ຂ່າວຕ່າງປະເທດລາຍງານ ເມື່ອທ້າຍອາທິດທີ່ຜ່ານມາ, ທາງການມຽນມາໄດ້ເປີດເຜີຍບົດລາຍງານໂດຍລະບຸວ່າ ມຽນມາກະກຽມພື້ນທີ່ປູກກາເຟໃນຫຼາຍເຂດ ແລະ ຫຼາຍລັດໃນປີນີ້ ໂດຍທ່ານພົນເອກ ມິນ ອ່ອງລາຍ ປະທານສະພາບໍລິຫານແຫ່ງລັດຂອງມຽນມາລະບຸວ່າ ກຳລັງມີການດຳເນີນມາດຕະການຕ່າງໆເພື່ອເພີ່ມພື້ນທີ່ປູກກາເຟ ໃນປີ 2024.
    ບົດລາຍງານລະບຸວ່າ ການເພີ່ມພື້ນທີ່ປູຸກຝັງຄັ້ງນີ້ ຈະສາມາດສ້າງປະໂຫຍດໄດ້ໃນອະນາຄົດ. ທ່ານ ມິນ ອ່ອງລາຍ ຍັງກ່າວວ່າຈະສົ່ງເສີມການລົງທຶນ ໃນການຜະລິດກາເຟຂອງປະເທດໂດຍລະບຸວ່າ ມີທີ່ດິນຈັດສັນພ້ອມສຳລັບການປູກຝັງ. ມຽນມາ ປູກກາເຟສ່ວນຫຼາຍແມ່ນຢູ່ໃນລັດສານ ແລະ ຫຼາຍເຂັດເຊັ່ນ: ເມືອງຢອງຫ້ວຍ ເມືອງຢວາງັນ ແລະ ເມືອງພິນອູນວິນຕະຫຼອດຈົນຮອດໃນລັດສິນ ແລະ ເຂດພະໂຄ ໂດຍເນື້ອທີ່ປູກກາເຟ 80% ຂອງປະເທດເປັນກາເຟອາຣາບິກາ.
    ເນັບເຖິງປັດຈຸບັນ, ມຽນມາຜະລິດກາເຟຫຼາຍກວ່າ 9.000 ໂຕນຕໍ່ປີ ຊຶ່ງລວມເຖິງກາເຟອາຣາບິກາຫຼາຍກວ່າ 7.000 ໂຕນ ແລະ ກາເຟໂຣບັສຕາຫຼາຍກວ່າ 2.000 ໂຕນ ທາງດ້ານສະມາຄົມກາເຟຂອງມຽນມາເປີດເຜີຍວ່າ ມຽນມາສົ່ງອອກແກ່ນກາເຟໄປຫຼາຍປະເທດເຊັ່ນ: ອັງກິດ ອາເມຣິກາ ຍີ່ປຸ່ນ ຈີນ ໄທ ແລະ ອົສຕຣາລີ.