ໂດຍ: ສ. ບຸດປະຊາ

          “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ແມ່ນຄໍາຂວັນສໍາລັບປະທານອາຊຽນຂອງ ສປປ ລາວ ໃນປີ 2024 ທັງແມ່ນຫົວຂໍ້ຂອງການເປັນປະທານອາຊຽນຂອງພວກເຮົາ ຊຶ່ງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ທັງເປັນຮອງປະທານ, ຜູ້ປະຈໍາການ ຄະນະກໍາມະການຊີ້ນໍາລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນຂອງລາວເຮົາ ໃນປີ 2024 ໄດ້ກ່າວໃນການສຳພາດເມື່ອບໍ່ດົນມານີ້ ເຖິງເຫດຜົນວ່າ ເປັນຫຍັງ ຫົວຂໍ້ດັ່ງກ່າວ ຈຶ່ງຖືກຄັດເລືອກມາເປັນຫົວຂໍ້ຂອງກອງປະຊຸມສຸດຍອດອາຊຽນ ຄັ້ງທີ 44.

          ຫົວຂໍ້ຂອງການເປັນປະທານອາຊຽນຂອງພວກເຮົາ, ໄດ້ຮັບການຢືນຢັນຈາກ ທ່ານ ສະເຫຼີມໄຊ ກົມມະສິດ ວ່າ: “ມັນສອດຄ່ອງກັບສະພາບທີ່ເກີດຂຶ້ນ ໃນພາກພື້ນ ແລະ ສາກົນ ຢູ່ໃນປັດຈຸບັນ” ຊຶ່ງເນື້ອໃນໃຈຄວາມທີ່ສ່ອງແສງໃຫ້ເຫັນເຖິງເຫດຜົນ ທີ່ຄັດເລືອກເອົາ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ເປັນຫົວຂໍ້ຂອງກອງປະຊຸມສຸດຍອດອາຊຽນ ຄັ້ງທີ 44 ມີຄື:

ໜຶ່ງແມ່ນ “ການເຊື່ອມໂຍງ-ເຊື່ອມຈອດ”, ອັນນີ້ມັນຖືກກັບໄລຍເວລາ ທີ່ອາຊຽນ ກໍາລັງຈັດຕັ້ງປະຕິບັດ ແຜນແມ່ບົດ ວ່າດ້ວຍການເຊື່ອມຈອດຂອງອາຊຽນ. ລາວເຮົາ, ເປັນປະເທດທີ່ຢູ່ໃຈກາງຂອງພາກພື້ນອາຊີຕາເວັນອອກສ່ຽງໃຕ້, ເຖິງວ່າພວກເຮົາ ບໍ່ແມ່ນປະເທດ ທີ່ມີຊາຍແດນຕິດຈອດກັບທະເລ, ແຕ່ວ່າ ພວກເຮົາ ແມ່ນຈຸດໃຈກາງ. ສະນັ້ນ, ການເອົາຫົວຂໍ້ ການເຊື່ອມຈອດ ເປັນຫົວຂໍ້ຂອງປະທານອາຊຽນຂອງພວກເຮົາ ມັນຕອບສະໜອງບໍ່ສະເພາະແຕ່ອາຊຽນ, ແຕ່ໃນເວລາດຽວກັນນັ້ນ ໃນຖານະທີ່ພວກເຮົາເປັນປະເທດ ທີ່ບໍ່ມີຊາຍແດນຕິດຈອດທະເລ ມັນກໍ່ຕອບສະໜອງຕໍ່ຈຸດປະສົງ ແລະ ເປົ້າໝາຍວິໄສທັດຂອງພັກ, ຂອງລັດເຮົາ ທີ່ຈະຫັນປະເທດພວກເຮົາ ຈາກທີ່ບໍ່ມີຊາຍແດນຕິດຈອດທະເລ ໃຫ້ກາຍເປັນປະເທດເຊື່ອມຈອດ. ໃນປັດຈຸບັນ, ພວກເຮົາ ກໍມີເສັ້ນທາງລົດໄຟ, ພວກເຮົາ ມີແຜນຈະສ້າງແລວເສດຖະກິດ ຕາເວັນອອກ-ຕາເວັນຕົກ, ແລວເສດຖະກິດ ເໜືອ-ໃຕ້. ທັງໝົດນີ້ ເປັນການປະກອບສ່ວນໂດຍລວມ ຕໍ່ການບັນລຸເປົ້າໝາຍຂອງວິໄສທັດອາຊຽນ ວ່າດ້ວຍການເຊື່ອມໂຍງ ເຊື່ອມຈອດ. ສະນັ້ນ, ຈຸດນີ້ ແມ່ນສອດຄ່ອງກັບສະພາບປັດຈຸບັນທີ່ສຸດ.

ສອງແມ່ນ “ຄວາມເຂັ້ມແຂງ”, ເພີ່ມທະວີ ແລະ ສ້າງຄວາມເຂັ້ມແຂງຂອງອາຊຽນ ໃນສະພາບຂອງໂລກ ທີ່ມີຄວາມຂັດແຍ່ງກັນຫຼາຍດ້ານ. ຄວາມເຂັ້ມແຂງຂອງອາຊຽນ ເປັນສິ່ງສໍາຄັນທີ່ສຸດ ໃນປັດຈຸບັນ, ຖ້າວ່າອາຊຽນ ບໍ່ມີຄວາມເຂັ້ມແຂງ, ອາຊຽນ ບໍ່ມີຄວາມເປັນປຶກແຜ່ນຈິດໜຶ່ງໃຈດຽວ ບໍ່ມີຄວາມເປັນເອກະພາບກັນ, ແນ່ນອນ ຈະມີຜົນກະທົບຕໍ່ບົດບາດຂອງອາຊຽນ ຢູ່ໃນພາກພື້ນ ແລະ ສາກົນ. ຄືພວກເຮົາຮູ້ໃນປັດຈຸບັນນີ້, ອາຊຽນ ເປັນອົງການຈັດຕັ້ງລະຫວ່າງລັດຖະບານ ລະດັບພາກພື້ນອັນໜຶ່ງ ຢູ່ໃນໂລກ ທີ່ໄດ້ຮັບຄວາມສົນໃຈຫຼາຍທີ່ສຸດ. ບັນດາປະເທດມະຫາອໍານາດໃນໂລກ ແມ່ນຢາກມີການຮ່ວມມືໂດຍກົງກັບອາຊຽນ ແລະ ໄດ້ສະເໜີຂໍເປັນຄູ່ຮ່ວມເຈລະຈາກັບອາຊຽນ. ຖ້າພວກເຮົາມາເບິ່ງບັນດາປະເທດຄູ່ຮ່ວມເຈລະຈາຂອງອາຊຽນ, ປັດຈຸບັນມີ 11 ປະເທດແລ້ວ. ນອກຈາກນັ້ນ, ຍັງມີອີກຫຼາຍປະເທດ ທີ່ສະເໜີຂໍເຂົ້າເປັນຄູ່ຮ່ວມເຈລະຈາຂອງປະເທດອາຊຽນ. ອັນນັ້ນ, ມັນສະແດງໃຫ້ເຫັນວ່າ: ອາຊຽນ ມີຄວາມສໍາຄັນ, ມີບົດບາດຕໍ່ບັນດາປະເທດຕ່າງໆຢູ່ໃນໂລກ ໂດຍສະເພາະ ແມ່ນປະເທດທີ່ໃຫຍ່, ປະເທດມະຫາອໍານາດ. ສະນັ້ນ, ການເພີ່ມທະວີຄວາມເຂັ້ມແຂງຂອງອາຊຽນ ມີຄວາມສໍາຄັນ, ຖ້າວ່າອາຊຽນ ບໍ່ເຂັ້ມແຂງ, ອາຊຽນຈະບໍ່ມີບົດບາດ.

ດັ່ງນັ້ນ, ສອງຈຸດສອງປະເດັນ, ການເຊື່ອມຈອດ ແລະ ການສ້າງຄວາມເຂັ້ມແຂງຂອງອາຊຽນ ຈຶ່ງແມ່ນຫົວຂໍ້ສໍາຄັນທີ່ສຸດ. ຖ້າວ່າລາວ ສາມາດບັນລຸໄດ້ບັນດາເປົ້າໝາຍ ທີ່ເວົ້າມາຂ້າງເທິງນັ້ນ, ໃນເວລາລາວ ເປັນປະທານອາຊຽນ, ຈະເຮັດໃຫ້ລາວ ຍິ່ງມີບົດບາດສໍາຄັນ ຢູ່ໃນພາກພື້ນ ແລະ ສາກົນ, ບັນດາປະເທດໃນໂລກ ກໍຍິ່ງຈະໃຫ້ຄວາມສໍາຄັນ ແລະ ເຫັນວ່າ: “ລາວ” ມີຄວາມສາມາດໃນການເປັນປະທານອາຊຽນ. ສະນັ້ນ, ຫົວຂໍ້ທີ່ລັດຖະບານເຮົາ ເລືອກມາເປັນຫົວຂໍ້ຂອງປະທານອາຊຽນ ຈຶ່ງມີຄວາມສໍາຄັນຄືແນວນັ້ນ.