ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 28 ທັນວາ ຜ່ານມາ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເຂົ້າຮ່ວມກອງປະຊຸມສະຫຼຸບວຽກງານຂະແໜງຄົມມະນາຄົມຂົນສົ່ງ. ທ່ານ ຫງວຽນວັນຖັງ ລັດຖະມົນຕີກະຊວງຄົມມະນາຄົມຂົນສົ່ງ ຫວຽດນາມ ກ່າວຄຳເຫັນເປີດກອງປະຊຸມວ່າ: ປີນີ້, ຂະແໜງຄົມມະນາຄົມຂົນສົ່ງໄດ້ເລີ່ມກໍ່ສ້າງ 26 ໂຄງການ, ໃນນັ້ນ ມີໂຄງການທາງດ່ວນເໜືອ - ໃຕ້ທາງທິດຕາເວັນອອກ ໄລຍະທີ 2; ບັນດາໂຄງການທາງດ່ວນເສັ້ນຕາເວັນອອກ - ຕາເວັນຕົກ; ບັນດາເສັ້ນທາງອ້ອມຮອບຕົວເມືອງ ຢູ່ຮ່າໂນ້ຍ, ນະຄອນ ໂຮ່ຈີມິນ ໄດ້ກໍ່ສ້າງສຳເລັດ ແລະ ໃຊ້ງານ 20 ໂຄງການ.
ການເຄື່ອນໄຫວຂົນສົ່ງສືບຕໍ່ຮັກສາທ່າເຕີບໂຕເປັນປົກກະຕິຕິດພັນກັບການຫຼຸດຜ່ອນຫຼາຍລະບຽບການບໍລິຫານ, ຄ່າທຳນຽມ, ຊຸກຍູ້ການໝູນໃຊ້ເຕັກໂນໂລຊີຂໍ້ມູນຂ່າວສານ. ຮອດທ້າຍເດືອນພະຈິກ 2023, ປະລິມານສິນຄ້າເພີ່ມຂຶ້ນ 12,9%, ອັດຕາໝູນວຽນສິນຄ້າເພີ່ມຂຶ້ນ 10,5% ເມື່ອທຽບໃສ່ໄລຍະດຽວກັນ, ຈຳນວນຜູ້ໂດຍສານກໍເພີ່ມຂຶ້ນ 11,5%, ວຽກງານການຮ່ວມມືສາກົນ ໄດ້ຮັບການຊຸກຍູ້ ແລະ ກະຊວງກໍໄດ້ລົງນາມໃນສົນທິສັນຍາສາກົນ 10 ຂໍ້ ແລະ ຂໍ້ຕົກລົງສາກົນກ່ຽວກັບການຄົມມະນາຄົມຂົນສົ່ງ 3 ສະບັບ.
ກ່ຽວກັບທິດທາງຜັນຂະຫຍາຍໜ້າທີ່ໃນປີ 2024, ທ່ານ ຟ້າມມິງຈິງ ໄດ້ເນັ້ນໜັກວ່າ: ຂະແໜງຄົມມະນາຄົມຂົນສົ່ງຕ້ອງຊຸກຍູ້ກວ່າເກົ່າອີກ, ຖືນະວັດຕະກຳ, ວິທະຍາສາດເຕັກໂນໂລຊີແມ່ນກຳລັງໜູນ, ແຫຼ່ງກຳລັງ, ການນຳພາໃນການສຳຫຼວດ, ອອກແບບ, ຈັດຕັ້ງປະຕິບັດ, ຕິດຕາມກວດກາ, ບັນດາກິດຈະກຳຈຸດສຸມປະກອບສ່ວນຮັບປະກັນຄວາມຄືບໜ້າ, ຄຸນນະພາບ, ຫຼຸດລາຍຈ່າຍ, ຮັບປະກັນພັດທະນາບັນດາກິດຈະກຳ, ໂຄງການຄົມມະນາຄົມຢ່າງວ່ອງໄວ ແລະ ຍືນຍົງ.