ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກະຊວງການຄ້າອາເມຣິກາ ໄດ້ອອກຖະແຫຼງການໂດຍລະບຸວ່າ: ໂຕເລກລວມຍອດຜະລິດຕະພັນພາຍໃນປະເທດ (GDP) ຂອງອາເມຣິກາຂະຫຍາຍຕົວ ໃນໄຕມາດທີ 4 ຂອງປີ 2023 ຜ່ານມາ ໃນລະດັບ 3,3% ເມື່ອທຽບກັບໄລຍະເວລາດຽວກັນຂອງ ປີ 2022 ດ້ວຍແຮງສະໜັບສະໜູນຈາກຕະຫຼາດແຮງງານທີ່ມີຄວາມຍືນຍົງ ແລະ ການໃຊ້ຈ່າຍຂອງຜູ້ບໍລິໂພກກັບມາຄຶກຄື້ນ.

ທັງນີ້, ການຂະຫຍາຍຕົວດັ່ງກ່າວດີກວ່າການຄາດຄະເນ ເຮັດໃຫ້ອັດຕາການຂະຫຍາຍຕົວທາງດ້ານເສດຖະກິດຂອງອາເມຣິກາ ຊຶ່ງເປັນປະເທດທີ່ມີມູນຄ່າ GDP ສູງທີ່ສຸດໃນໂລກ ຢູ່ທີ່ 2,5% ໃນປີ 2022 ເປັນສະຖິຕິດີທີ່ສຸດນັບຕັ້ງແຕ່ປີ 2021. ອີກດ້ານໜຶ່ງ, ໂຕເລກທາງດ້ານເສດຖະກິດທີ່ອອກມາແນ່ນອນວ່າ ຈະເປັນຜົນດີຕໍ່ທ່ານປະທານາທິບໍດີ ໂຈ ໄບເດນ ຊຶ່ງກຳລັງຕ້ອງການການສະໜັບສະໜູນຂອງຜູ້ມີສິດອອກສຽງ ວ່າ: ເສດຖະກິດຂອງອາເມຣິກາກຳລັງມີທ່າອ່ຽງດີຂຶ້ນອີກຄັ້ງ ດ້ວຍຄວາມພະຍາຍາມຂອງຜູ້ນຳຄົນປັດຈຸບັນໃນການກະຕຸ້ນ ແລະ ສະໜັບສະໜູນການລົງທຶນ.