ຂ່າວຕ່າງປະເທດລາຍງານວ່າ: ໃນວັນທີ 24 ທັນວາ ຜ່ານມາ, ທ່ານ ອັບເດວເມດຈິດ ເທບບູນ ປະທານາທິບໍດີ ອານເຊຣີ ໄດ້ລົງນາມໃນກົດໝາຍງົບປະມານ 2024 ໂດຍຄາດຄະເນວ່າເສດຖະກິດແຫ່ງຊາດຈະເຕີບໂຕ 4,2% ຊຶ່ງຮ່າງກົດໝາຍໄດ້ຖືກຮັບຮອງໂດຍທັງສອງສະພາໃນຕົ້ນເດືອນພະຈິກນີ້. ການຄາດຄະເນການເຕີບໂຕແມ່ນອີງໃສ່ຜົນໄດ້ຮັບຂອງທຸກຂະແໜງການເຊັ່ນ: ຂະແໜງການບໍລິການ, ກະສິກຳ, ໂຍທາທິການ ແລະ ອຸດສາຫະກຳທີ່ມີຄວາມໂດດເດັ່ນ.

ຄາດຄະເນວ່າການໃຊ້ຈ່າຍງົບປະມານຈະເພີ່ມຂຶ້ນເຖິງ 113,6 ຕື້ໂດລາ ໃນປີງົບປະມານ 2024 ໂດຍອີງຕາມອັດຕາແລກປ່ຽນໃນປັດຈຸບັນ. ສ່ວນວ່າລາຍຮັບພາກລັດຈະໄດ້ 67,7 ຕື້ໂດລາ. ອານເຊຣີ ຄາດຄະເນວ່າ: ໃນປີ 2024, ການສົ່ງອອກຈະມີມູນຄ່າເຖິງ 49,8 ຕື້ໂດລາ ແລະ ການນຳເຂົ້າທັງໝົດຈະມີເຖິງ 43,5 ຕື້ໂດລາ, ຄາດຄະເນວ່າຈະໄດ້ປຽບດຸນການຄ້າ 6,3 ຕື້ໂດລາ.

ອານເຊຣີ ໄດ້ກຳນົດລາຄານ້ຳມັນທີ່ມີຄວາມແຕກຕ່າງກັນ, ສຳລັບນ້ຳມັນດິບແມ່ນ 60 ໂດລາຕໍ່ບາເຣວ ແຕ່ປີ 2024-2026. ນັກສັງເກດການໄດ້ລະບຸວ່າ: ກົດໝາຍສະບັບນີ້ມີຂຶ້ນທ່າມກາງເສດຖະກິດອານເຊຣີໄດ້ຟື້ນຄືນຍ້ອນລາຄານ້ຳມັນເພີ່ມຂຶ້ນ ແລະ ການໄດ້ປຽບດຸນການຄ້າກຳລັງເພີ່ມຂຶ້ນຢ່າງໄວວາ.