ຂ່າວຕ່່າງປະເທດລາຍງານວ່າ: ໃນວັນທີ 27 ທັນວາ ຜ່ານມາ, ທ່ານ ເຊີເກ ລັຟລອຟ ລັດຖະມົນຕີກະຊວງການຕ່າງປະເທດຣັດເຊຍ ແລະ ທ່ານ ໄຊສັງການ ລັດຖະມົນຕີກະຊວງການຕ່າງປະເທດອິນເດຍ ໄດ້ສົນທະນາກັນກ່ຽວກັບການຮ່ວມມືສອງຝ່າຍ. ລັດຖະມົນຕີທັງສອງໄດ້ປຶກສາຫາລືກັນຫຼາຍດ້ານກ່ຽວກັບການຮ່ວມມືທາງດ້ານເຕັກນິກການທະຫານ, ລວມເຖິງການຜະລິດອາວຸດທີ່ທັນສະໄໝຮ່ວມກັນ, ການຮ່ວມມືໃນຂົງເຂດນີ້ແມ່ນກ່ຽວຂ້ອງກັບຜົນປະໂຫຍດແຫ່ງຊາດຂອງສອງປະເທດ ແລະ ເປັນການປົກປັກຮັກສາຄວາມໝັ້ນຄົງຂອງທະວີບອາຊີ-ເອີຣົບ.

ທ່ານ ລັຟລອຟ ກ່າວວ່າ: ຣັດເຊຍ ແລະ ອິນເດຍ ໄດ້ເຫັນດີນຳກັນທີ່ຈະສືບຕໍ່ລົງເລິກພົວພັນທາງດ້ານການຄ້າ, ເສດຖະກິດ ແລະ ການລົງທຶນ. ສາຍພົວພັນລະຫວ່າງສອງປະເທດໄດ້ສ້າງຂຶ້ນບົນພື້ນຖານຄວາມໄວ້ເນື້ອເຊື່ອໃຈກັນ ແລະ ເຄົາລົບຊຶ່ງກັນ ແລະ ກັນ,ແລະ ບໍ່ມີເປົ້າໝາຍເພື່ອສ້າງອິດທິພົນຕໍ່ກັບພາຍນອກ.

ທ່ານ ໄຈສັງການ ກ່າວວ່າ: ປັດຈຸບັນນີ້, ການຄ້າສອງຝ່າຍລະຫວ່າງອິນເດຍ ແລະ ຣັດເຊຍ ແມ່ນຢູ່ໃນລະດັບສູງສຸດ, ໃນປີນີ້ ຄາດຄະເນວ່າຈະກາຍ 50 ຕື້ໂດລາ. ທ່ານ ລັຟລອຟ ກ່າວວ່າ: ສອງປະເທດໄດ້ປຶກສາຫາລືກັນກ່ຽວກັບການຮ່ວມມືດ້ານພະລັງງານໂດຍສະເພາະແມ່ນການສົ່ງອອກນ້ຳມັນ, ແກັສ ແລະ ພະລັງງານນີວເຄລຍ ທີ່ໃຊ້ໃນທາງສັນຕິ.