ຂ່າວຕ່າງປະເທດລາຍງານວ່າ: ໃນວັນທີ 24 ທັນວາ ຜ່ານມາ, ນັກການທູດລະດັບສູງຂອງມາຣົກ ກັບ ບວກກີນາຟາໂຊ, ຊາດ, ມາລີ ແລະ ນີເຊ ໄດ້ເຫັນດີສົ່ງເສີມການຮ່ວມມືນຳກັນ ຢູ່ກອງປະຊຸມການປະສານງານລະດັບລັດຖະມົນຕີທີ່ຈັດຂຶ້ນທີ່ເມືອງມາຣາເກຊ ທາງພາກໃຕ້ຂອງປະເທດມາຣົກ.

ກອງປະຊຸມໄດ້ເນັ້ນໃສ່ຂໍ້ລິເລີ່ມທີ່ສະເໜີໂດຍເຈົ້າຊີວິດ ໂມຮາເມັດທີ VI ໃນເດືອນພະຈິກ ກ່ອນໜ້ານີ້. ທ່ານໄດ້ແນະນຳໃຫ້ມີຂໍ້ລິເລີ່ມລະດັບສາກົນເພື່ອຮັບປະກັນໃຫ້ກຸ່ມປະເທດຊາເຮນ ມີທາງອອກສູ່ມະຫາສະໝຸດອັດລັງຕິກ.

ເຈົ້າຊີວິດໄດ້ເນັ້ນໜັກວ່າ: ຜົນສຳເລັດແມ່ນຂຶ້ນຢູ່ກັບຂໍ້ລິເລີ່ມໃນການປັບປຸງໂຄງລ່າງພື້ນຖານຂອງກຸ່ມປະເທດຊາເຮນ ແລະ ເປັນການສະແຫວງຫາການເຊື່ອມໂຍງເຄືອຂ່າຍການຄົມມະນາຄົມຂົນສົ່ງທີ່ມີຢູ່ຂອງພາກພື້ນນີ້.

ໃນຖະແຫຼງການຮ່ວມຫຼັງຈາກກອງປະຊຸມ, ບັນດານັກການທູດລະດັບສູງໄດ້ສະແດງຄວາມຂອບໃຈຕໍ່ຄວາມພະຍາຍາມຂອງປະເທດມາຣົກທີ່ຈະເຮັດໃຫ້ໂຄງລ່າງພື້ນຖານທີ່ມີຢູ່ເຊັ່ນ: ຖະໜົນຫົນທາງ, ທ່າເຮືອ ແລະ ທາງລົດໄຟຂອງກຸ່ມປະເທດຊາເຮນ ສາມາດນຳໃຊ້ເຮັດການຄ້າກັບສາກົນເພີ່ມຂຶ້ນ. ດັ່ງນັ້ນ, ພວກເຂົາເຈົ້າຈຶ່ງເຫັນດີສ້າງໜ່ວຍສະເພາະກິດຂອງແຕ່ລະປະເທດເພື່ອສົ່ງເສີມການຈັດຕັ້ງປະຕິບັດຂໍ້ລິເລີ່ມດັ່ງກ່່າວ.

ພາກພື້ນຊາເຮນ ແມ່ນພາກພື້ນທີ່ຂ້ອນຂ້າງແຫ້ງແລ້ງໃນທະວີບອາຟຣິກກາກາງ - ເໜືອ ແລະ ຕາເວັນຕົກ ຊຶ່ງປະກອບດ້ວຍປະເທດບວກກີນາຟາໂຊ, ຊາດ, ມາລີ, ນີເຊ. ພາກພື້ນແຫ່ງນີ້ໄດ້ປະເຊີນກັບສິ່ງທ້າທາຍຢ່າງຫຼວງຫຼາຍເຊັ່ນ: ຄວາມທຸກຍາກ, ການພັດທະນາ, ການປ່ຽນແປງຂອງດິນຟ້າອາກາດ.