ຂ່າວຕ່າງປະເທດລາຍງານໂດຍອີງຕາມຂໍ້ມູນຈາກສະມາຄົມແກ່ນໝາກມ່ວງຫິມະພານໃຫ້ຮູ້ໃນວັນທີ 8 ມັງກອນ ຜ່ານມາ ວ່າ: ກຳປູເຈຍໄດ້ສົ່ງອອກແກ່ນໝາກມ່ວງຫິມະພານດິບໃນປີ 2023 ມີມູນຄ່າ 837 ລ້ານໂດລາ, ເມື່ອທຽບໃສ່ປີຕໍ່ປີໄດ້ຫຼຸດລົງ 16,9%.

ສະມາຄົມດັ່ງກ່າວຍັງໄດ້ລະບຸວ່າ: ການສົ່ງອອກແກ່ນໝາກມ່ວງຫິມະພານໃນປີ 2023 ໄດ້ 656.000 ໂຕນ, ມູນຄ່າການສົ່ງອອກໄດ້ຫຼຸດລົງ 7,6%. ການສົ່ງອອກໄປປະເທດໃກ້ຄຽງເຊັ່ນ: ຫວຽດນາມແມ່ນ 618.000 ໂຕນ ຫຼື ເທົ່າກັບ 94,2% ຂອງຈຳນວນການສົ່ງອອກແກ່ນໝາກມ່ວງຫິມະພານທັງໝົດ.

ທ່ານ ອຸ່ນ ຊີລອດ ປະທານສະມາຄົມດັ່ງກ່າວ ກ່າວວ່າ: ການສົ່ງອອກຫຼຸດລົງແມ່ນສັນຍານທີ່ດີສຳລັບອຸດສາຫະກຳປຸງແຕ່ງແກ່ນໝາກມ່ວງຫິມະພານ, ມັນສະທ້ອນໃຫ້ເຫັນວ່າ ຈຳນວນບໍລິສັດປຸງແຕ່ງແກ່ນໝາກມ່ວງຫິມະພານໃນປະເທດກຳປູເຈຍໄດ້ເພີ່ມຂຶ້ນ. ບໍລິສັດພາຍໃນປະເທດໄດ້ຊື້ແກ່ນໝາກມ່ວງຫິມະພານເພື່ອນຳມາປຸງແຕ່ງຢູ່ພາຍໃນປະເທດ ຊຶ່ງເຮັດໃຫ້ການສົ່ງອອກແກ່ນໝາກມ່ວງຫິມະພານສູ່ປະເທດຫວຽດນາມໄດ້ຫຼຸດລົງ.

ນອກຈາກເຂົ້າ, ຢາງພາລາ, ນ້ຳມັນປາມ, ກ້ວຍ, ໝາກມ່ວງ, ມັນຕົ້ນ, ໝາກລຳໄຍ ແລະ ໝາກພິກໄທແລ້ວ, ແກ່ນໝາກມ່ວງຫິມະພານ ແມ່ນຜົນຜະລິດທີ່ນຳເງິນສົດເຂົ້າປະເທດ. ອີງຕາມຂໍ້ມູນຈາກສະມາຄົມດັ່ງກ່າວໃຫ້ຮູ້ວ່າ: ປັດຈຸບັນນີ້ມີການປູກຕົ້ນໝາກມ່ວງຫິມະພານຢູ່ 10 ແຂວງ ຈຳນວນ 7 ແສນເຮັກຕາ.