ວິທະຍຸກະຈາຍສຽງຫວຽດນາມລາຍງານ, ໃນວັນທີ 6 ທັນວາ ຜ່ານມາ ຢູ່ ຮ່າໂນ້ຍ, ກອງປະຊຸມຫົວໜ້າອົງການໄອຍະການ ບັນດາປະເທດ ອາຊຽນ ແລະ ຈີນ ຄັ້ງທີ 13 ໄດ້ເປີດຂຶ້ນຢ່າງເປັນທາງການ ດ້ວຍຫົວຂໍ້ “ເພີ່ມທະວີການຮ່ວມມືສາກົນໃນການປ້ອງກັນ, ຕ້ານອາຊະຍາກຳເຕັກໂນໂລຊີສູງ ແລະ ອາຊະຍາກຳຂ້າມຊາດ”.

ກອງປະຊຸມໄດ້ສ້າງເວທີປາໄສສາກົນເພື່ອໃຫ້ຫົວໜ້າອົງການໄອຍະການບັນດາປະເທດອາຊຽນ ແລະ ຈີນ ພົບປະໂດຍກົງ, ແລກປ່ຽນ, ຊຸກຍູ້ການເພີ່ມທະວີການພົວພັນມິດຕະພາບ 2 ຝ່າຍ ແລະ ຫຼາຍຝ່າຍ, ແບ່ງປັນຜົນສຳເລັດ ແລະ ຄວາມຫຍຸ້ງຍາກ, ສິ່ງທ້າທາຍໃນການຕໍ່ສູ້, ປ້ອງກັນ, ຕ້ານອາຊະຍາກຳເຕັກໂນໂລຊີສູງຂອງແຕ່ລະປະເທດ; ສະເໜີບັນດາມາດຕະການຮ່ວມມືເພື່ອຊຸກຍູ້ການຕໍ່ສູ້, ປ້ອງກັນ, ຕ້ານອາຊະຍາກຳຂ້າມຊາດທີ່ມີການຈັດຕັ້ງ ເວົ້າລວມ ແລະ ອາຊະຍາກຳເຕັກໂນໂລຊີສູງຂ້າມຊາຍແດນເວົ້າສະເພາະໃຫ້ບັນລຸປະສິດທິຜົນ.