ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມາ, ຜູ້ຊ່ຽວຊານດ້ານອຸດສາຫະກຳການທ່ອງທ່ຽວຂອງຕວັກກີໄດ້ເປີດເຜີຍບົດລາຍງານໂດຍລະບຸວ່າ ຕວັກກີຈະສາມາດດຶງດູດນັກທ່ອງທ່ຽວຫຼາຍເຖິງ 800 ລ້ານຄົນໃນອີກ 10 ປີຂ້າງໜ້າດ້ວຍການເພີ່ມຂີດຄວາມສາມາດ ແລະ ສ້າງຂໍ້ສະເໜີທີ່ຫຼາກຫຼາຍ.

            ທ່ານ ໂອຢາ ນາຣິນ ປະທານສະມາຄົມນັກລົງທຶນດ້ານການທ່ອງທ່ຽວຂອງຕວັກກີໄດ້ເປີດເຜີຍວ່າ ການບັນລຸເປົ້າໝາຍນີ້ຕ້ອງອາໄສການຍົກລະດັບ ແລະ ການສ້າງຄວາມຫຼາກຫຼາຍໃຫ້ກັບຂີດຄວາມສາມາດປັດຈຸບັນດ້ວຍການສ້າງພື້ນທີ່ການທ່ອງທ່ຽວທີ່ແຕກຕ່າງກັນ. ທ່ານ ນາຣິນ ກ່າວຕື່ມວ່າ ຕວັກກີໄດ້ສະເໜີໂຕເລືອກການທ່ອງທ່ຽວທີ່ຫຼາກຫຼາຍຢູ່ແລ້ວເຊັ່ນ ການທ່ອງທ່ຽວແຄມທະເລ, ສຸຂະພາບ ແລະ ວັດທະນະທຳ ໂດຍຜູ້ທີ່ກ່ຽວຂ້ອງພາຍໃນພາກສ່ວນດັ່ງກ່າວກຳລັງເຮັດວຽກເພື່ອເພີ່ມໂຕເລືອກເຫຼົ່ານີ້ເຊັ່ນ ການສົ່ງເສີມການທ່ອງທ່ຽວເພື່ອຜູ້ສູງອາຍຸ ແລະ ການທ່ອງທ່ຽວຮູບແບບອາຫານພ້ອມທັງເປີດເຜີຍໂຕເລກການຄາດຄະເນວ່າ ການທ່ອງທ່ຽວຈະກວມອັດຕາສ່ວນ 7,5% ຂອງລວມຍອດຜະລິດຕະພັນແຫ່ງຊາດ (GNP) ພາຍໃນປີ 2028 ເພີ່ມຈາກໂຕເລກປັດຈຸບັນທີ່ 5,5% ຂະນະທີ່ລາຍໄດ້ຈາກການທ່ອງທ່ຽວອາດຈະສູງເຖິງ 1 ແສນລ້ານໂດລາ. ກະຊວງວັດທະນະທຳ ແລະ ການທ່ອງທ່ຽວຂອງຕວັກກີລະບຸວ່າ ເປົ້າ ໝາຍການທ່ອງທ່ຽວປີ 2023 ຂອງຕວັກກີໄດ້ແກ່ ການຮອງຮັບຊາວຕ່າງຊາດ 60 ລ້ານຄົນ ສ້າງລາຍໄດ້ 5,56 ໝື່ນລ້ານໂດລາ ໂດຍທ່ານ ເມເມັດ ນູຣີ ເອີຊອຍ ລັດຖະມັນຕີກະຊວງວັດທະນະທຳ ແລະ ການທ່ອງທ່ຽວຂອງຕວັກກີກ່າວວ່າ ຕວັກກີໃກ້ຈະບັນລຸເປົ້າໝາຍນີ້ແລ້ວ ເຖິງແມ່ນວ່າຈະປະເຊີນກັບຄວາມທ້າທາຍຈາກແຜ່ນດິນໄຫວທາງພາກໃຕ້ເຖິງສອງຄັ້ງໃນເດືອນກຸມພາ2023 ແລະ ວິກິດການສະຖານະການໂລກ.

            ທັງນີ້, ໂດຍອີງຕາມຂໍ້ມູນຫຼ້າສຸດຈາກກະຊວງວັດທະນະທຳ ແລະ ການທ່ອງທ່ຽວຂອງຕວັກກີເປີດເຜີຍວ່າ ຕວັກກີດຶງດູດນັກທ່ອງທ່ຽວ 52,7 ລ້ານຄົນ ໃນໄລຍະ 11 ເດືອນທຳອິດຂອງປີນີ້.