ຂ່າວຕ່່າງປະເທດລາຍງານວ່າ: ໃນວັນທີ 17 ມັງກອນ ຜ່ານມາ, ຜູ້ອຳນວຍການໃຫຍ່ສະມາຄົມຢາງພາລາກຳປູເຈຍ ໃຫ້ຮູ້ວ່າ: ໃນປີ 2023 ຜ່ານມາ, ກຳປູເຈຍໄດ້ສົ່ງອອກຢາງພາລາແຫ້ງ 368.048 ໂຕນ, ຫຼຸດລົງປະມານ 1,3% ຂອງປີກ່ອນທີ່ສົ່ງອອກໄດ້ 372.903 ໂຕນ.

ປີຜ່ານມາ, ກຳປູເຈຍມີລາຍໄດ້ຈາກການສົ່ງອອກຢາງພາລາ 490,6 ລ້ານໂດລາ,ຫຼຸດລົງ 7% ເມື່ອທຽບກັບປີກ່ອນທີ່ສົ່ງອອກໄດ້ 527,6 ລ້ານໂດລາ. ການສົ່ງອອກຢາງພາລາຫຼຸດລົງຍ້ອນຄວາມຕ້ອງການຈາກໂຮງງງານຕີນລົດພາຍໃນປະເທດເພີ່ມຂຶ້ນ.

ທ່ານ ຮີມ ອ້ວນ ຜູ້ອຳນວຍການໃຫຍ່ສະມາຄົມຢາງພາລາກຳປູເຈຍກ່າວວ່າ: ໃນປີ 2023, ລາຄາຢາງພາລາແຫ້ງໂດຍສະເລ່ຍແມ່ນ 1.333 ໂດລາ, ຕ່ຳກວ່າລາຄາຢາງພາລາທີ່ຂາຍໃນປີກ່ອນ 82 ໂດລາ.

ກຳປູເຈຍໄດ້ປູກຕົ້ນຢາງພາລາທັງໝົດ 407.172 ເຮັກຕາ, ໃນນັ້ນ 320.184 ເຮັກຕາ ຫຼື ປະມານ 78,6% ແມ່ນຕົ້ນຢາງພາລາແກ່ທີ່ສາມາດປາດເອົານໍ້າຢາງພາລາໄດ້ແລ້ວ. ກຳປູເຈຍ ສົ່ງອອກຢາງພາລາໄປຕະຫຼາດຕົ້ນຕໍແມ່ນ ມາເລເຊຍ, ຫວຽດນາມ,ສິງກະໂປ ແລະ ຈີນ.