ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 20 ມັງກອນ ຜ່ານມາ ຢູ່ນະຄອນຮ່າຕຽນ ແຂວງກຽນຢາງ, ທ່ານ ຫວໍວັນເຖືອງ ປະທານປະເທດ ຫວຽດນາມ ໄດ້ເຂົ້າຮ່ວມລາຍການລະດູບານໃໝ່ເຂດຊາຍແດນ - ສ້າງຄວາມອົບອຸ່ນໃຫ້ຊາວທ້ອງຖິ່ນ ປີ 2024 ຊຶ່ງຈັດໂດຍກອງບັນຊາການທະຫານປ້ອງກັນຊາຍແດນ ແລະ ຄະນະກໍາມະການປະຊາຊົນ ແຂວງກຽນຢາງ.
ຂ່າວລະບຸວ່າ: ກ່າວຄຳເຫັນໃນພິທີ, ທ່ານ ຫວໍວັນເຖືອງ ເນັ້ນໜັກວ່າ: ແຕ່ລະປີ, ໃນໂອກາດບຸນເຕັດ, ລະດູບານໃໝ່ວຽນມາ, ລາຍການ “ລະດູບານໃໝ່ເຂດຊາຍແດນ - ສ້າງຄວາມອົບອຸ່ນໃຫ້ຊາວທ້ອງຖິ່ນ” ໄດ້ຈັດຂຶ້ນຢ່າງຟົດຟື້ນມ່ວນຊື່ນ ຢູ່ບັນດາເຂດຊາຍແດນ, ໝູ່ເກາະ, ນີ້ແມ່ນນ້ຳໃຈສາມັກຄີຂອງທະຫານ, ປະຊາຊົນ, ກ່ຽວກັບຄວາມສະໜິດຕິດພັນລະຫວ່າງກອງທັບ ແລະ ປະຊາຊົນ ພ້ອມກັບພໍ່ແມ່ປະຊາຊົນບັນດາເຜົ່າ, ທ່ານກ່າວວ່າ: ລາຍການນີ້ໄດ້ນຳມາຊຶ່ງຄວາມປິຕິຊົມຊື່ນ ແລະ ບັນຍາກາດຟົດຟື້ນໃຫ້ແກ່ພໍ່ແມ່ປະຊາຊົນບັນດາເຜົ່າເຂດຊາຍແດນ, ທະເລ, ໝູ່ເກາະ ເມື່ອລະດູບານໃໝ່ວຽນມາ. ໃນບັນດາລາຍການຄື: ການປິ່ນປົວພະຍາດ-ສະໜອງຢາປິ່ນປົວໂດຍບໍ່ເກັບຄ່າ, ມອບຂອງຂວັນໃຫ້ແກ່ບັນດາຄອບຄົວເປົ້າໝາຍນະໂຍບາຍ, ຄອບຄົວທຸກຍາກ, ມອບທຶນການສຶກສາໃຫ້ນັກຮຽນທີ່ປະສົບກັບຄວາມຫຍຸ້ງຍາກ ດ້ວຍມູນຄ່ານັບຫຼາຍຕື້ດົງ... ຂ້າພະເຈົ້າເຊື່ອໝັ້ນວ່າ ນີ້ແມ່ນບັນດາຂອງຂວັນທີ່ມີຄວາມໝາຍ, ແມ່ນຄວາມເອົາໃຈໃສ່, ການລະດົມກຳລັງໃຈ, ສ້າງຄວາມອົບອຸ່ນໃຫ້ທະຫານ ແລະ ປະຊາຊົນ. ຂ້າພະເຈົ້າຫວັງວ່າ ມູນເຊື້ອເມດຕາຂອງຊາດນັບມື້ນັບໄດ້ແຜ່ຂະຫຍາຍໃນສັງຄົມຢ່າງກວ້າງຂວາງ.