ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມປະຈຳປີ ຄັ້ງທີ 54 ເວທີປາໄສເສດຖະກິດໂລກ (WEF) ທີ່ຈັດຂຶ້ນຢູ່ນະຄອນດາວອດສ ປະເທດສະວິດ ໄດ້ປິດລົງເມື່ອບໍ່ດົນມານີ້ ພາຍຫຼັງເຮັດວຽກມາເປັນເວລາ 5 ວັນ ໂດຍໄດ້ປຶກສາຫາລືກ່ຽວກັບຫຼາຍບັນຫາ.
ຂ່າວລະບຸວ່າ: ໃນບົດກ່າວປາໄສປິດກອງປະຊຸມ, ທ່ານ ບຣອດ ເບຣດ ປະທານ WEF ໄດ້ຮຽກຮ້ອງການສ້າງຄວາມໄວ້ເນື້ອເຊື່ອໃຈໃນສະພາບການໂລກນັບມື້ນັບມີການແຕກແຫງ ແລະ ຈັດແບ່ງຂົ້ວ. ທ່ານໄດ້ເນັ້ນໜັກເຖິງບົດບາດຂອງເວທີປາໄສ ໃນການປຸກລະດົມນ້ຳໃຈສາມັກຄີໃນທົ່ວໂລກ, ພ້ອມທັງຢືນຢັນວ່າ ການຮ່ວມມືອາດຈະນຳມາຊຶ່ງບັນດາໝາກຜົນທີ່ຕັ້ງໜ້າ ແລະ ມີຄວາມໝາຍ.
ກອງປະຊຸມທີ່ຈັດຂຶ້ນໃນເວລາ 5 ວັນ ໂດຍຫົວຂໍ້ “ສ້າງຄວາມໄວ້ເນື້ອເຊື່ອໃຈຄືນໃໝ່” ໄດ້ສຸມໃສ່ 4 ບຸລິມະສິດຕົ້ນຕໍ ຄື: ການເພີ່ມທະວີການຮ່ວມມືໃນໂລກທີ່ນັບມື້ນັບໄດ້ແບ່ງແຍກກັນ, ຊຸກຍູ້ການເຕີບໂຕເສດຖະກິດ ແລະ ວຽກເຮັດງານທຳໃນໄລຍະໃໝ່, ບັນດາມາດຕະການ ນຳ AI ກາຍເປັນກຳລັງໜູນໃຫ້ແກ່ການເຕີບໂຕເສດຖະກິດ ກໍຄືພັດທະນາສັງຄົມ ແລະ ສ້າງຍຸດທະສາດຍາວນານ ກ່ຽວກັບການປ່ຽນແປງຂອງດິນຟ້າອາກາດ ແລະ ຄວາມໝັ້ນຄົງດ້ານພະລັງງານ.