ວິທະຍຸກະຈາຍສຽງຫວຽດນາມລາຍງານວ່າ: ໃນເວທີປາໄສການທ່ອງທ່ຽວອາຊຽນ 2024 (ATF 2024) ທີ່ນະຄອນຫຼວງວຽງຈັນ ສປປ ລາວ ເມື່ອບໍ່ດົນມານີ້, ພິທີມອບລາງວັນການທ່ອງທ່ຽວອາຊຽນ 2024 ໄດ້ດຳເນີນຢ່າງເປັນທາງການ.

ຂ່າວລະບຸວ່າ: ພິທີມອບລາງວັນການທ່ອງທ່ຽວອາຊຽນ ເພື່ອສົ່ງເສີມບັນດາທ້ອງຖິ່ນ ແລະ ຫົວໜ່ວຍທີ່ມີຜະລິດຕະພັນ ແລະ ການບໍລິການດ້ານການທ່ອງທ່ຽວຄຸນນະພາບສູງ, ປະກອບສ່ວນພັດທະນາບັນດາສະຖານທີ່ທ່ອງທ່ຽວໃນພາກພື້ນອາຊຽນ ແບບຍືນຍົງ. ການມອບລາງວັນດັ່ງກ່າວແມ່ນໂອກາດເພື່ອໃຫ້ບັນດາວິສາຫະກິດທ່ອງທ່ຽວ ແລະ ບັນດາອົງການທ່ອງທ່ຽວທ້ອງຖິ່ນແນະນຳການເຄື່ອນໄຫວດຳເນີນທຸລະກິດຢ່າງມີປະສິດທິຜົນ, ປະກອບສ່ວນໂຄສະນາເຄື່ອງໝາຍການທ່ອງທ່ຽວແຫ່ງຊາດ.

ໃນພິທີມອບລາງວັນໃນປີນີ້, ຫວຽດນາມ ມີ 25 ຫົວໜ່ວຍໄດ້ຮັບລາງວັນໃນ 6 ປະເພດຄື: ລາງວັນໂຮງແຮມສີຂຽວອາຊຽນ; ລາງວັນເມືອງທ່ອງທ່ຽວສະອາດອາຊຽນ; ລາງວັນ MICE ອາຊຽນ ສໍາລັບສະຖານທີີ່ປະຊຸມ; ຫົວຂໍ້ ການທ່ອງທ່ຽວດ້ານອາຫານການກິນ.

ATF 2024 ຈັດຂຶ້ນລະຫວ່າງວັນທີ 22-27 ມັງກອນ ຜ່ານມາ ຢູ່ນະຄອນຫຼວງວຽງຈັນ ດ້ວຍຫົວຂໍ້: “ການທ່ອງທ່ຽວມີຄຸນນະພາບ ແລະ ມີຄວາມຮັບຜິດຊອບ - ເພື່ອອະນາຄົດຂອງອາຊຽນແບບຍືນຍົງ”. ໃນຂອບເຂດ ATF 2024, ໄດ້ດຳເນີນບັນດາການເຄື່ອນໄຫວສຳຄັນຄື: ກອງປະຊຸມອົງການທ່ອງທ່ຽວແຫ່ງຊາດອາຊຽນຄັ້ງທີ 59; ງານຕະຫຼາດນັດ ການທ່ອງທ່ຽວສາກົນ TRAVEX 2024; ກອງປະຊຸມອົງການທ່ອງທ່ຽວແຫ່ງຊາດອາຊຽນ+3 ຄັ້ງທີ 44; ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27; ກອງປະຊຸມລັດຖະມົນຕີທ່ອງທ່ຽວ ອາຊຽນ-ອິນເດຍ ຄັ້ງທີ 11; ກອງປະຊຸມລັດຖະມົນຕີການທ່ອງທ່ຽວ ອາຊຽນ+3 ຄັ້ງທີ 23; ກອງປະຊຸມລັດຖະມົນຕີການທ່ອງທ່ຽວ ອາຊຽນ - ຣັດເຊຍ ຄັ້ງທີ 3; ພິທີມອບລາງວັນການທ່ອງທ່ຽວອາຊຽນ ພ້ອມກັບການເຄື່ອນໄຫວອື່ນໆອີກຫຼາຍຢ່າງ.