ວິທະຍຸກະຈາຍສຽງຫວຽດນາມລາຍງານວ່າ: ບັນຍາກາດການກະກຽມຕ້ອນຮັບປີໃໝ່ 2024 ຢູ່ ຊິດນີ ປະເທດອົສຕຣາລີ ຊຶ່ງເປັນໜຶ່ງໃນບັນດານະຄອນໃຫຍ່ໃນໂລກໄດ້ຕ້ອນຮັບປີໃໝ່ໄວກ່ອນໝູ່ ຄືແຕ່ 8 ໂມງເຊົ້າຂອງວັນທີ 31 ທັນວາ, ຫຼາຍຄົນໄດ້ເຕົ້າໂຮມກັນຢູ່ທ່າກ່ຳປັ່ນ ໄຄຣຄູລາ (Circular) ເພື່ອຊອກບ່ອນຊົມການຍິງບັ້ງໄຟດອກໃນຄ່ຳຄືນສົ່ງທ້າຍປີເກົ່າຕ້ອນຮັບປີໃໝ່.

ສ່ວນຢູ່ ຍີ່ປຸ່ນ, ວັນສຸດທ້າຍຂອງປີ 2023, ປະຊາຊົນກະກຽມພາເຂົ້າໃນຄອບຄົວເພື່ອສົ່ງທ້າຍປີເກົ່າ ຕ້ອນຮັບປີໃໝ່ . ໃນຕອນເຊົ້າ, ຫຼາຍຄົນໄດ້ພາກັນມາຊື້ເຄື່ອງຂອງ ໃນບັນດາຮ້ານຊັບພະສິນຄ້າຢູ່ນະຄອນຫຼວງໂຕກຽວ, ພິເສດແມ່ນສະບຽງອາຫານ. ປະຊາຊົນ ຍີ່ປຸ່ນ ມັກກິນ ຊູຊິ (Sushi) ໃນຄາບເຂົ້າສຸດທ້າຍຂອງປີພ້ອມກັບສະມາຊິກໃນຄອບຄົວ ຫຼື ເປັນຂອງຕ້ອນເມື່ອເຂົ້າຮ່ວມຄາບເຂົ້າຍາມທ້າຍປີ.

ໃນຂະນະທີ່, ບາງນະຄອນໃຫຍ່ ໃນອາເມຣິກາ ໄດ້ຜັນຂະຫຍາຍບັນດາມາດຕະການປ້ອງກັນຄວາມສະຫງົບຄວາມປອດໄພ ເພື່ອແນໃສ່ຮັບປະກັນວ່າປະຊາຊົນໄດ້ຕ້ອນຮັບປີໃໝ່ 2024 ດ້ວຍຄວາມມ່ວນຊື່ນ. ບັນດາມາດຕະການດັ່ງກ່າວໄດ້ດຳເນີນໃນຂະນະທີ່ອົງການສືບສວນ (FBI) ແລະ ບາງອົງການດ້ານການປ້ອງກັນຄວາມສະຫງົບຂອງ ອາເມຣິກາ ກ່າວເຕືອນກ່ຽວກັບໄພນາບຂູ່ອາດຈະເກີດຂຶ້ນໃນວັນບຸນ.

ສ່ວນຢູ່ ຝຣັ່ງ, ອຳນາດການປົກຄອງກໍຜັນຂະຫຍາຍຕຳຫຼວດຫຼາຍກ່ວາ 90.000 ຄົນໃນທົ່ວປະເທດ, ໃນນັ້ນ, ສະເພາະຢູ່ນະຄອນຫຼວງ ປາຣີ ແມ່ນ 50.000 ຄົນ, ເພື່ອຮັບປະກັນຄວາມປອດໄພ ໃນບັນດາການເຄື່ອນໄຫວຕ້ອນຮັບປີໃໝ່ 2024 ໃນສະພາບຖືກກ່າວເຕືອນໄພກໍ່ການຮ້າຍຢູ່ໃນລະດັບສູງສຸດ.