ຂ່າວຕ່່າງປະເທດລາຍງານວ່າ: ໃນວັນທີ 1 ມັງກອນ 2024,ທ່ານ ໂຈນັສ ກາ ສະຕໍ ນາຍົກລັດຖະມົນຕີນອກແວໄດ້ກ່າວປາໄສເນື່ອງໃນໂອກາດປີໃໝ່ສາກົນວ່າ: ລັດຖະບານນອກແວຈະປະຕິບັດໜ້າທີ່ໃຫ້ດີທີ່ສຸດເພື່ອສ້າງໂອກາດການມີວຽກເຮັດງານທຳ ແລະ ເລັ່ງຈັດຕັ້ງປະຕິບັດມາດຕະການກ່ຽວກັບດິນຟ້າອາກາດ.
    ໃນຄຳປາໄສທີ່ຖ່າຍທອດສົດໄປທົ່ວປະເທດ,ທ່ານ ສະຕໍໄດ້ຊີ້ໃຫ້ເຫັນເຖິງບັນຫາທ້າທາຍຢ່າງຫລວງຫລາຍຂອງປີຜ່ານມາ,ໂດຍຊີ້ໃຫ້ເຫັນເຖິງຄວາມຂັດແຍ້ງທົ່ວໂລກ,ຄວາມບໍ່ມີສະຖຽນລະພາບທາງດ້ານເສດຖະກິດ, ຜົນທີ່ຕາມມາຈາກການລະບາດຂອງພະຍາດ,ລາຄາເຄື່ອງຕ່າງໆເພີ່ມຂຶ້ນອັນໄດ້ສົ່ງຜົນກະທົບຕໍ່ງົບປະມານຂອງແຕ່ລະຄອບຄົວ ແລະ ຕໍ່ປະເທດຊາດ ແລະ ຍອມຮັບວ່າ ຫລາຍຄົນໄດ້ປະເຊີນກັບບັນຫາຫຍຸ້ງຍາກດ້ານການເງິນ, ທ່່ານນາຍົກໄດ້ກ່າວຄຳເຫັນເຖິງຈຸດພິກຜັນກ່ຽວກັບເສດຖະກິດຂອງນອກແວໄປໃນທິດທາງທີ່ດີໂດຍເນັ້ນວ່າ: ລັດຖະບານໄດ້ມີຄວາມພະຍາຍາມໃນການແກ້ໄຂໄພເງິນເຟີ້, ຫລຸດອັດຕາດອກເບ້ຍ,ທັງໄດ້ຄາດຄະເນກ່ຽວກັບການຟື້ນຟູເສດຖະກິດຂອງປະເທດໃຫ້ມີສະຖຽນລະພາບ.
    ກ່ຽວກັບການສ້າງວຽກເຮັດງານທຳ, ທ່ານນາຍົກລັດຖະມົນຕີໄດ້ປະກາດແຜນປັບປ່ຽນບົດບາດການເຮັດວຽກແບບຊົ່ວຄັ້ງຊົ່ວຄາວເປັນການເຮັກວຽກແບບເຕັມເວລາ ແລະ ການສ້າງວຽກເຮັດງານທຳໃຫ້ຫລາຍຂຶ້ນ.ໂດຍສະເພາະແມ່ນຊາວໜຸ່ມ.
    ທ່ານນາຍົກຍັງໄດ້ກ່າວສະແດງຄວາມເປັນຫ່ວງກ່ຽວກັບການປ່ຽນແປງຂອງດິນຟ້າອາກາດທີ່ມີຕໍ່ຊາວໜຸ່ມຮຸ່ນຖັດໄປ, ການສູນເສຍຄວາມຫລາກຫລາຍທາງຊີວະພາບ, ມົນລະພິດທາງມະຫາສະໝຸດທີ່ເກີດຈາກພາສຕິກ, ຄຸນນະພາບອາກາດພາຍໃນຕົວເມືອງ, ທ່ານໄດ້ໃຫ້ຄຳໝັ້ນສັນຍາວ່າ: ຈະປະຕິບັດການແກ້ໄຂບັນຫາເຫລົ່ານີ້ໃຫ້ດີ. ໂດຍເນັ້ນ  ໜັກວ່າການປະຕິບັດງານກ່ຽວກັບດິນຟ້າອາກາດຕ້ອງສາມາດແກ້ໄຂສະພາບການປ່ຽນແປງຂອງດິນຟ້າອາກາດໃນປະຈຸບັນໃຫ້ໄດ້ດີຂື້ນກວ່ານີ້.