ຂ່າວຕ່່າງປະເທດລາຍງານໂດຍອີງຕາມຂ້ໍມູນຈາກກົມການທ່ອງທ່ຽວໃຫ້ຮູ້ໃນວັນທີ 2 ມັງກອນ 2024 ວ່າ: ໃນປີ 2023, ຟິລິບປິນມີລາຍຮັບເພີ່ມຂຶ້ນຈາກການຕ້ອນຮັບນັກທ່ອງທ່ຽວຕ່າງປະເທດ 8,67 ຕື້ໂດລາ. ໃນປີ 2023 ມີນັກທ່ອງທ່ຽວຕ່າງປະເທດເຂົ້າມາຟິລິບປິນ 5,4 ລ້ານຄົນ.
    ທ່ານ ຄຣີສຕີນາ ກາເຊຍ ຟຣັສໂກ ລັດຖະມົນຕີກະຊວງທ່ອງທ່ຽວຟິລິບປິນກ່າວວ່າ: ຕັ້ງແຕ່ວັນທີ 1 ມັງກອນຫາວັນທີ 31 ທັນວາ 2023,ມີນັກທ່ອງທ່ຽວຕ່າງປະເທດເຂົ້າມາຟິລິບປິນ 5.450.557 ຄົນ. ໃນນັ້ນ 91,8% ແມ່ນນັກທ່ອງທ່ຽວຕ່າງປະເທດ ເຫລືອຈາກນັ້ນແມ່ນຊາວຟິລິບປິນທີ່ອາໄສຢູ່ຕ່າງປະເທດ, ບັນລຸເປົ້າໝາຍຂອງປະເທດທີ່ຈະຕ້ອນຮັບນັກທ່ອງທ່ຽວຕ່າງປະເທດໃນປີ 2023 ໃຫ້ໄດ້ 4,8 ລ້ານຄົນ.
    ທ່ານລັດຖະມົນຕີກ່າວວ່າ: ປີ 2023 ແມ່ນໄຊຊະນະຂອງອຸດສາຫະກຳການທ່ອງທ່ຽວຂອງຟິລິບປິນຍ້ອນສາມາດຕ້ອນຮັບນັກທ່ອງທ່ຽວຕ່າງປະເທດໄດ້ຫລາຍກວ່າ 5 ລ້ານຄົນ. ສ.ເກົາຫລີ ຍັງແມ່ນກຸ່ມນັກທ່ອງທ່ຽວຕ່າງປະເທດທີ່ມາທ່ຽວຟິລິບປິນຫລາຍສຸດ, ຮອງລົງມາແມ່ນອາເມຣິກາ, ຍີ່ປຸ່ນ,ອົສຕຣາລີ ແລະ ຈີນ.
    ທ່ານຍັງກ່າວວ່າ: ອຸດສາຫະກຳທ່ອງທ່ຽວຂອງປະເທດສາມາດຟື້ນຄືນໄດ້ 66% ຈາກໄລຍະທີ່ບັນລຸຈຸດສູງສຸດໃນປີ 2019 ກ່ອນການລະບາດຂອງພະຍາດໂຄວິດ 19 , ຟິລິບປິນມີລາຍຮັບຈາກນັກທ່ອງທ່ຽວສາກົນໃນປີ 2019 ແມ່ນ 8,66 ຕື້ໂດລາ. ສຳລັບປີ 2024, ອົງການທ່ອງທ່ຽວຟິລິບປິນຕັ້ງເປົ້າໝາຍວ່າຈະສາມາດຕ້ອນຮັບນັກທ່ອງທ່ຽວຕ່າງປະເທດໃຫ້ໄດ້ 7,7 ລ້ານຄົນ.