ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ສຳນັກງານສະຖິຕິແຫ່ງຊາດອາກຊັງຕິນໄດ້ເປີດເຜີຍບົດລາຍງານໂດຍລະບຸວ່າ: ອັດຕາເງິນເຟີ້ຂອງປະເທດ ໃນປີ 2023 ຜ່ານມາ ສູງທີ່ສຸດເປັນປະຫວັດສາດ 211,4% ໂດຍອັດຕາເງິນເຟີ້ ໃນເດືອນທັນວາ 2023 ຢູ່ທີ່ 25,5%.

ທັງນີ້, ລາຄາອາຫານ ແລະ ເຄື່ອງດື່ມທີ່ບໍ່ມີແອວກໍຮໍໃນອາກຊັງຕິນໃນປີຜ່ານມາເພີ່ມຂຶ້ນຫຼາຍກວ່າ 251% ເມື່ອທຽບແບບລາຍປີ ຊຶ່ງຖືວ່າເປັນປັດໄຈສຳຄັນທີ່ສົ່ງຜົນໃຫ້ອັດຕາເງິນເຟີ້ຂອງປະເທດເພີ່ມສູງຂຶ້ນ ຂະນະທີ່ລາຄາອາຫານ ແລະ ເຄື່ອງດື່ມປະເພດດັ່ງກ່າວສະເພາະເດືອນທັນວາຜ່ານມາ ເພີ່ມຂຶ້ນ 29,7% ໂດຍສະເພາະຊີ້ນສັດ, ເຂົ້າຈີ່ ແລະ ຜະລິດຕະພັນຊີຣຽວ. ດ້ານອັດຕາຄ່າບໍລິການລະບົບຂົນສົ່ງສາທາລະນະເພີ່ມຂຶ້ນ 187% ແລະ ອັດຕາຄ່າບໍລິການລະບົບສາທາລະນະສຸກເພີ່ມຂຶ້ນ 227% ເມື່ອທຽບແບບລາຍປີ ສ່ວນອັດຕາແລກປ່ຽນລະຫວ່າງເງິນເປໂຊອາກຊັງຕິນ ກັບ ເງິນໂດລາ ຢູ່ທີ່ 835 ເປໂຊຕໍ່ 1 ໂດລາ ຕາມການປະກາດຂອງທະນາຄານກາງແມ່ນ 1.120 ເປໂຊຕໍ່ 1 ໂດລາໃນຕະຫຼາດມືດ. ອີກຢ່າງໜຶ່ງ, ອາກຊັງຕິນ ຊຶ່ງເປັນປະເທດທີ່ມີຂະໜາດເສດຖະກິດໃຫຍ່ເປັນອັນດັບ 2 ຂອງອາເມຣິກາໃຕ້ ຮອງຈາກບຣາຊິນເຄີຍປະເຊີນກັບອັດຕາເງິນເຟີ້ສູງເຖິງ 3.000% ໃນລະຫວ່າງປີ 1989-1990 ແລະ ວິກິດເສດຖະກິດຄັ້ງໃຫຍ່ ໃນປີ 2001.

ຂະນະທີ່ ທ່ານ ຂາບິເອ ມິເລ ປະທານາທິບໍດີອາກຊັງຕິນ ໄດ້ປະກາດມາດຕະການຮັດສາຍແອວເພື່ອຫວັງຫຼຸດອັດຕາເງິນເຟີ້ໃນປະເທດໃຫ້ໄດ້ຕາມຂໍ້ຕົກລົງກັບກອງທຶນເງິນຕາສາກົນ (IMF) ຊຶ່ງເປັນເຈົ້າໜີ້ລາຍໃຫຍ່ທີ່ສຸດ.