ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມຫົວໜ້າຄະນະກິລານັກຮຽນອາຊີຕາເວັນອອກ ສ່ຽງໃຕ້ ຄັ້ງທີ 13 ໄດ້ຈັດຂຶ້ນເມື່ອບໍ່ດົນມານີ້ ຢູ່ ນະຄອນດານັງ, ໂດຍການເຂົ້າຮ່ວມຂອງບັນດາຜູ້ແທນຈາກບັນດາປະເທດສະມາຊິກອາຊຽນ ພ້ອມໄດ້ຮັບຟັງປະເທດເຈົ້າພາບ ຫວຽດນາມ ລາຍງານກ່ຽວກັບວຽກງານກະກຽມໃຫ້ແກ່ງານມະຫະກຳກິລາດັ່ງກ່າວຢູ່ ຫວຽດນາມ; ປຶກສາຫາລື ແລະ ຮັບຮອງເອົາກົດລະບຽບບັນດາປະເພດກິລາ; ສຳຫຼວດສະຖານທີ່ແຂ່ງຂັນ.

ຂ່າວລະບຸວ່າ: ກ່າວຄຳເຫັນໃນກອງປະຊຸມ, ທ່ານນາງ ໂງທິມິງ ຮອງລັດຖະມົນຕີກະຊວງສຶກສາ ແລະ ບຳລຸງສ້າງ ຫວຽດນາມ ປະທານສະມາຄົມກິລານັກຮຽນ ຫວຽດນາມ ໃຫ້ຮູ້ວ່າ: ການຈັດງານມະຫະກຳກິລາແມ່ນເພື່ອຊຸກຍູ້ນ້ຳໃຈຄວາມສາມັກຄີ, ມິດຕະພາບໃນຮຸ່ນໜຸ່ມບັນດາປະເທດອາຊີຕາເວັນອອກສ່ຽງໃຕ້, ຜ່ານການເຄື່ອນໄຫວແຂ່ງຂັນກິລາສະຫງວນໃຫ້ນັກຮຽນ. ດ້ວຍຄວາມຮັບຜິດຊອບຂອງປະເທດເຈົ້າພາບ, ກະຊວງສຶກສາ ແລະ ບຳລຸງສ້າງ ຫວຽດນາມ, ຄະນະຈັດຕັ້ງງານມະຫະກຳກິລາ, ສະມາຄົມກິລານັກຮຽນ ຫວຽດນາມ ໄດ້ສົມທົບກັນຢ່າງແໜ້ນແຟ້ນກັບບັນດາກະຊວງ, ຂະແໜງການ, ພ້ອມກັບຄະນະກຳມະການປະຊາຊົນນະຄອນດານັງ, ກະກຽມຫຼາຍວຽກງານເພື່ອຈັດງານມະຫະກຳກິລາໃຫ້ບັນລຸຜົນສຳເລັດ.

ງານມະຫະກຳກິລານັກຮຽນອາຊີຕາເວັນອອກສ່ຽງໃຕ້ ຄັ້ງທີ 13 ຈະຈັດຂຶ້ນຢູ່ ຫວຽດນາມ ແຕ່ວັນທີ 31 ພຶດສະພາ ຫາວັນທີ 9 ມິຖຸນາ 2024 ດ້ວຍການເຂົ້າຮ່ວມຂອງ 10 ປະເທດສະມາຊິກ.