ຂ່າວຕ່າງປະເທດລາຍງານ ເມື່ອບໍ່ດົນມານີ້, ນັກເສດຖະສາດສ່ວນຫຼາຍທີ່ໄດ້ຮັບການສຳຫຼວດຈາກ World Economic Forum (WEF) ຄາດຄະເນວ່າ ເສດຖະກິດໂລກໃນປີນີ້ຈະອ່ອນແອລົງ ໂດຍໄດ້ຮັບຜົນກະທົບຈາກຄວາມຂັດແຍ່ງດ້ານພູມສາດການເມືອງທີ່ຮຸນແຮງຂຶ້ນທົ່ວໂລກ.

WEF ລະບຸວ່າ: ເສດຖະກິດໂລກຍັງຄົງມີທ່າອ່ຽງຖົດຖອຍ ແລະ ເຕັມໄປດ້ວຍຄວາມບໍ່ແນ່ນອນ ເຖິງແມ່ນວ່າມີການພັດທະນາທີ່ເປັນບວກຈາກແຮງກົດດັນເງິນເຟີ້ທີ່ຫຼຸດລົງ ແລະ ມີຄວາມຄືບໜ້າດ້ານປັນຍາປະດິດ (AI) ແຕ່ພາກທຸລະກິດ ແລະ ຜູ້ກຳນົດນະໂຍບາຍຍັງຄົງປະເຊີນກັບອຸປະສັກ ແລະ ຄວາມແປປ່ວນຢ່າງຕໍ່ເນື່ອງ ໂດຍເສດຖະກິດໂລກຍັງຄົງຫຼຸດລົງ ຂະນະທີ່ຄວາມຂັດແຍ່ງດ້ານພູມສາດການເມືອງ ແລະ ຄວາມເຄັ່ງຕຶງໃນສັງຄົມມີຄວາມຮຸນແຮງຂຶ້ນ. ຜົນການສຳຫຼວດພົບວ່າ ນັກເສດຖະສາດມີຄວາມກັງວົນຕໍ່ເສດຖະກິດໃນເອີຣົບຫຼາຍທີ່ສຸດ ຮອງລົງມາແມ່ນອາເມຣິກາ ແຕ່ມີຄວາມຄິດເຫັນເປັນບວກສຳລັບເສດຖະກິດໃນອາຊີໃຕ້ ແລະ ອາຊີຕາເວັນອອກລວມທັງປາຊີຟິກ.

ເຖິງຢ່າງໃດກໍຕາມ, ຜົນການສຳຫຼວດລະບຸວ່າ: ນັກເສດຖະສາດຄາດວ່າເງິນເຟີ້ຈະຫຼຸດລົງໃນປີນີ້ ຂະນະທີ່ພາວະທາງການເງິນກໍຜ່ອນຄາຍລົງເຊັ່ນດຽວກັນ.