ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 17 ມັງກອນ ຜ່ານມາ, The Outbox Company (Outbox) - ບໍລິສັດຄົ້ນຄວ້າການຕະຫຼາດ ແລະ ໄຈ້ແຍກຂໍ້ມູນແຂກທ່ອງທ່ຽວນຳໜ້າຢູ່ ຫວຽດນາມ ໄດ້ອອກບົດລາຍງານໄຈ້ແຍກ “ສະພາບການທ່ອງທ່ຽວ ຫວຽດນາມ 2024”, ຄາດວ່າຈຳນວນແຂກທ່ອງທ່ຽວສາກົນ ມາ ຫວຽດນາມ ຈະເພີ່ມຂຶ້ນໃນປີ 2024.

ຂ່າວລະບຸວ່າ: ຕາມບົດລາຍງານສະບັບນີ້, ຂະແໜງການບິນ ຂອງ ຫວຽດນາມ ໄດ້ມີການຟື້ນຟູທີ່ເປັນໜ້າປະທັບໃຈ ພາຍຫຼັງຜ່ອນຜັນຂໍ້ຈຳກັດກ່ຽວກັບການທ່ອງທ່ຽວຍ້ອນພະຍາດໂຄວິດ - 19 ທັງຢູ່ພາຍໃນ ແລະ ຕ່າງປະເທດ. ຫວຽດນາມ ໄດ້ຟື້ນຟູ ຕະຫຼາດການບິນພາຍໃນປະເທດ ໄວທີ່ສຸດໃນໂລກ ແລະ ຄາດຄະເນວ່າ ຈະແມ່ນຕະຫຼາດການບິນທີ່ມີການພັດທະນາຢ່າງວ່ອງໄວຢູ່ອັນດັບທີ 5 ໃນທົ່ວໂລກໃນປີ 2035.

ກ່ຽວກັບຜົນສຳເລັດຂອງຂະແໜງທ່ອງທ່ຽວຫວຽດນາມ ໃນປີຜ່ານມາ, ຜູ້ຕາງໜ້າ The Outbox Company (Outbox) ໄດ້ກ່າວວ່າ: ຂະແໜງທ່ອງທ່ຽວ ຫວຽດນາມ ມີການຟື້ນຟູຫຼາຍພໍສົມຄວນດ້ວຍຈຳນວນນັກທ່ອງທ່ຽວສາກົນ ບັນລຸ 12,59 ລ້ານເທື່ອຄົນ, ທົບເກືອບ 4 ເທົ່າເມື່ອທຽບໃສ່ກັບປີ 2022. ຈຸດພົ້ນເດັ່ນຂອງຂະ ແໜງທ່ອງທ່ຽວ ຫວຽດນາມໃນປີ 2023 ແມ່ນຄວາມເປັນຫຼາຍຮູບແບບຂອງແຂກທ່ອງທ່ຽວສາກົນ ຢູ່ ຫວຽດນາມ ນັບແຕ່ຕະຫຼາດທີ່ຫາກໍພົ້ນເດັ່ນຂຶ້ນຕະຫຼອດຮອດບັນດາຕະຫຼາດສະເພາະ, ໄປຄຽງຄູ່ກັນນັ້ນແມ່ນບັນດາຕະຫຼາດຢູ່ອາຊີຕາເວັນອອກຄື: ຈີນ, ສ ເກົາຫຼີ… ຂະແໜງທ່ອງທ່ຽວ ຫວຽດນາມ ຍັງມີຄວາມສາມາດບົ່ມຊ້ອນຈາກພາກພື້ນຕ່າງໆ.