງວັນຕ້ານການສໍ້ລາດບັງຫຼວງສາກົນວັນທີ 9 ທັນວາຄົບ ຮອບ 20 ປີ,  ພວກເຮົາຄອບຄົວອົງການຕ້ານການສໍ້ລາດບັງຫຼວງຂົງເຂດອາຊີຕາເວັນອອກສ່ຽງໃຕ້ (ອາຊຽນ-ແພັກ) ຖືເອົາໂອກາດກອງປະຊຸມຄັ້ງນີ້ສະແດງເຖິງການຕັດສິນໃຈເດັດດ່ຽວຮ່ວມແຮງຮ່ວມໃຈກັນສະກັດກັ້ນ ແລະຕ້ານການສໍ້ລາດບັງຫຼວງ ໃນແຕ່ລະປະເທດປະກອບສ່ວນເຂົ້າໃນຜົນສໍາເລັດລວມ ຂອງທົ່ວການຈັດຕັ້ງພາຄີຂອງພວກເຮົາ. 
(ຂ່າວ-ພາບ: ສຸກສະຫວັນ; ຂໍ້ມູນຈາກ: ອົງການກວດກາແຫ່ງລັດ)