ວິທະຍຸກະຈາຍສຽງຫວຽດນາມລາຍງານວ່າ: ເນື່ອງໃນໂອກາດວັນຄົນພິການສາກົນ (3 ທັນວາ), ວັນທີ 29 ພະຈິກ ຜ່ານມາ ຢູ່ ຮ່າໂນ້ຍ, ຄະນະກຳມະການແຫ່ງຊາດ ກ່ຽວກັບຄົນພິການ ຫວຽດນາມ ສົມທົບກັບກະຊວງວັດທະນະທຳ, ກິລາ ແລະ ທ່ອງທ່ຽວ, ສະຫະສະມາຄົມ ພາລາແລັມປິກ ຫວຽດນາມ ໄດ້ຈັດເວທີປາໄສຂຶ້ນ, ດ້ວຍຫົວຂໍ້: ຮັບຟັງສຽງເວົ້າຂອງຄົນພິການ.

ຂ່າວລະບຸວ່າ: ທ່ານ ຫງວຽນວັນໂຮ່ຍ ຮອງລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ຮອງປະທານຄະນະກຳມະການແຫ່ງຊາດ ກ່ຽວກັບຄົນພິການ ຫວຽດນາມ ໃຫ້ຮູ້ວ່າ: ຈຳນວນຄົນພິການໃນປັດຈຸບັນ ກວມເອົາກວ່າ 7% ຂອງຈຳນວນປະຊາກອນໃນເກນອາຍຸແຕ່ 2 ປີຂຶ້ນໄປຢູ່ ຫວຽດນາມ. ເຖິງວ່າຍາມໃດກໍໄດ້ພະຍາຍາມບືນຕົວ, ປັບປຸງແກ້ໄຂໃຫ້ດີຂຶ້ນກໍຕາມ, ແຕ່ຄົນພິການ ຫວຽດນາມ ສ່ວນຫຼາຍພວມດຳລົງຊີວິດຢູ່ເຂດຊົນນະບົດ, ເງື່ອນໄຂດຳລົງຊີວິດຍັງປະສົບກັບຄວາມຫຍຸ້ງຍາກ ຄວນໄດ້ຮັບການຊ່ວຍເຫຼືອຈາກລັດ ແລະ ວົງຄະນາຍາດ: ປັດຈຸບັນ, ຫວຽດນາມ ມີຄົນພິການປະມານ 7 ລ້ານຄົນ, ໃນນັ້ນມີຄົນພິການປະເພດໜັກ ແລະ ພິເສດ ກວມເອົາ 28,9% ແລະ ປະມານ 10% ແມ່ນຄົນພິການໃນບັນດາຄອບຄົວທຸກຍາກ. ຫວຽດນາມ ແມ່ນໜຶຶ່ງໃນບັນດາປະເທດມີອັດຕາຄົນພິການສູງ ເມື່ອທຽບໃສ່ຈຳນວນປະຊາກອນໃນພາກພື້ນ ອາຊີ - ປາຊີຟິກ. ຄົນພິການ ຫວຽດນາມ ສ່ວນຫຼາຍແມ່ນໄດ້ດຳລົງຊີວິດຢູ່ເຂດຊົນນະບົດ, ມີຊີວິດການເປັນຢູ່ປະສົບກັບຄວາມຫຍຸ້ງຍາກ.