ໃນລະຫວ່າງວັນທີ 26-27 ທັນວານີ້, ຄະນະຜູ້ແທນໜັງສືພິມ ເຍິນເຢິນ ສຽງຂອງພັກ-ລັດ ແລະ ປະຊາຊົນຫວຽດນາມ ນໍາໂດຍ ສະຫາຍ ດິງ ຍື ຮວານ ຮອງຫົວໜ້າບັນນາທິການໃຫຍ່ ພ້ອມຄະນະ ໄດ້ຢ້ຽມຢາມແຂວຊຽງຂວາງ ເພື່ອເປັນການເສີມຂະຫຍາຍຄວາມການຮ່ວມມືສູ່ທ້ອງຖິ່ນພື້ນຖານການປະຕິວັດ ຄືດັ່ງແຂວງຊຽງຊວາງ ພ້ອມທ່ຽວຊົມແຫຼ່ງທ່ອງທ່ຽວຕ່າງໆ ທີ່ເປັນຈຸດເດັ່ນຂອງແຂວງ.    ການມາຢ້ຽມຢາມແຂວງຊຽງຂວາງຄັ້ງນີ້, ຄະນະດັ່ງກ່າວ ໄດ້ພົບປະໂອ້ລົມກັບ ສະຫາຍ ນາງ ພວງພະຈັນ ມູນທະວົງ ຫົວໜ້າຄະນະໂຄສະນາອົບຮົມແຂວງຊຽງຂວາງ. ໂອກາດນີ້, ສະຫາຍຫົວໜ້າຄະນະໂຄສະນາອົບຮົມແຂວງ ກໍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມແຂວງຊຽງຂວາງ ຂອງຄະນະຜູ້ແທນດັ່ງກ່າວ ຊຶ່ງເປັນການປະກອບສ່ວນເສີມຂະຫຍາຍສາຍພົວພັນອັນຍິ່ງໃຫຍ່, ຄຕວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້ນລວມ, ເວົ້າສະເພາະແມ່ນການພົວພັນຮ່ວມມືລະຫວ່າງແຂວງຊຽງຂວາງ ກັບຫນັງສືພິມເຍິນເຢິນ.
ສະຫາຍ ດິງ ຍື ຮວານ ກໍໄດ້ຕາງໜ້າຄະນະ ຂອບໃຈຕໍ່ຫົວໜ້າຄະນະໂຄສະນາອົບຮົມແຂວງຊຽງຂວາງ ທີ່ໄດ້ໃຫ້ການຕ້ອນຮັບ; ພ້ອມດຽວກັນ, ກໍໄດ້ແຈ້ງໃຫ້ຊາບ ກ່ຽວກັບການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃຫ້ສະຫາຍຫົວຫນ້າ ຄະນະໂຄສະນາອົບຮົມແຂວງຊຽງຂວາງ ໄດ້ຮັບຊາບ.
    ກ່ອນການພົບ, ຄະນະຜູ້ແທນດັ່ງກ່າວໄດ້ນໍາເອົາກະຕ່າໝາກໄມ້ ໄປວາງໄວ້ຕໍ່ໜ້າອະນຸສາວະລີຮ່ວມສໍາພັນສູ້ຮົບ ລາວ-ຫວຽດນາມ ເພື່ອເຄົາລົບ ແລະ ໄຫວ້ອາໄລ ເຖິງດວງວິນຍານຂອງບັນດາສະຫາຍນັກຮົບນິລະນາມ ທີ່ໄດ້ເສຍສະຫຼະຊີວິດໃນໄລຍະທີ່ມາເຄື່ອນໄຫວພາລະກິດສາກົນ, ຊ່ວຍປວງຊົນລາວຕໍ່ສູ້ຕ້ານຈັກກະພັດຜູ້ຮຸກຮານ. ໃນສະໄໝສົງຄາມຕ້ານຈັກກະພັດຜູ້ຮຸກຮານ ເພື່ອປົດປ່ອຍປະເທດລາວ, ບັນດາສະຫາຍພະນັກງານ, ນັກຮົບອາສາສະໝັກ ແລະ ຊ່ຽວຊານຫວຽດນາມ ໄດ້ຄຽງບ່າຄຽງໄຫຼ່ກັບກອງທັບປະຊາຊົນລາວ ອ້າຍນ້ອງ ສູ້ຮົບຢ່າງພິລະອາດຫານ ແລະ ໄດ້ເສຍສະຫຼະຊິວິດ ເພື່ອພາລະກິດສາກົນອັນສູງສົ່ງ. 
    ການເຄື່ອນໄຫວຢູ່ແຂວງຊຽງຂວາງຄັ້ງນີ້, ຄະນະຜູ້ແທນດັ່ງກ່າວ ໄດ້ໄປຈຸດຊົມວິວແຂວງຊຽງຂວາງ ທີ່ໂຮງແຮມຊຽງຂວາງວິວ; ໄປທັດສະນະທ່ຽວຊົມອະນຸສາວະລີຣັດເຊຍ ແລະ ທ່ຽວຊົມສະຖານທີ່ທ່ອງທ່ຽວທີ່ມີຊື່ສຽງຂອງແຂວງຊຽງຂວາງຈຳນວນຫນຶ່ງ.
 (ຂ່າວ-ພາບ: ສຸກສະຫວັນ)