ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ສູນຄວບຄຸມ ແລະ ປ້ອງກັນພະຍາດຂອງອາເມຣິກາ (CDC) ໄດ້ປະກາດຂໍ້ມູນທີ່ສະແດງໃຫ້ເຫັນວ່າ, ມີ 13.000 ຄົນ ເສຍຊີວິດຍ້ອນພະຍາດໄຂ້ຫວັດໃຫຍ່ໃນລະດູການແຜ່ລະບາດ ຢູ່ອາເມຣິກາ ໃນປີນີ້.

ຂ່າວລະບຸວ່າ: ອີງຕາມ CDC, ລະດູໄຂ້ຫວັດໃຫຍ່ໃນອາເມຣິກາ ໄດ້ມີຜູ້ຕິດເຊື້ອ 18 ລ້ານຄົນ, ໃນນັ້ນ 210.000 ຄົນ ໄດ້ຮັບການປິ່ນປົວຢູ່ໃນໂຮງໝໍ. ປັດຈຸບັນ, ພະຍາດດັ່ງກ່າວຍັງສືບຕໍ່ແຜ່ຂະຫຍາຍຢ່າງສັບສົນຢູ່ບັນດາພາກພື້ນໃນທົ່ວປະເທດ. ໃນອາທິດດຽວ ມີເດັກນ້ອຍ 10 ຄົນເສຍຊີວິດຍ້ອນໄຂ້ຫວັດໃຫຍ່, ດັ່ງນັ້ນຈຶ່ງເຮັດໃຫ້ຈໍານວນເດັກນ້ອຍທີ່ເສຍຊີວິດຍ້ອນໄຂ້ຫວັດປີນີ້ເພີ່ມຂຶ້ນເປັນ 57 ກໍລະນີ. ໃນຂະນະດຽວກັນ, ການແຜ່ລະບາດຂອງໄຂ້ຫວັດໃຫຍ່ຍັງມີຄວາມສັບສົນໃນພື້ນທີ່ສ່ວນໃຫຍ່ໃນທົ່ວປະເທດ. ສະນັ້ນ, CDC ຈຶ່ງແນະນຳໃຫ້ສັກຢາປ້ອງກັນໄຂ້ຫວັດ ໃຫຍ່ສຳລັບທຸກຄົນທີ່ມີອາຍຸຕັ້ງແຕ່ 6 ເດືອນຂຶ້ນໄປ.