ວິທະຍຸກະຈາຍສຽງຫວຽດນາມລາຍງານວ່າ: ໃນປີຜ່ານມາ, ການສົ່ງອອກເຂົ້າສານຂອງ ຫວຽດນາມ ບັນລຸ 8,13 ລ້ານໂຕນ ດ້ວຍມູນຄ່າ 4,7 ຕື້ໂດລາ ຊຶ່ງເປັນສະຖິຕິລະດັບສູງຂອງຂະແໜງເຂົ້າສານຫວຽດນາມ. ນີ້ແມ່ນໂຕເລກສະຖິຕິຫຼ້າສຸດຂອງກົມໃຫຍ່ພາສີ ທີ່ປະກາດໃນວັນທີ 12 ມັງກອນ ຜ່ານມາ. ເມື່ອທຽບໃສ່ປີ 2022, ການສົ່ງອອກເຂົ້າສານຂອງ ຫວຽດນາມ ເພີ່ມຂຶ້ນ 14,4% ກ່ຽວກັບປະລິມານ ແລະ 35,3% ກ່ຽວກັບຄຸນຄ່າ ເມື່ອທຽບໃສ່ໄລຍະດຽວກັນຂອງປີຜ່ານມາ.  ຟີລິບປິນ ແມ່ນຕະຫຼາດນຳເຂົ້າເຂົ້າສານຫຼາຍທີ່ສຸດຈາກ ຫວຽດນາມ ໃນປີ 2023 ດ້ວຍປະລິມານ 3,1 ລ້ານກວ່າໂຕນ; ຖັດຈາກນັ້ນແມ່ນ ອິນໂດເນເຊຍ, ຈີນ ແລະ ການາ.
ຫວຽດນາມ ແມ່ນປະເທດຜະລິດເຂົ້າສານໃຫຍ່ອັນດັບທີ 5 ໃນໂລກ ແລະ ແມ່ນແຫຼ່ງສົ່ງອອກເຂົ້າໃຫຍ່ອັນດັບທີ 3 ໃນໂລກ (ໄລ່ຕາມປະລິມານ). ເຖິງວ່າຖືກຜົນກະທົບຈາກປະກົດການແອວນີໂຢ (El Nino) ແຕ່ປະລິມານສົ່ງອອກເຂົ້າຂອງ ຫວຽດນາມ ຍັງເພີ່ມຂຶ້ນຢ່າງກະໂດດຂັ້ນ. ຕາມບັນດາວິສາຫະກິດແລ້ວ, ການສົ່ງອອກເຂົ້າສານຂອງ ຫວຽດນາມ ເພີ່ມຂຶ້ນຢ່າງແຂງແຮງ ນັບແຕ່ລັດຖະບານ ອິນເດຍ ໄດ້ປະກາດໃຊ້ຄຳສັ່ງຫ້າມສົ່ງອອກເຂົ້າສານທີ່ບໍ່ແມ່ນເຂົ້າຂາວບາສມາຕິ (basmati)  ໃນເດືອນກໍລະກົດ ປີ 2023. ໄລ່ມາຮອດປັດຈຸບັນ, ຄຳສັ່ງຫ້າມດັ່ງກ່າວ ຍັງບໍ່ທັນໄດ້ຍົກເລີກເທື່ອ. ສະນັ້ນ, ການສົ່ງອອກເຂົ້າສານຂອງ ຫວຽດນາມ ໃນປີ 2024 ນີ້ ຈະມີສັນຍານຕັ້ງໜ້າຫຼາຍຢ່າງ.