ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກະຊວງສິ່ງແວດລ້ອມຂອງກຳປູເຈຍໄດ້ເປີດເຜີຍບົດລາຍງານໂດຍລະບຸວ່າ: ປັດຈຸບັນມີປະຊາຊົນເຂົ້າຮ່ວມໂຄງການການປຸກລະດົມປາສະຈາກ ພລາສຕິກຂອງກຳປູເຈຍຫຼາຍກວ່າ 4,3 ລ້ານຄົນແລ້ວ ຫຼັງຈາກມີການແນະນຳຕົວ ໃນວັນທີ 1 ກັນຍາ 2023 ພາຍໃຕ້ຄຳຂວັນ ມື້ນີ້ຂ້ອຍບໍ່ໄດ້ໃຊ້ພລາສຕິກ ຊຶ່ງອອກແບບມາເພື່ອສົ່ງເສີມໃຫ້ປະຊາຊົນປະຕິເສດການໃຊ້ຖົງພລາສຕິກ.

ທ່ານ ອຽງ ໂສພາລລິດ ລັດຖະມົນຕີກະຊວງສິ່ງແວດລ້ອມຂອງກຳປູເຈຍລະບຸວ່າ: ໂຄງການດັ່ງກ່າວໄດ້ຮັບຄວາມສົນໃຈຢ່າງຕໍ່ເນື່ອງຈາກຜູ້ຄົນຈຳນວນຫຼາຍຂຶ້ນໃຫ້ຄວາມສຳຄັນກັບການເຮັດໃຫ້ກຳປູເຈຍປາສະຈາກພລາສຕິກ ໂດຍປັດຈຸບັນມີຜູ້ເຂົ້າຮ່ວມໂດຍກົງຫຼາຍກວ່າ 4,3 ລ້ານຄົນເຊັ່ນ: ຄູ, ນັກຮຽນ, ກຳມະກອນ ແລະ ຜູ້ມີສ່ວນຮ່ວມອື່ນໆທົ່ວກຳປູເຈຍ. ທ່ານ ໂສພານລິດ ຂໍຂອບໃຈຜູ້ເຂົ້າຮ່ວມທຸກທ່ານທີ່ມີສ່ວນຮ່ວມໃນການປົກປ້ອງສິ່ງແວດລ້ອມ ໂດຍທ່ານກ່າວວ່າ: ການຫຼຸດຜ່ອນການໃຊ້ພລາສຕິກຈະມີສ່ວນສົ່ງເສີມການພັດທະນາທີ່ສະອາດ ເປັນມິດຕໍ່ສິ່ງແວດລ້ອມ ແລະ ຄວາມຍືນຍົງຂອງກຳປູເຈຍ, ບ້ານເມືອງທີ່ສະອາດຈະດຶງດູດນັກທ່ອງທ່ຽວ ແລະ ນັກລົງທຶນເຂົ້າມາໃນກຳປູເຈຍຫຼາຍຂຶ້ນ.

ຂະນະດຽວກັນ, ທ່ານ ໂສພານລິດ ຍັງຮຽກຮ້ອງໃຫ້ປະຊາຊົນປູກຕົ້ນໄມ້ເພີ່ມຂຶ້ນ ເພື່ອໃຫ້ມີປ່າໄມ້ຄວບຄຸມພື້ນທີ່ 60% ແລະ ບັນລຸຄວາມເປັນກາງທາງຄາບອນ ພາຍໃນປີ 2050.