ວິທະຍຸກະຈາຍສຽງຫວຽດນາມລາຍງານວ່າ: ວັນທີ 4 ມັງກອນ ຜ່ານມານີ້, ກົມສະຖິຕິ ແລະ ມະຫາວິທະຍາໄລເສດຖະກິດ ນະຄອນໂຮ່ຈີມິນ (UEH) ໄດ້ເຜີຍແຜ່ສິ່ງພິມບົດລາຍງານເສດຖະກິດມະຫາພາກ ນະຄອນໂຮ່ຈີມິນ, ດ້ວຍຫົວຂໍ້: ໝາກຜົນ 2023 ແລະ ຄາດຄະເນ ປີ 2024. ນີ້ແມ່ນຄັ້ງທຳອິດທີ່ນະຄອນໂຮ່ຈີມິນ ມີການພິມກ່ຽວກັບເສດຖະກິດມະຫາພາກ ແລະ ຄາດວ່າຈະພິມຈຳໜ່າຍທຸກໆປີ.

ຂ່າວລາຍງານວ່າ: ບົດລາຍງານໄດ້ສະໜອງການສັງເກດທີ່ຮອບດ້ານກ່ຽວກັບສະພາບເສດຖະກິດ ຂອງນະຄອນປີ 2023, ບັນດາໝາກຜົນທີ່ບັນລຸໄດ້ ແລະ ການຄາດຄະເນ, ຄວາມຄາດຫວັງໃນປີ 2024, ພ້ອມທັງສະເໜີບັນດານະໂຍບາຍ ໃຫ້ແກ່ອຳນາດການປົກຄອງນະຄອນ. ບົນພື້ນຖານວິເຄາະ ສັງລວມກ່ຽວກັບເສດຖະກິດໂລກ ແລະ ຫວຽດນາມ, ບົດລາຍງານໄດ້ຕີລາຄາການເຕີບໂຕເສດຖະກິດຂອງ ນະຄອນໂຮ່ຈີມິນ ປີ 2023 ຟື້ນຟູຢ່າງເປັນປົກກະຕິ ພາຍຫຼັງຜົນກະທົບຢ່າງໜັກໜ່ວງຈາກພະຍາດໂຄວິດ - 19. ຂໍ້ມູນແຕ່ລະໄຕມາດໃນປີ 2023 ສະແດງໃຫ້ເຫັນບັນດານະໂຍບາຍຂອງນະຄອນເວົ້າສະເພາະ ແລະ ຫວຽດນາມ ເວົ້າລວມ ໃນການປັບຕົວໃຫ້ແທດເໝາະກັບການປ່ຽນແປງ, ຍາດແຍ່ງໂອກາດໃໝ່ຂອງພື້ນຖານເສດຖະກິດໂລກ ພວມກ້າວເດີນຖືກທິດ ແລະ ເສີມຂະຫຍາຍຜົນກະທົບ. ຕາມບົດລາຍງານແລ້ວ, ປີ 2024 ຄາດຄະເນວ່າຄາດໝາຍການເຕີບໂຕ GDP (ຍອດຜະລິດຕະພັນພາຍໃນ)ຂອງນະຄອນໂຮ່ຈີມິນ ອາດຈະບັນລຸ 7,1% - 8%.