ການສຶກສາຢູ່ 7 ປະເທດໄດ້ເຕືອນໃຫ້ຮູ້ວ່າ 72 ເປີເຊັນ ຂອງອາຫານຫວ່າງ ແລະ ຂອງກິນຫຼິ້ນ ທີ່ຂາຍຕາມທ້ອງຕະຫຼາດສໍາລັບເດັກນ້ອຍຕໍ່າກວ່າ 3 ປີ ມີປະລິມານນໍ້າຕານ ແລະ ສານເພີ່ມຄວາມຫວານເປັນສ່ວນປະກອບ.

ການສຶກສາລ່າສຸດໃນເຂດພາກພື້ນໄດ້ສະແດງໃຫ້ເຫັນວ່າອາຫານທີ່ຂາຍຕາມທ້ອງຕະຫຼາດສໍາລັບເດັກນ້ອຍອາຍຸລະຫວ່າງ 6 ເດືອນ ຫາ 3ປີ ໃນຂົງເຂດອາຊີຕາເວັນອອກສ່ຽງໃຕ້ ມີປະລິມານນໍ້າຕານ ແລະ ເກືອໃນປະລິມານທີ່ສູງ, ພ້ອມທັງມີການນໍາໃຊ້ສື່ໂຄສະນາຢ່າງກວ້າງຂວາງເພື່ອຊວນເຊື່ອ ແລະ ຫຼອກລວງ, ຂາດຂໍ້ບັງຄັບທີ່ເຄັ່ງຄັດກ່ຽວກັບການປະກອບການ ແລະ ຄ້າຂາຍຜະລິດຕະພັນອາຫານເສີມສໍາລັບເດັກນ້ອຍ.

ການສຶກສານີ້, ແມ່ນໄດ້ຮັບການສະໜັບສະໜູນຈາກອົງການສະຫະປະຊາຊາດສໍາລັບເດັກ (UNICEF)ແລະ ຄູ່ຮ່ວມງານ ທີ່ເປັນພາຄີໃນການສົ່ງເສີມການໃຫ້ອາຫານເສີມເດັກນ້ອຍໃນເຂດອາຊີຕາເວັນອອກສ່ຽງໃຕ້ (COMMIT), ໄດ້ມີການປະເມີນອາຫານຫວ່າງ, ອາຫານເສີມສໍາເລັດຮູບສໍາລັບເດັກນ້ອຍຫຼາຍກວ່າ 1.600 ລາຍການ ທີ່ຂາຍຕາມທ້ອງຕະຫຼາດຢູ່ປະເທດກໍາປູເຈຍ, ອິນໂດເນເຊຍ, ລາວ,ມາເລເຊຍ, ຟີລິບປິນ, ໄທ ແລະ ຫວຽດນາມ. ນອກນັ້ນຍັງໄດ້ສຶກສາພຶດຕິກໍາຂອງຜູ້ບໍລິໂພກ ແລະ ລະບຽບການທີ່ມີຢູ່ໃນ 7ປະເທດທີ່ໄດ້ເຮັດການສຶກສາ.

ການສຶກສາຄົ້ນຄວ້າພົບວ່າ ເກືອບເຄິ່ງໜຶ່ງຂອງຜະລິດຕະພັນທີ່ໄດ້ສຶກສາ (44 ເປີເຊັນ) ໄດ້ເພີ່ມນໍ້າຕານ ແລະ ສານເພີ່ມຄວາມຫວານໃສ່ໃນອາຫານຫວ່າງ ແລະ ຂອງກິນຫຼິ້ນຫຼາຍເຖິງ 72 ເປີເຊັນ. ເມື່ອກ່າວເຖິງປະລິມານເກືອ, ຫຼາຍກວ່າໜຶ່ງງສ່ວນສາມຂອງຜະລິດຕະພັນທີ່ໄດ້ສຶກສາແມ່ນເພີ່ມທາດໂຊດຽມ ໃນປະລິມານທີ່ສູງກວ່າຂໍ້ແນະນໍາທີ່ກໍານົດໄວ້.

ຍິ່ງໄປກວ່ານັ້ນ, ເກືອບ 90 ເປີເຊັນ ຂອງສະຫຼາກສິນຄ້າຂອງຜະລິດຕະພັນເຫຼົ່ານັ້ນໄດ້ມີເນື້ອຫາໂຄສະນາຊວນເຊື່ອ ແລະ ຫຼອກລວງຄຸນປະໂຫຍດທາງດ້ານໂພຊະນາການຂອງຜະລິດຕະພັນ.

"ໃນ ສປປ ລາວ, ຜະລິດຕະພັນອາຫານຈໍານວນຫຼາຍທີ່ເລັ່ງໃສ່ລູກຫຼານຂອງພວກເຮົາແມ່ນບໍ່ພຽງແຕ່ບໍ່ດີຕໍ່ສຸຂະພາບເທົ່ານັ້ນ ແຕ່ຍັງມີສະຫຼາກໂຄສະນາຊວນເຊື່ອຫຼອກລວງນໍາອີກ" ທ່ານນາງ Pia Rebello Britto ໄດ້ກ່າວວ່າ:"ລູກຫຼານຂອງພວກເຮົາແລະພໍ່ແມ່ຂອງພວກເຂົາມີສິດທີ່ຈະໄດ້ຮັບຂໍ້ມູນທີ່ເປັນຈິງ ແລະ ເລືອກສິ່ງທີ່ດີເພື່ອສຸຂະພາບດີກວ່າ".

ສໍາລັບ ສປປ ລາວ, ບົດລາຍງານໄດ້ລະບຸໃຫ້ເຫັນສະພາບການກິນອາຫານໃນປັດຈຸບັນທີ່ຍັງຂາດແຄນ ໂດຍສະເພາະແມ່ນຂາດຈຸນລະສານອາຫານ ຫຼື ວິຕາມິນແຮ່ທາດ ແລະ ລວມໄປເຖິງການໄດ້ຮັບອິດທິພົນຈາກການໂຄສະນາຜະລິດຕະພັນອາຫານເສີມສໍາລັບເດັກໃນທ້ອງຕະຫຼາດຊຶ່ງມີຜົນຕໍ່ການເລືອກຂອງຜູ້ບໍລິໂພກ. ຂໍ້ບົກຜ່ອງຕ່າງໆ ຍັງລວມໄປເຖິງກອບວຽກດ້ານລະບຽບການໃນລະດັບປະເທດສໍາລັບການຄ້າຂາຍຜະລິດອາຫານອາຫານເສີມສໍາລັບເດັກລວມທັງຊ່ອງຫວ່າງໃນການຄວບຄຸມຕາຕະລາງສະແດງປະເພດ ແລະ ປະລິມານສານອາຫານທີ່ບັນຈຸໃນຜະລິດຕະພັນ, ສະຫຼາກສິນຄ້າ ແລະ ການໂຄສະນາ. ບົດລາຍງານນີ້ຈະຊ່ວຍຊຸກຍູ້ການພັດທະນາມາດຕະຖານແຫ່ງຊາດ ແລະ ຄູ່ມືແນະນໍາທີ່ຄົບຖ້ວນ ເພື່ອຮັບປະກັນໃຫ້ມີການຜະລິດອາຫານເສີມສໍາລັບເດັກທີ່ມີໂພຊະນາການພຽງພໍໃນທ້ອງຕະຫຼາດ ແລະ ມີການສົ່ງເສີມຢ່າງມີຄວາມຮັບຜິດຊອບ.

ການຊື້-ຂາຍຜະລິດຕະພັນອາຫານເສີມສໍາລັບເດັກ ແມ່ນເປັນເລື່ອງປົກະຕິສໍາລັບການໃຫ້ອາຫານແກ່ເດັກນ້ອຍໃນອາຊີຕາເວັນອອກສຽງໃຕ້, 79% ຂອງແມ່ທີ່ອາໄສຢູ່ໃນຕົວເມືອງລາຍງານວ່າພວກເຂົາເຈົ້າໃຫ້ອາຫານເຫຼົ່ານີ້ໃຫ້ແກ່ລູກນ້ອຍຂອງພວກເຂົາໃນແຕ່ລະວັນ. ໃນທົ່ວເຂດອາຊີຕາເວັນອອກສຽງໃຕ້, ການຄ້າຂາຍອາຫານເສີມສໍາລັບເດັກໄດ້ເຕີບໂຕຂຶ້ນເຖິງ 45% ໃນ ໄລຍະ 5ປີ ທີ່ຜ່ານມາ.

ດ້ານລະບຽບການຄຸ້ມຄອງ, ການສຶກສາໄດ້ໃຫ້ຂໍ້ສັງເກດວ່າ: ໃນບັນດາ 7ປະເທດ ແມ່ນບໍ່ມີປະເທດໃດທີ່ມີນະໂຍບາຍແຫ່ງຊາດກ່ຽວກັບການລະບຸປະເພດສານອາຫານທີ່ບັນຈຸ ແລະ ສະຫຼາກສິນຄ້າ ໃສ່ໃນກ່ອງອາຫານເສີມສໍາລັບເດັກທີ່ຜະລິດອອກມາຂາຍ ໂດຍອີງຕາມມາດຕະຖານສາກົນ. ພົບວ່າຫຼາຍປະເທດບໍ່ມີມາດຕະການ ທີ່ຖືກຕ້ອງຕາມກົດຫມາຍເພື່ອຄວບຄຸມປະລິມານສູງສຸດທີ່ອະນຸຍາດໃຫ້ເພີ່ມນ້ໍາຕານ ຫຼື ເກືອ ໃສ່ໃນອາຫານເສີມສຳລັບເດັກທີ່ຜະລິດຂາຍຕາມຕະຫຼາດ. ປະເທດທີ່ມີມາດຕາສ່ວນປະລິມານສູງສຸດຂອງນໍ້າຕານຫຼືເກືອ ແມ່ນມັກຈະນໍາໃຊ້ກັບບາງປະເພດເຊັ່ນ: ອາຫານກ່ອງສໍາເລັດຮູບ(Cereal)ຫຼື ຂອງກິນຫຼິ້ນ ແລະເຫັນວ່າສັດສ່ວນແມ່ນສູງກວ່າມາດຕະຖານສາກົນ. ການໄດ້ຮັບນໍ້າຕານຕັ້ງແຕ່ໄວຍັງນ້ອຍສາມາດສົ່ງຜົນໃຫ້ເປັນພະຍາດແຂ້ວແມງ, ນໍ້າໜັກເພີ່ມຂຶ້ນ ແລະ ພຶດຕິກໍາການກິນທີ່ບໍ່ດີ, ໃນຂະນະດຽວກັນເມື່ອໄດ້ຮັບເກືອໃນປະລິມານທີ່ສູງພາໃຫ້ເປັນຄວາມດັນເລືອດສູງ ຊຶ່ງມີຜົນຕໍ່ການມີອາຍຸຍືນຍາວ.

ນອກນີ້ ຍັງພົບການອ້າງອີງຢ່າງກວ້າງຂວາງ, ຕາມຂໍ້ມູນກ່ຽວກັບຕາຕະລາງປະເພດ ແລະ ປະລິມານສານອາຫານທີ່ປະກອບຢູ່ໃນຜະລິດຕະພັນເກືອບ 90% ທີ່ໄດ້ຮັບການປະເມີນ. ພົບວ່າມີການປະສົມເກືອ ແລະ ໄຂມັນໃນປະລິມານສູງ "ລວມເຖິງຈາກທໍາມະຊາດ", "ແຫຼ່ງທີ່ດີຂອງວິຕາມິນ"ແລະ "ບໍ່ມີສ່ວນປະກອບປອມ." ຍິ່ງໄປກວ່ານັ້ນ, ໃນປະເທດກໍາປູເຈຍ, ຟີລິບປິນ ແລະ ສປປ ລາວ, ຜະລິດຕະພັນສ່ວນໃຫຍ່ແມ່ນໃສ່ຊື່ເປັນພາສາອັງກິດເທົ່ານັ້ນ ຫຼືບໍ່ມີຄໍາອະທິບາຍເປັນພາສາປະຈໍາຊາດ, ສິ່ງນີ້ພາໃຫ້ພໍ່ແມ່ຫຼືຜູ້ປົກຄອງມີຂໍ້ຈໍາກັດໃນການໄດ້ຮັບຂໍ້ມູນຂ່າວສານເພື່ອພິຈາລະນາກ່ອນຈະເລືອກຊື້ຜະລິດຕະພັນອາຫານເສີມເພື່ອຮັບປະກັນໃຫ້ລູກຫຼານໄດ້ຮັບອາຫານທີ່ມີປະໂຫຍດເພື່ອໂພຊະນາການທີ່ດີຂອງພວກເຂົາ.

ຜົນການສຶກສາຄັ້ງນີ້, UNICEF ແລະ ຄູ່ຮ່ວມງານ ທີ່ເປັນພາຄີໃນການສົ່ງເສີມການໃຫ້ອາຫານເສີມເດັກນ້ອຍ (COMMIT)ຂໍຮຽກຮ້ອງໃຫ້:

1. ປັບປຸງລະບຽບການຄຸ້ມຄອງຂອງລັດຖະບານເພື່ອການຄ້າຂາຍຜະລິດຕະພັນອາຫານເສີມສໍາລັບເດັກ, ລວມເຖິງຂໍ້ຫ້າມໃນການເພີ່ມນໍ້າຕານ ແລະ ສານເພີ່ມຄວາມຫວານ,ຈໍາກັດປະລິມານນໍ້າຕານ ແລະ ເກືອແລະ ຫ້າມໂຄສະນາຊວນເຊື່ອ ແລະ ຕິດສະຫຼາກສິນຄ້າ;

2. ລັດຖະບານຄວນເຂັ້ມງວດໃນການຕິດຕາມກວດກາ ແລະ ປະຕິບັດຢ່າງຈິງຈັງ ກ່ຽວກັບລະບຽບການຄຸ້ມຄອງການຄ້າຂາຍອາຫານເສີມສໍາລັບເດັກນ້ອຍ;

3. ສົ່ງເສີມສະໜັບສະໜູນໃຫ້ພໍ່ແມ່ເອົາອາຫານທີ່ຫຼາກຫຼາຍໃຫ້ລູກນ້ອຍຂອງເຂົາເຈົ້າກິນ ແລະ ພິຈາລະນາໃຫ້ຖີ່ຖ້ວນການໂຄສະນາທີ່ບໍ່ຖືກຕ້ອງ ແລະ ກວດເບິ່ງສະຫຼາກສິນຄ້າ.

ຂໍ້ມູນຈາກ: Unicep-ຂ່າວ: ຄຳປະສິດ